Hăm hơgăt teh bri brăh hrei au đei hloh 547.700ha atŭm hăm hloh 61.000ha bri ‘long pơtăm, tơ̆ lơ tơring lơ̆m dêh char Kon Tum khei năr au hlôi đei ƀô̆h tơdrong tŏ pơđang, hơmơt pơm ăn ƀônh đei ŭnh sa bri.

Tơ̆ hơnăp tơdrong au, Hơnih vei lăng kon pơlei dêh char Kon Tum hlôi pơrô̆ athei hơtŏk kơtang rim trong jang hăt hot vă tang găn hơlau, pĭt ŭnh sa. Kiơ̆ kơ ‘noh, Hơnih vei lăng kon pơlei dêh char Kon Tum athei rim kơdră chĕp pơgơ̆r rim hơnih jang, khul kŏng ang, ƀô̆ đô̆i, hơnih mơdro sa pơtăm ‘long ksu lơ̆m hơgăt teh bri jang sa păng rim hơnih tơ-‘ngla bri năm dăr lăng, lăng hơlen trong jang tang găn ŭnh sa, pĭt ŭnh sa; hơmet pơ ‘lơ̆ng khul jang, gre kmăi kmŏk tôm tong trŏ lăp ăn dôm tơdrong hơmơt đei ŭnh sa; hơmet kon jên jang tơring păng rim kon jên trŏ lăp anai vă pơm sơđơ̆ng ăn jang kiơ̆ ‘lơ̆ng tơdrong jang tang găn ŭnh sa, pĭt ŭnh sa kiơ̆ trong “puăn kơtă”; sơkơ̆t hơdăh rim tơring kăl hơmơt đei ŭnh sa bri kơtang vă pơprŏ khul jang, gre kmăi kmŏk sơđơ̆ng ăn jang tang găn păng hơmet pơ ‘lơ̆ng rim ‘măng ŭnh sa bri; pơgơ̆r pơjao gak vei lăng năng tông lơ̆m prăt pơyan phang…