Hăm tơring groi kông Phước Bình, apŭng Bác Ái, dêh char Ninh Thuận lơ̆m dôm năr vă jê̆ Têt au, mưh ‘long bri tŏk bŏk tơplih hla ‘nŏh mir pơgar ‘long sa plei nhen: krô̆i pung 300 dơnơm, 50 dơnơm ‘long sâu riêng, jrang jrưk kơ ŭnh hnam ƀok Katơr Quỳnh oei tơ̆ pơlei Hành Rạc 2 oei jing ‘lơ̆ng jơk ƀlĭk đĕch. Lơ̆m mă mir pơgar sâu riêng tŏk bŏk chôh pơkao, ‘noh pơgar krô̆i pung tŏk bŏk vă phĕ plei tĕch mơdro lơ̆m năr Têt. Sơng pơma dơnuh hăm nhôn lơ̆m pơbŭng hnam pơtăm joăt joe kơ bơngai Raglai, bơngai đảng viên hloh 30 sơnăm mơ̆t jang Đảng chơt hơ iă pơma: sơ̆, ŭnh nhnam ƀok jei nhen lơ kon pơlei anai lơ̆m tơring Phước Bình lăp băt pơtăm ‘long găr sơlơ̆k păng chă pơtăm bơ̆n hơƀo, tơ̆h kơna jang sa iŏk đei tŏ sĕt.

Đơ̆ng mă kơdră tơring chă pơrô̆ pơtho tơplih ‘long pơtăm, ŭnh hnam mă pơ̆n tơplih vă jê̆ 2ha pơtăm krô̆i pung, sâu riêng păng jrang jrưk, atŭm hăm jang tơmang pơhiơ̆ mir pơgar hăm jang sa iŏk đei hloh 150 triu hlak jên lơ̆m sơnăm. Đơ̆ng noh ƀok chă pơrô̆ hơvơn kon pơlei vang jang sa kiơ̆ vă atŏk tơ iung mŭk drăm.“Bơngai đảng viên kăl yŭk trong hơlau, rơ̆m rĕk, vei lăng cham char, trong nơnăm kăl rơgoh ‘lơ̆ng. Jang tơmang pơhiơ̆ kơna trong ‘mê̆ ‘mach ‘noh bu ‘meh năm năi. Đơ̆ng jơhngơ̆m đon ba tơchĕng lơ lau, kăl chă pơrô̆ pơrôp vă kon pơlei mơ̆ng păng pơm kiơ̆ lei ba kăl iung jang hơdrol ‘mơ̆i. ba jang hơdrol ‘noh jang ăn kơ ba, kon hơ ‘lơ̆p, đơ̆ng nŏh lang să jơ̆p lơ̆m pơlei pơla”.

Hơtăih kơ ‘noh ưh kơmăh dang yơ ‘nŏh pơbŭng hnam pơtăm kơ ŭnh hnam đảng viên mơlôh Katơr Chinh. Ŭnh hnam ‘nhŏng Chinh ‘noh jĭ mĭnh lơ̆m dôm ŭnh hnam yŭk trong hơlau tơmơ̆t jên jang atŏk tơ iung tơmang pơhiơ̆ pơlei pơla. ‘Nhŏng Chinh tơbăt, tơmoi năm tơ̆ au, ‘ngoăih jreng lăng mir pơgar ‘long sa plei, oei đei sŏng sa por ‘nhot joăt joe kơ bơngai Raglai nhen: Pơlăh prung, iĕr, ka phang ... chă lăng tơdrong hơsoang joăt joe kơ bơngai Raglai, Chru.“Găh nhôn jei đei tơgoăt jang hơdoi vă atŏk tơ iung tơmang pơhiơ̆ pơlei pơla đơ̆ng Chapi 1 truh tơ̆ Chapi 6. Dang ei nhôn jei tŏk bŏk hơmet ming pơsŭn hnam ‘lơ̆ng liĕm vă sơng hơvơn tơmoi pơchơt pơ hiơ̆ tơmang lăng lơ̆m khei năr Têt. Khul nhôn đei 2 đảng viên, ĭnh ‘noh kơiĕng khul, păng 5 ‘nu bơngai lơ̆m khul vă chă pơvih pơvăn ăn tơmoi. ‘Ngoăih kơ ‘noh oei đei khul 13 ‘nu bơngai chă pơgơ̆r joh asoang ăn tơmoi lăng”.

Tơdrong tơchơ̆t Pơm lêh Hop akom Đảng tơring Phước Bình, apŭng Bác Ái hlôi tơlĕch tơdrong jang păng trong jang lơ̆m hơtŏk tơ iung păng jang kiơ̆ jơhngơ̆m pran kon pơlei vang atŏk tơ iung mŭk drăm-tơpôl tơring. Chă pơrô̆ hơvơn kon pơlei tơplih jơhngơ̆m đon tơchĕng, tơdrong hơrih sa atŭm hăm tơring vang iung jang tơ iung pơjing trong jang “Tơmang pơhiơ̆ cham char păng tơdrong oei sa jŏh ayŏ kon pơlei pơla”, mă bơngai tơm ‘nŏh rim đảng viên bơngai Raglai. Lăp đơ̆ng rŏng pơrô̆ pơrôp, truh dang ei, lơ̆m tơring Phước Bình, apŭng Bác Ái hlôi đei 120 ŭnh hnam Raglai vang iung jang, lơ̆m au đei 60 ŭnh hnam sơđơ̆ng ăn tơdrong ‘meh vă vang jang kiơ̆ atŏk tơ iung tơmang pơhiơ̆ pơlei pơla. Hơnih Đảng păng Hơnih vei lăng kon pơlei tơring Phước Bình hlôi iung jang pơjing rim trong jang ăn tơdrong vă jang đơ̆ng kon jên Teh đak tơgŭm ăn păng kon tơlĕch kon jên tơmơ̆t jang: nhen pơm hnam pơtăm joăt joe sơ̆ ki; hnam chă pơyơ̆ng, hơmet ming cham pơgar, pơlăp rim hơnih hium tăh rơ̆m rĕk, kơƀang tơbăt, kơƀang chro tơƀôh trong....

Jang kiơ̆ Tơdrong vă jang Atŏk tơ iung tơmang pơhiơ̆ jang pơlong năng tơ̆ tơring Phước Bình jăl jang 2019-2022, tơmoi tơmang pơhiơ̆ năm chă tơmang lăng cham char, oei sa joh ayŏ tơ̆ tơring Phước Bình hlôi tŏk lơ, mă kăl lơ̆m năr pơdơ̆h, năr lêh. Rim sơnăm Phước Bình sơng hơvơn đei đơ̆ng 5.000 - 7.000 ‘nu tơmoi năm tơmang lăng. Kon pơlei tơ̆ au hlôi tơplih đon tơchĕng lơ̆m tơgoăt jang sa atŏk tơ iung muk drăm ŭnh hnam. Yă Pi Năng Thị Cô, Kơ iĕng Ƀĭ thư Đảng tơring Phước Bình, apŭng Bác Ái tơbăt:“ Mă kăl tơplih ‘long pơtăm. Đơ̆ng noh truh dang ei hlôi tơplih tôch kơtang, kon pơlei băt chă tĕch mơdro, jang kiơ̆ lơ trong jang. Tơ̆ au đei 5 hơdrĕch hơdrung vang hơrih sa hơdoi ‘noh bơngai Yuăn, Chăm, Raglai, Chru mă lei hơrih sa jĭ tơgoăt tơgoăl dih băl tôch kơ jăp, pha kơsơ̆ bơih. Dang ei tơplih tôch kơ dêh bơih”.

‘Moi kiơ̆ dôm tơdrong hlôi iŏk đei, Hơnih vei lăng kon pơlei apŭng Bác Ái, dêh char Ninh Thuận hơnơ̆ng tơlĕch ăn tơdrong vă jang ‘nao jăl jang 2023 – 2025 păng lăng truh sơnăm 2030 găh atŏk tơ iung tơmang pơhiơ̆ lơ̆m dêh char. Lơ̆m au, akŏm pơih să, pơm pơkeh mĭnh ƀar tơmam drăm tơmang pơhiơ̆ pơlei pơla tơ̆ tơring Phước Bình. Mă kăl hloh ‘noh lơ̆m sơnăm 2024 au, tơlĕch jang kiơ̆ tơdrong vă jang kơsô̆ 6 kơ Tơdrong jang tơm Teh đak găh atŏk tơ iung mŭk drăm-tơpôl tơring kon kông groi kông. Ƀok Trần Văn Toàn, Kơdră chĕp pơgơ̆r Hơnih vei lăng Joh ayŏ păng kơtơ̆ng ang apŭng Bác Ái, dêh char Ninh Thuận tơbăt, trong jang tơmang pơhiơ̆ pơlei pơla ‘noh mĭnh tơdrong rơvơn kơ tơring, păng jing hơnih ‘nao atŏk kơtang trong jang mŭk drăm kơ apŭng.“Hơnơ̆ng lơ̆m sơnăm 2024 au, lang să dơ̆ng mĭnh ƀar ŭnh hnam vă atŏk tơ iung tơmang pơhiơ̆, adoi rim ŭnh hnam hlôi jang đơ̆ng sơnăm 2022, 2023 ‘noh hơnơ̆ng pơm pơkeh ‘lơ̆ng liĕm hloh dơ̆ng, iung jang kiơ̆ trong pơkăp, vei lăng ‘lơ̆ng hơ iă păng kĕ pơm lang să lơ̆m kon pơlei pơla, vă tơgŭm ăn kon pơlei vang kơrŭn jơhngơ̆m atŭm dih băl atŏk tơ iung tơmang pơhiơ̆ pơlei pơla”.

Vă tơgop ba Phước Bình atŏk tơ iung jing pơlei tơmang pơhiơ̆ pơlei pơla păng lang să rim pơlei tơmang pơhiơ̆ anai kơ dêh char Ninh Thuận, lơ̆m khei năr kơnh, dôm bơngai đảng viên bơngai Raglai oei tơ̆ tơring Phươc Bình, apŭng Bác Ái gô hơnơ̆ng atŏk kơtang hơnăp jang kơdih lơ̆m pơrô̆ pơrôp kon pơlei vang jang kiơ̆ tơ iung pơjing trong jang “Tơmang pơhiơ̆ cham char păng tơdrong oei sa joh ayŏ pơlei pơla”..