Dêh char Kon Tum păng dêh char Attapư đei atŭm trong sơlam kơ jung hloh 75 km hăm teh bri tơring tơtil sơlam să dang 39.000hek tar. Bri tơ̆ tơring âu hơnih krê hơmơt, hơtăih kơ anih kon pơlei oei, lơ̆m bri đei lơ sem tơrong, ‘long đei kơ jă kăp gĭt kơna ling lang krê hơmơt kơ đei ƀôh dôm tơdrong pơm glăi găh tơdrong jang vei lăng bri. Jăl jang 2024- 2025, Anih vei lăng găh Choh jang păng Hơtŏk tơiung tơring tơrang dêh char Kon Tum păng Anih vei lăng găh choh jang sa bri ‘long dêh char Attapư drơ̆ng nơ̆r hơnơ̆ng hơtŏk loi dơ̆ng tơdrong jang hơdai, pơma dơnuh roi tơbăt ăn băl, tơdrong hôh vao vă vei lăng, tang găn dôm tơdrong pơm glăi lơ̆m tơdrong jang bri ‘long; jang hơdai găh tang găn ŭnh sa pĭt ŭnh sa bri tơ̆ tơ ter jih sơlam găh 2 dêh char.

Đei băt đơ̆ng sơnăm 2016, Anih vei lăng găh Choh jang păng Hơtŏk tơiung tơring tơrang dêh char Kon Tum păng Anih vei lăng găh choh jang sa bri ‘long dêh char Attapư hlôi pơtơm jang hơdai găh vei lăng bri tơ̆ tơring sơlam teh đak trong klĕch 2 dêh char. Lăp jô̆ hơdrô̆ jăl jang  2019- 2023, khŭl lĭnh vei lăng bri ‘long dêh char Kon Tum hlôi bơ̆jang vă jê̆ 600 ‘măng dăr joang, chă ƀôh 35 ‘măng pơm glăi Luơ̆t bri ‘long. Khŭl lĭnh kơpal dêh char Attapư kŭm pơgơ̆r 79 ‘măng dăr joang, chă druh rôp, thu iŏk hloh 48 m3 ‘long, 1 kơ sô̆ sem tơrong păng lơ tơmam ‘long nai hai.