Kŭm hăm tơdrong vei lăng, pơtho pơhrăm ăn hă si kuan vei lăng, trung cấp, cao đẳng, đăi hŏk găh khul linh tơ̆ tơring, pơtho dơ̆ng găh tơdrong vei lăng sơđơ̆ng teh đak ăn khul bơngai chĕp kơ̆l anih jang.., Hnam trưng khul linh Quân khu 1 oei đei pơjao jang hơdoi hăm Hnam hŏk Chinh trĭ vei lăng lăm pơtho tŏ sĕt khei ‘năr ăn kăn ƀô̆ chinh trĭ khul trung, sư đoàn, pơtho jăl 1, si kuan kơpal hŏk đăi hŏk tơ̆ Hnam hŏk Quân y. Mưh vang hŏk pơhrăm, dôm bơngai kiơ̆ hŏk đei hơtŏk ƀiơ̆ đon hlôh vao, tơmât yoa ‘lơ̆ng tơ̆ yăn âu lơ̆m anih jang, tơring oei bơ̆ jang.

Ƀok Lý Ngọc Minh, Yŏng vei lăng Khul kơdră pơgơ̆r khul linh phường Vĩnh Trại, plt Lạng Sơn oei kiơ̆ hŏk tơ̆ lăm hŏk tơrih đơ̆ng cao đẳng tŏk tơ̆ đăi hŏk găh Khul linh tơ̆ tơring, ăn tơbăt: “Mưh hŏk ‘nŏh đei roi tơƀôh lơ tơdrong ‘nao đơ̆ng đe ƀok thây, inh ƀôh tôch đei yoa, hơmet ăn đe kăn ƀô̆ đei đon jang tơnăp ‘lơ̆ng, gơ̆h hơgei. Găh đon tơchĕng vă tơmât lơ̆m tơdrong jang kŭm roi đei yoa ƀiơ̆ kơ adrol inh năm hŏk ki”.

Vă hơtŏk tơdrong đei yoa ‘lơ̆ng đơ̆ng pơtho pơhrăm, Khul vei lăng Hnam trưng khul linh Quân khu 1 tơlĕch lơ tơdrong pơjei băl “Mât mĭnh ƀơ̆r đon, tơnăp ‘lơ̆ng, gơ̆h hơgei, khŏm jang keh”, “Mât mĭnh ƀơ̆r đon ‘lơ̆ng, tơpăt, pơjei băl bơ̆ jang khŏm đei”... Kiơ̆ đơ̆ng nŏh tưk tơiung đei jơhngâm đon hưch hanh, pơtho ăn đe kăn ƀô̆, thây kô, bơngai hŏk ‘mêm băl, gơ̆h hơgei, tơplih ‘nao, đei lơ trong jang hơiă, pơchĕh đei ki thuơ̆t ‘lơ̆ng vă pơih xă. Tơ̆ tơdrong pơjei kăn ƀô̆ vei lăng, pơtâp pơhrăm rơgei, thây kô pơtho rơgei sơnăm 2023 hnam trưng đei 57 ‘nu thây kô rơgei tơ̆ khoa, 31 ‘nu kăn ƀô̆ rơgei tơ̆ tiểu đoàn, 44 ‘nu bơngai rơgei lơ̆m hnam trưng. Lơ̆m dôm sơnăm âu ki, hnam trưng vang mơ̆ng, hơlen năng 01 Tơdrong tơchĕng hơlen, 02 tơdrong pơcheh rơgei găh ki thuơ̆t, 03 blăh hla ar pơtho tơ̆ anih jang, 01 tơdrong tơchĕng hơlen, 01 tơdrong pơcheh tơ̆ Quân khu; 04 tơdrong pơchĕh hơmet pơ ‘lơ̆ng ki thuơ̆t tơ̆ hnam trưng păng đei Quân khu athei pôk hơpăh 01 tơdrong pơchĕh tơ̆ Anih tơm vei lăng khul linh teh đak.

Thiếu tá Phạm Tuấn Việt, thây pơtho Khoa Binh chủng, Hnam trưng khul linh Quân khu 1 hăm tơdrong tơchĕng khoa hŏk kơmăy pơdơ̆ng phao kơnong kơjăp ‘lơ̆ng, tơroi:“Tơdrong pơchĕh ‘nâu vă hơmet ming dôm tơdrong tam mă ‘lơ̆ng. Ƀât mă tam mă đei tơmam pơm dơnơ̆ng, đe ƀô̆ đô̆i athei iok ‘nhik kơ ƀênh vă sir sơlung pơm jơ̆ng dơ̆ng kơjăp. Mưh teh rơmuăn ‘nŏh kŭm tôch pơmat tat, vă pơm ăn kơnong dơ̆ng ‘lơ̆ng athei hiong 2 pơnit. Mưh tơmât yoa tơdrong pơchĕh ‘nâu ‘nŏh lăp hiong đơ̆ng 10-15 giây đĕch”.

Vă pơm lăp hăm tơdrong pơtho pơhrăm găh tơdrong jang Đảng, chinh trĭ lơ̆m chăl ‘nao, Hnam trưng khul linh Quân khu 1 hlôi chih pơjing lơ Hla ar pơtho ‘moi kiơ̆ rim nơ̆r pơtho, jang kiơ̆ tơdrong pơgơ̆r pơtâp pơhrăm vă pơm lăp hăm rim tơdrong lơ̆m chăl ‘nao. Đại tá Dương Xuân Thủy, chĕp kơ̆l lăm hŏk Khoa hŏk tơpôl păng tơdrong ‘lơ̆ng, Hnam trưng khul linh Quân khu 1, ăn tơbăt: “Hnam trưng pơtho tơdrong jang Đảng, tơdrong jang chinh trĭ tơklep hăm yăn âu, ‘nâu jĭ môn mă bơngai hŏk đơ̆ng rŏng kơnh gô jang kiơ̆, hơmet tơdrong hlôh vao ăn đe sư. Môn ‘nâu hŏk đang, hăm hơnăp jang đơ̆ng đe sư ning mônh kơnh gơ̆h tơlĕch jang kiơ̆ hloi. Pơtih gia hăm hơnăp jang pơm Bơngai vei lăng chinh trĭ, bí thư chi ƀô̆, bí thư đoàn nhôn pơtho tơƀôh rim tơdrong đei tơ̆ yăn âu mă đe sư athei bơ̆ jang, nhen trong pơgơ̆r hŏk hôp chi ƀô̆, pơgơ̆r hŏk hôp đe druh dăm, dăh mă trong roi tơbăt, nhôn hơnơ̆ng ‘moi kiơ̆ tơdrong đei tơ̆ yăn âu vă đe sư jang kiơ̆.”

Bơ̆ jang tơdrong tơchơ̆t kơsô̆ 1657 đơ̆ng Quân ủy Trung ương, Tơdrong tơchơ̆t kơsô̆ 20 đơ̆ng Anih chĕp kơ̆l Đảng Quân khu găh tơplih ‘nao tơdrong pơtho pơhrăm pơm lăp hăm tơdrong jang tơiung pơjing khul linh lơ̆m chăl ‘nao păng hơtŏk tơdrong rơgei ‘lơ̆ng mưh pơtâp pơhrăm, Hnam trưng khul linh Quân khu 1 bơ̆ jang lơ trong jang tôch hơiă vă jang đang ‘lơ̆ng tơdrong jang đei pơjao hăm trong jang Pơjing Hnam trưng pran kơjăp tôm tơdrong “‘lơ̆ng hơiă, gơ̆h hơgei” tơgop ăn tơdrong jang tơiung pơjing păng vei lăng teh đak Việt Nam xã hội chủ nghĩa lơ̆m chăl ‘nao.

Đại tá Đào Văn Minh, Phŏ Hiê̆u trơng Hnam trưng khul linh Quân khu 1, ăn tơbăt: “Lơ̆m khei ‘năr pơtho pơhrăm ưh lăp găh đon hlôh vao đĕch mă đei hloi tơdrong tơnăp, hơbĕch hơbal đơ̆ng rim bơngai hai. Rim sơnăm nhôn hơnơ̆ng chă dăr lăng tơdrong gơ̆h hơgei đơ̆ng bơngai hŏk mưh hŏk đang, hŏk pơm tiểu đội trưởng 3- 5 khei, mưh hŏk đang ‘nŏh đon tơnăp, bơ̆ jang gơ̆h ƀiơ̆ tơpă pơting hăm dôm bơngai ưh đei hŏk. Si kuan dự bị đơ̆ng dôm Anih jang Đảng đơ̆ng rŏng kơ hŏk tơ̆ hnam trưng brŏk bơ̆ jang, đơ̆ng apŭng tŏk tơ̆ kơpal ‘nŏh đon jang tơnăp ‘lơ̆ng, pha ƀiơ̆ tơpă.”

 Lơ̆m jơhngâm đon hăt pơjei băl hơiă kơ ‘măng tơbăt năr khul linh tơblăh kơ Quân khu 1, tơbăt 80 sơnăm Năr pơjing khul linh kon pơlei Việt Nam vei kơjăp tưk tơiung dôm tơdrong jang đei, khul chĕp kơ̆l Đảng, Khul vei lăng Hnam trưng khul linh Quân khu 1 vă hơnơ̆ng hơtŏk tơdrong pơjei băl lơ̆m tơdrong pơtho pơhrăm, hơtŏk jơhngâm đon ‘mêm kơ teh đak, đon adrin đơ̆ng kơdih, plang jơhngâm đon rơgei, jang kĕh đang ‘lơ̆ng tơdrong jang đei pơjao.