Anih pơtho pơhrăm dêh char Đắk Nông sơnăm hŏk ‘nâu ưh măh 1.545 ‘nu thây kô, oei anih jang pơgang dêh char dang ei oei ưh kơmăh 664 ƀiên chê̆. Kơsô̆ bơngai jang ưh kơmăh âu tŏk hơnơ̆ng lơ̆m lơ sơnăm păng roi đunh roi lơ. Mă đơ̆ng dêh char tôch kơchăng jang kiơ̆ Tơdrong hơgăt 111 sơnăm 2022 đơ̆ng Khul kơdră teh đak vă pơm Hla ar pơkăp jang hăm 643 ‘nu bơngai bơih ră mă lei tam mă pơm lăp hăm tơdrong ‘mĕh vă đơ̆ng anih pơtho pơhrăm păng jang pơgang ‘mơ̆i, mă loi ‘nŏh hăm tơring hơtăih yăih, tơring kon kông.

Ƀok Lê Văn Chiến, Phŏ Kơdră chĕp kơ̆l Anih vei lăng kon pơlei dêh char Đắk Nông ăn tơbăt, đei lơ tơdrong ưh lăp mưh pơjao ƀiên chê̆ ăn anih pơtho pơhrăm păng jang pơgang hăm 1,2 dêh char groi kông, đei kơsô̆ kon pơlei truh oei xa tŏk hrĕnh păng kon pơlei oei xa răh rai nhen tơ̆ dêh char. Kơsô̆ ƀiên chê̆ đei pơjao tŏ sĕt ƀiơ̆ kơsô̆ athei kăt tơjur bơngai jang rim sơnăm, jing pơm ăn 2 anih jang gĭt kăl âu đĭ ưh kơmăh bơngai jang bơih, mă roi đunh roi dêh hlŏh dơ̆ng.