Thôn 4, tơring Phước Cát 2 hơtăih kơ apŭng Cát Tiên 40km, hăm vă jê̆ 50 ŭnh hnam, 160 ‘nu bơngai ‘noh jei bơngai kon kông ngăl. Jĭ mĭnh ‘nu kon hơ ‘lơ̆p kơ pơlei, đảng viên Điểu K’Điệp ling lang pơngơ̆t trŭh dôm tơdrong tơnap tap, hrat hrĭn lơ̆m hơrih sa păng jang sa kơ kon pơlei. Đơ̆ng sơnăm 2016, mư̆h vang jang lơ̆m Khul bơ̆ jang măt trân thôn 4, ‘nhŏng hlôi jang ‘lơ̆ng hơnăp jang gơng tơroh kloh klĕch ƀar păh khul kơdră chĕp pơgơ̆r Đảng, kơdră chĕp pơgơ̆r tơring păng kon pơlei, lăng truh tơdrong tơ iung pơjing hơrih sa ‘lơ̆ng rŏ hơbŏ nhen hloh dơ̆ng.

Mă hơdăh, Điểu K’Điệp hlôi atŭm hăm kang ƀô̆ lơ̆m pơlei pơgơ̆r hop akŏm, pơrô̆ pơrôp truh rim ŭnh hnam vă tơroi tơbăt dôm trong bơ̆ jang đơ̆ng Đảng, Khôi luơ̆t Teh đak vă kon pơlei băt păng pơm kiơ̆. Adoi tơchă băt jơhngơ̆m đon hơpơi ‘meh vă đơ̆ng kon pơlei vă tơroi tơbăt ăn kơdră tơring. Điểu K’Điệp tơbăt, ‘meh vă kon pơlei lui yom păng pơm kiơ̆ bơ̆n ‘nŏh bơ̆n kăl pơm jŭk yuk trong hơlau ‘mơ̆i.“Ba chă pơtho khan ăn kon pơlei hơdrin jang sa, tơplih ‘long pơtăm kon tơrong. Nhen ‘long găr sơlơk, tơdăh kră krŭt ‘nŏh bơ̆n koh pơtăm ming, mă lei ưh kơ gơ̆h chă koh rô̆ pơtăm ming đĭ đăng hloi. Tơdăh lơ̆m 1 ha bơ̆n koh rŏ pơtăm ming dang 1 sao đĕch, tơdăh rô̆ pơtăm ‘nao pơđĭ lei vă iŏk yă kiơ đei dơ̆ng. Đơ̆ng noh găh chŭn na ƀa đak jei lei lăi, ‘nŏh pơtho khan ăn kon pơlei tơnăp năm lăng chŭn na hăm đei bơ̆n sơdrông yă kiơ pơrăm ưh vă tơtom hơmet pơ ‘lơ̆ng. Găh tơdrong tang găn tơpŭ hơ ‘lơ̆p lơ ‘noh ba pơtho khan ăn kon pơlei băt trong tang găn hơlau, tơpŭ hơnhơl kon hơ ‘lơ̆p đơ̆ng 1 truh 2 ‘nu hơ ‘lơ̆p đĕch, ưh kơ gơ̆h hơnhơl kon mă pêng”.

Tơplih jơhngơ̆m đon đơ̆ng dôm tơdrong jang iĕ, tơdrong hơrih sa kơ kon pơlei kon kông oei tơ̆ thôn 4, tơring Phước Cát 2 hlôi đei tơplih hơ iă, rim tơdrong oei sa joăt joe đơ̆ng sơ̆ pă trŏ lăp ‘nŏh hlôi hŭt. Dang ei ŭnh hnam ayơ jei hơdrin jang sa, jang kiơ̆ khoa hŏk kih thuơ̆t lơ̆m choh jang sa. Pơlei pơla jei roi năr roi tơplih ‘nao. Rim jăl trong gơglơng gơglang, ŭnh hnam ayơ jei rơgoh ‘lơ̆ng, hơdroong kon tơrong chă pơm rơgoh ‘lơ̆ng…

Mŭk drăm sơđơ̆ng, kon pơlei hơmet ming, vei răk tơƀăk mong dôm tơdrong oei sa joăt joe ‘lơ̆ng rŏ hơbŏ nhen kơ hơdrĕch hơdrung kơdih. Rim khul tôn chĭng chêng, hơsoang, khul tĕh ƀŏng lŏng drŏ nglo păng drŏ kăn kơ thôn 4 vang pơgơ̆r ‘lơ̆ng păng năm pơlong đei iŏk jơnei tơ̆ rim ‘măng pơlong kơ tơring, apŭng pơgơ̆r. Điểu K’Điệp tơroi: “Kon pơlei tơ̆ au khul tôn chĭng chêng jei đei, khul hơssoang jei đei; chă tanh broong jak dơ̆ng, oei đei lơ bơngai băt chă tanh broong jak. Ba chă pơrô̆ pơrôp athei kon pơlei ‘nĕ kơ hŭt, kăl vei răk. Tơdrong joăt joe kơ bơ̆n nĕ, kơna kăl vei răk tơƀăk mong mă gei”.

Kiơ̆ đơ̆ng ƀok Đường Bình Độ, Kơdră chĕp pơgơ̆r Hơnih bơ̆ jang MTTQ tơring Phước Cát 2, thôn 4 ‘noh pơlei hơtăih yăih, trong nơnăm mơmat tat, tơdrong oei sa oei mơmat tat. Dang ei pơlei hlôi tơplih ‘nao, atŏk tơ iung sơđơ̆ng tôm tơdrong, lơ̆m au mă kăl hloh ‘noh tơ iung pơjing tơring tơrang ‘nao păng tơjur dơnuh kơjăp ‘lơ̆ng. Kon pơlei hlôi băt hơdrin tơ iung pơjing hơrih sa phĭ tơtŏ dơnŏ ‘lơ̆ng dơ̆ng kơjăp. Tơdrong iŏk đei jơnei au đei tơdrong tơgop tôch kơtang đơ̆ng đảng viên sơnăm mơlôh Điểu K’Điệp, Kơdră chĕp pơgơ̆r Khul bơ̆ jang măt trân thôn 4:“Pơrô̆ pơrôp, pơtho khan ăn kon pơlei pơm kiơ̆ kơjăp rim trong bơ̆ jang đơ̆ng Teh đak ‘noh tôch kơ ‘lơ̆ng. Găh atŏk tơ iung mŭk drăm ‘noh lơ̆m dôm sơnăm au ki kon pơlei oei tơ̆ thôn 4 hơdrin pơnam jang sa, tơdrong hơrih sa kơ kon pơlei roi năr roi atŏk tơ iung, bơ̆ jang vei lăng kon kông jei atŏk tơ iung tơnăp. Lơ̆m dôm sơnăm au ki, kơ dih ‘nhŏng Điểu K’Điệp hơnơ̆ng kơrŭn đĭ jơhngơ̆m chă pơrô̆ pơtho khan ăn kon pơlei jang kiơ̆ ‘lơ̆ng găh rim tơdrong jang, nhen tơdrong jang tơ iung pơjing tơring tơrang ‘nao atŭm hăm rim tơdrong jang kơ yuơ tơring păng apŭng tơlĕch ăn”.

Hăm dôm tơdrong tơgop kơtang lơ̆m tơ iung pơjing pơlei pơla, Điểu K’Điệp hlôi đei Hơnih bơ̆ jang MTTQ Việt Nam dêh char Lâm Đồng pôk pơ ư păng pôk ăn hla bơar bơnê ‘nŏh Kơdră chĕp pơgơ̆r khul bơ̆ jang măt trân tơring kon kông gơ̆h hơgei jăl jang 2016 - 2021.