Rim kơdră kơpal so sơ̆ kơ Đảng, Jơnŭm pơgơ̆r teh đak, Măt trâ̆n tôh kuôk Việt Nam hlôi yak tăp dăr bong ‘măn hơkâu ƀok, ơh sơ-‘ngon tơklah hơchăng hăm Tổng Bí thư Nguyễn Phú Trọng – Kơdră gơh hơgei, minh um ai ang hơdah gah hŏk pơhrăm păng pơm kiơ̆ đon bơnôh trong jang ‘lơ̆ng Hồ Chí Minh, bơngai đảng viên cộng sản nuih kơtang, đei đon lui tih kơ Đảng, Jơnŭm pơgơ̆r teh đak păng kon pơlei bơ̆n, đei tôm đon bơnôh dơnưp, trong jang tơnăp, gơh hơgei kơ chăl kơdră Việt Nam lơ̆m khei năr jang tơplih ‘nao. Hăm đon ‘mêm băt, bơngai jang lơ̆m Anih tơm Chĭnh trĭ, Kơdră teh đak bơ̆n Tô Lâm chih lơ̆m kơsơ̆p hla bar tơƀlŏk: “Ling lang ‘mêm băt kơ Ƀok Tổng Bí thư Nguyễn Phú Trọng – Bơngai kon ‘mêm kơ-eng kơ kon pơlei Việt Nam, Bơngai kơdră gơh hơgei hloh, bơngai đảng viên cộng sản nuih kơtang, minh um ai ang hơdah hơnơ̆ng hŏk pơhrăm păng yak kiơ̆ đon bơnôh trong jang ‘lơ̆ng Hồ Chí Minh, đei tơchĕng tih kơ Đảng, Jơnŭm pơgơ̆r teh đak păng Kon pơlei bơ̆n, bơngai boăl tih tên kơ Kon pơlei lơ̆m kơpal teh; bơngai akŏm đĭ jơhnơr hơrih tơnăp plang ăn teh đak, ăn kơ Đảng, ăn Kon pơlei; đei lơ tơdrong tơgop plang tih tên ăn tơdrong jang kăch mạng kơ Đảng păng kon pơlei, ăn tơdrong jang cộng sản apŭng plenh teh păng pơtoi vei sơđơ̆ng rơngei hiôk hian, hơtŏk sơđơ̆ng, hơtŏk tơ-iung lơ̆m tơring păng lơ̆m apŭng plenh teh. Kŭp yom grê dơh po sơkơ̆t hăm ƀok, nhôn pơkăp hŏk pơhrăm păng pơm ƀoi đon bơnôh trong jang ƀok, dăpd don dăp bơnôh pơm jang ăn teh đak, pơm jang ăn kon pơlei, tơguăt tơguăl pôm nơ̆r ƀơ̆r đon pơm jang đei jơnei tơchơ̆t tơ-iung pơjing teh đak Việt Nam rơngei hiôk hian, pơdrŏng pran kơtang, jơnap sô̆ sôn mă ƀok hlôi rơih păng akŏm pơm jang đĭ jơhnơr hơrih”.

Lơ̆m pơgê năr 25/7, lơ khul tang măt ăn teh đak đe, rim anih jang tơm, rim dêh char, pơlei tơm lơ̆m jơ̆p teh đak truh pơjôk Nhap Ƀok Tổng Bí thư Nguyễn Phú Trọng păng pơtruh nơ̆r ol sơ-‘ngon hăm unh hnam.