Plei Trăng Nó Kon Blo, xăh Đăk Kôi, apŭng Kon Rẫy, dêh char Kon Tum đei 120 ŭnh hnam đĭ đăng kon pơlei tă kơ bơngai Xơ Đăng ngăl. Vă tơgŭm kon pơlei lơ̆m pơlei tơplih đon tơchĕng, tơ plih trong jang hơdrin yak tŏk lơ̆m jang sa, hơtŏk iŏk yua tơplih ‘lơ̆ng tơdrong hơrih, Chi bộ plei Trăng Nó Kon Blo băt hơdăh 21 đảng viên athei pơm jŭk yŭk trong hơlâu. Đơ̆ng dôm tơdrong jang hơtŏk tơiung mŭk drăm ŭnh hnam iŏk đei jơnei ‘lơ̆ng đơ̆ng đảng viên, nhen: yua hơdrĕch ƀa ‘nao, vei lăng ƀlep ki thuơ̆t ăn plei lơ; tơplih ‘long ƀum ƀlang hăm ‘long cheh phe, kơ su.... kon pơlei lơ̆m pơlei, mă loi ‘noh jĭ 35 ŭnh hnam găh dơnuh hin hŏk pơhrăm jang kiơ̆. Mŏ Y Xanh, Kơdră Khŭl jang vei lăng drŏ kăn xăh Đăk Kôi, đảng viên hŏk hôp tơ̆ plei Trăng Nó Kon Blo tơbăt, gơnang đơ̆ng đei dôm đảng viên chĕp ti tơƀôh tơdrong jang, tơnăp pơtho, dôm ŭnh hnam găh dơnuh hin mơmat hloh pơlei, nhen A Dĩa, A Thế, A Long… dang ei hlôi lui ngeh, pơ̆n tơmơ̆t jên jang hơtŏk tơiung pơm tơlĕch pơm dơ̆ng jên iŏk yua ăn ŭnh hnam:

“Dôm đảng viên hơnơ̆ng jur tơ̆ hnam vă tơ roi tơbăt dôm ŭnh hnam nhôn vei lăng lơ̆m tơdrong hơtŏk tơiung mŭk drăm kŭm nhen dôm trong jang tơgŭm đơ̆ng Đảng, khôi luơ̆t Teh đak. Pơtho kon pơlei tơplih đon hlôh vao kŭm nhen đon băt kơ dih lơ̆m tơplih ming ‘long pơtăm kon tơrong tơklep hăm Tơdrong krao hơvơn Pơm tơplih đon tơchĕng trong jang đơ̆ng kon pơlei kon kông, pơm ăn kon pơlei kon kông hơdrin yak tŏk klăih đơ̆ng dơnuh hin kơ jăp.”

Đăk Kôi jĭ xăh hơtăih hơtŏ kơ apŭng Kon Rẫy hăm akŏp kơ sô̆ kon pơlei vă jê̆ 3.400 ‘nu, lơ̆m noh bơngai Xơ Đăng đei truh 94%. Ƀok Trương Hồng Doanh, Bí thư anih jang Đảng xăh Đăk Kôi tơbăt, truh hơtuch sơnăm 2022 xăh oei đei truh 285 ŭnh hnam dơnuh hin đei kơ sô̆ hloh 34% ŭnh hnam kon pơlei. Tơ̆ hơnăp tơdrong yan âu ‘nâu Anih jang Đảng hơdrin tŭn pran Tơdrong krao hơvơn “Pơm tơplih đon tơchĕng, trong jang đơ̆ng kon pơlei kon kông, pơm ăn kon pơlei kon kông hơdrin yak tŏk klăih đơ̆ng dơnuh hin kơjăp”. Băt hơdăh hơnăp jang pơm jŭk yŭk trong hơlâu đơ̆ng đảng viên, Anih jang Đảng xăh Đăk Kôi klăih song hơnăp jang ăn kơ 15 Chi bộ păng mă hơdăh ‘noh trŭh 187 đảng viên kơ xăh, lơ̆m noh lăng kăl truh hơnăp jang pơm jŭk yŭk trong hơlâu đơ̆ng dôm đảng viên bơngai kon kông:

“Đảng bộ xăh dang ei jô̆ găh kơ sô̆ đảng viên ‘noh bơngai kon kông ‘noh đei tôch kơ lơ, hăm 156 đảng viên đei 83,42%. Hăm hơnăp jang ‘noh jĭ 1 đảng viên ‘noh đe đảng viên tơ̆ âu hơtŏk đei tơdrong iung jang, pơm jŭk yŭk trong hơlâu đơ̆ng bơngai đảng viên. Tơlĕch jang tơdrong krao hơvơn pơm tơplih đon tơchĕng, trong jang, pơm ăn kon pơlei kon kông hơdrin yak tŏk klăih đơ̆ng dơnuh hin kơjăp lơ̆m dôm sơnăm âu ki kiơ̆ đơ̆ng dôm đe đảng viên kơ dôm chi bộ tơring tơrang, mă kăl ‘noh jĭ đảng viên bơngai kon kông hlôi pơgơ̆r tơroi tơbăt krao hơvơn kon pơlei vang jang kiơ̆ ‘lơ̆ng”.

Păr ang Tơdrong krao hơvơn “ Pơm tơplih đon tơchĕng, trong jang đơ̆ng kon pơlei kon kông, pơm ăn kon pơlei kon kông hơdrin yak tŏk klăih đơ̆ng dơnih hin kơjăp” yua đơ̆ng Anih jang Đảng dêh char Kon Tum pơgơ̆r, Anih jang Đảng apŭng Kon Rẫy hlôi jang hơdăh ‘lơ̆ng tơdrong krao hơvơn păng đei lơ trong jang tơlĕch bơ̆jang kiơ̆. Tơ̆ 43 pơlei bơngai kon kông dôm đảng viên akŏm krao hơvơn, pơtho ŭnh hnam bơngai kon kông dơnuh hin păng vă jê̆ dơnuh hin iŏk yua jơ nei jên jang đơ̆ng ŭnh hnam, jên tŏk iŏk vă hơtŏk tơiung mŭk drăm; răt yua trŏ ƀlep vă mong răk jên tơmơ̆t dơ̆ng lơ̆m jang sa; tơroi găh dôm kơ loăi hơdrĕch, kon tơrong lăp; krao hơvơn ŭnh hnam bơngai kon kông choh hơmet ming pơgar lơ kơ loăi ‘long; vang jang dôm drŭp jang hơdai, hơp tak xăh pơtăm hla ‘long pơm pơgang, hơtŏk tơiung choh jang sa rơgoh... Ƀok Nguyễn Văn Thủy, Phŏ Kơdră Anih vei lăng kon pơlei apŭng Kon Rẫy, pơma hơdăh tơdrong krao hơvơn hlôi hơnhăk ăn iŏk yua rơđăh ‘lơ̆ng lơ̆m hơtŏk tơiung mŭk drăm - tơpôl kơ tơring:

“Kon pơlei hlôi đei tơplih lơ lơ̆m trong jang, lơ̆m iŏk yua khoa hŏk lơ̆m jang sa kŭm nhen vei rong kon tơrong pơm ăn tơdrong hơrih sa kon pơlei tơ̆ tơring tơring roi ‘năr roi tơplih ‘nao mă loi ‘noh jĭ bơngai kon kông. ‘Moi kiơ̆ tơdrong tơlĕch jang kiơ̆ dôm tơdrong jang sa, đang kơ ‘noh tơgep bơ̆jang kiơ̆ dôm tơdrong jang tơm teh đak ăn kon pơlei kon kông hlôi pơm đei dôm tơdrong tơplih tôch kơ rơđăh ‘lơ̆ng păng iŏk yua lơ̆m yan âu ‘noh tơdrong hơrih sa păng trong tơchĕng đơ̆ng kon pơlei kon kông hlôi đei dôm tơdrong tơplih tôch kơ rơ đăh ‘lơ̆ng.”

Kiơ̆ kơ ƀok Nguyễn Quang Thạch, Bí thư Anih jang Đảng apŭng Kon Rẫy, đơ̆ng rŏng hloh 2 sơnăm tơlĕch jang kiơ̆, Tơdrong krao hơvơn “Pơm tơplih đon tơchĕng, trong jang đơ̆ng kon pơlei kon kông, pơm ăn kon pơlei kon kông hơdrin yak tŏk klăih đơ̆ng dơnuh hin kơjăp” hlôi ƀrư̆ ƀrư̆ ƀơm ‘lơ̆ng truh đon hlôh vao đơ̆ng kon pơlei, hơnhăk ăn iŏk yua hơdăh ‘lơ̆ng. Đei hloh 30% ŭnh hnam bơngai kon kông dơnuh hin, vă jê̆ dơnuh hin lơ̆m apŭng tơplih đon tơchĕng, hŭt lê̆ tơdrong joăt ưh kơ ‘lơ̆ng, ưh kơ pơ mơ̆ng răp gô lơ̆m tơdrong tơgŭm đơ̆ng teh đak chă hơdrin kơ dih klăih đơ̆ng dơnuh hin kơjăp; hloh 39% kơ sô̆ ŭnh hnam băt iŏk yua khoa hŏk ki thuơ̆t lơ̆m jang sa, rơih iŏk hơdrĕch ‘long pơtăm, kon tơrong đei kơ jă mŭk drăm lơ, mă lăp; vă jê̆ 17% kơ sô̆ ŭnh hnam đei tơdrong hơrih sa, tơmam drăm, jơhngơ̆m đon đei tơplih ‘lơ̆ng đei kơ sô̆ iŏk yua lơ hloh jô̆ păh lăp đơ̆ng kon pơlei kon kông lơ̆m apŭng.

Hơtŏk jơnei iŏk đei vă Tơdrong krao hơvơn “Pơm tơplih đon tơchĕng, trong jang đơ̆ng kon pơlei kon kông, pơm ăn kon pơlei kon kông hơdrin yak tŏk klăih đơ̆ng dơnuh hin kơjăp” yak mơ̆t jrŭ, đei yua, ‘lơ̆ng, Anih jang Đảng apŭng Kon Rẫy băt hơdăh 1 lơ̆m dôm trong jang gĭt kăl ‘noh jĭ hơnơ̆ng hơtŏk ‘lơ̆ng hơnăp jang, jang tơnăp đơ̆ng kơdră đảng vei lăng chi bộ, đảng viên vei lăng ŭnh hnam grŭp ŭnh hnam păng bơngai đei đe lui yom, hơgei lơ̆m tơpôl.