Tơ̆ jơ sơng, tang măt ăn Hơnih Đảng, khul kơdră chĕp pơgơ̆r păng Kon pơlei dêh char Gia Lai, ƀok Hồ Văn Nên, Ƀĭ thư Đảng dêh char hlôi hmach bơnê chơt hơ iă tơ̆ hơnăp tơdrong iŏk đei jơnei kơ ‘măng pôk rơ̆ih Kuô̆k hô̆i Campuchia jăl 7, hmach chơt hơ iă ăn teh đak đei Khul kơdră chĕp pơgơ̆r ‘nao kơ yuơ Thủ tướng Hun Manet chĕp kơ̆l; adoi hơpơi ‘meh vă Khul kơdră ‘nao gô atŭm hăm Đảng păng Kon pơlei Campuchia hơnơ̆ng tơ iung pơjing teh đak roi năr roi pran kơtang, pơdrŏng hơnŭk hơnoa; vang kơrŭn jơhngơ̆m đon tơ iung pơjing tơgoăt tơgoăl ‘lơ̆ng rŏ hơbŏ nhen ƀar păh Việt Nam-Campuchia pơma atŭm păng Gia Lai-Ratanakiri pơma hơdrô̆ roi năr roi kơjăp iăp kơtang hloh dơ̆ng.

Kơ iĕng kơdră chĕp pơgơ̆r dêh char Ratanakiri ‘meh vă dêh char Gia Lai hơnơ̆ng tơgum djru jang hơdoi ƀar păh kơ 2 tơring, hơnơ̆ng pơjing rơvơn ăn kon pơlei, hơnih mơdro sa ƀar păh đei jơ chă pơma dơnuh hŏk pơhrăm dih băl trong jang hơ iă lơ̆m atŏk tơ iung mŭk drăm, mơdro sa, chă yak vih vơ̆t, tĕch mơdro tơmam drăm kơ kon pơlei, hơnih mơdro sa.