Ƀok Y Dẫn Êban (hơdrung Ê Đê) ‘noh đảng viên lơ̆m Chi ƀô̆ thôn Đoàn Thành 2, tơring Hòa Đông, apŭng Krông Pach, dêh char Dak Lăk. Têt au ki, ŭnh hnam tôch chơt hơ iă gơnơm rim ‘long pơtăm plei ăl, hăm kơjă măt păng mă kăl đei sơng iŏk kon jên hrŭ ăn tôch kơ lơ ‘noh 3 ti 400 triu hlak jên plang ăn teh pơm trong Gre rĕnh Khánh Hòa – Buôn Ma Thuột. Đơ̆ng kon jên au, ƀok tơlĕch 500 triu hlak jên răt gre ôtô tơgŭm ăn chă yak, hloh 2 ti 900 triu hlak jên uơ oei ‘nŏh tơmơ̆t jang 2ha teh pơtăm chehphe hăm sâu riêng. Tơdrong răt gre păng tơmơ̆t jên jang mir pơgar hlôi đei ŭnh hnam hơlen tôch kơ brĕ păng drơ̆ng mĭnh nơ̆r kơtang mưh băt teh hăm ‘long pơtăm đei teh đak iŏk tơvih tơgŭm ăn ming man trong. Đảng viên Y Dẫn tơroi: “Ŭnh hnam nhôn đei  8 sao 4 tĕh pơtăm chehphe, sâu riêng, tiu păng mĭnh ƀar ‘long sa plei, jang sa iŏk đei lơ̆m sơnăm truh 300 triu hlak jên. Mư̆h đei kơdră kơpal tơlĕch jang lơ̆m sơnăm 2021, ba ‘noh jĭ bơngai đảng viên, păng rim bơngai lơ̆m ŭnh hnam jei đảng viên mơ̆n kơna tôch lăp đon păng tơgŭm jru trong tơlĕch jang pơm trong nơnăm đơ̆ng Teh đak, nhôn jô̆ hơlen bơ̆n ‘long au to păng đei teh đak hrŭ ăn, ‘meh vă akhan, ning nai kai ning mônh kơnh đei trong chă yơ yak hiôk hian hloh, tĕch mơdro tơmam drăm hiôk hian hloh”.

Ŭnh hnam đảng viên Y Ngắt Niê oei tơ̆ tơring Ea Yông, apŭng Krông Pach jei đei hloh 500m2 teh păng 70 dơnơm chehphe lơ̆m găh groi teh vă iŏk pơm trong gre rĕnh Khánh Hòa – Buôn Ma Thuột. ‘Nhŏng tơbăt, đơ̆ng teh păng ‘long pơtăm au, ŭnh hnam iŏk đei 120 triu hlak jên hrŭ ăn. Đĭ đăng kon jên au đei tơmơ̆t lơ̆m choh jang sa, tơplih ‘nao pơbŭng gŏch hnam pơtăm. Ŭnh hnam jei jing mĭnh lơ̆m dôm ŭnh hnam yŭk trong hơlau tơ̆ tơring Ea Yông pơm kiơ̆ kơ jăp tơdrong chă jô̆ hơlen, pơtŏ hơgăt teh păng drơ̆ng nơ̆r kiơ̆ tơdrong pơkăp hrŭ ăn, hrôih pơjao ăn teh. Đảng viên Y Ngắt pơma: “Đei kơdră kơpal krao hơvơn pơjao teh vă tơ iung pơjing trong gre rĕnh Khánh Hòa – Buôn Ma Thuột ‘nŏh ŭnh hnam nhôn jei drơ̆ng nơ̆r hloi, drơ̆ng iŏk kon jên hrŭ ăn teh, ‘long pơtăm. Ba jĭ bơngai đảng viên kơna ba kăl pơm jŭk yŭk trong hơlau vă kon pơlei kiơ̆ yok rok jơ̆ng vă đei trong ‘lơ̆ng, chă yơ yak hiôk hian tơ̆ hơnô̆ hơnăp kơnh. Ba jei krao hơvơn kon pơlei koeng ƀôt đei teh iŏk tơvih vă pơm trong grung au tĕnh koăng drơ̆ng nơ̆r hăm kon jên hrŭ ăn păng pơjao teh păng đe sư jei tôch chhôk hơ iă, drơ̆ng nơ̆r pơjao teh, sơng iŏk kon jên hrŭ ăn”.

Tơdrong vă jang pơm trong gre rĕnh Khánh Hòa – Buôn Ma Thuột, jăl 1 gan hloh apŭng Krông Pach hơtăih 33,3km, hơgăt teh iŏk tơvih vă pơm trong ‘noh 255 ha. Hloh 2.000 ŭnh hnam kon pơlei găh 8 tơring đei teh hrŭ ăn. Hơnih vei lăng kon pơlei apŭng hlôi iung jang 9 ‘măng hrŭ ăn, akŏp kon jên hloh 344 ti hlak jên. Đĭ đăng hơgăt teh iŏk tơvih vă pơm trong lơ̆m apŭng hlôi đei pơjao ăn rim hơnih ming man tơlĕch jang ming man trong. 

Kiơ̆ đơ̆ng ƀok Phạm Văn Hà - Kơ iĕng kơdră chĕp pơgơ̆r Hơnih vei lăng kon pơlei tơring Hoà Đông, teh tơ̆ lơ̆m apŭng Krông Pach pơma atŭm păng tơring Hoà Đông pơma hơdrô̆ găh să ‘nŏh teh gôh, tôch kơ lăp ăn pơtăm chehphe, tiu, mă kăl sâu riêng hơnhăk đei iŏk yua kơjăp. Lơ̆m 1ha jang sa iŏk đei đơ̆ng 800 - 1 ti 200 triu hlak jên lơ̆m 1 sơnăm. Mă đơ̆ng tơdrong jang sa iŏk yua lơ, mă lei mưh đei trong tơlĕch jang đơ̆ng teh đak iŏk tơvih teh tơgŭm ăn ming man trong grung rĕnh, kon pơlei drơ̆ng nơ̆r tơgŭm djru hloi, pơm jŭk yŭk trong hơlau ‘nŏh rim bơngai đảng viên, lơ̆m au đei lơ đảng viên bơngai kon kông lơ̆m tơring. Ƀok Phạm Văn Hà pơma:  “Lơ̆m 152 ŭnh hnam tơ̆ tơring Hòa Đông đei teh trong grung rĕnh găn hloh ‘noh đei vă jê̆ mĭnh poăt ŭnh hnam ‘noh bơngai kon kông, păng đei lơ ŭnh hnam ‘noh bơngai kang ƀô̆, đảng viên. Lăng atŭm rim ŭnh hnam kang ƀô̆, đảng viên jei pơm jŭk yŭk trong hơlau lơ̆m pơjao teh vă tơgŭm ăn ming man trong grung. Mă kăl nhen ŭnh hnam ƀok Y Dẫn, ŭnh hnam au đei hơgăt teh pơjao ăn vă jê̆ 1ha, tôch tơnăp tơgŭm ăn jang chă jô̆ hơlen ‘long pơtăm, hơgăt teh, sơng iŏk kon jên hrŭ ăn. Rim đảng viên anai jei lei lăi.”

          Hăm trong jang “đảng viên pơm jŭk yŭk trong hơlau, kon pơlei druh kiơ̆ đơ̆ng rŏng” đơ̆ng rim đảng viên tơ̆ tơring Hòa Đông păng Ea Yông găh apŭng Krông Pach, dêh char Dak Lăk, bơ̆ jang iŏk tơvih teh, pơjao teh ăn rim hơnih ming man trong gre rĕnh Khánh Hòa - Buôn Ma Thuột hlôi đei tơlĕch jang kiơ̆ hrôih pơtêng hăm rim apŭng anai tơ̆ dêh char Dak Lăk.