Dêh char Kon Tum păng Ratanakiri (Campuchia) kĭ pơkăp hơtŏk tơdrong jang hơdoi đơ̆ng 2023- 2028
Thứ sáu, 09:32, 20/10/2023
VOV Tây Nguyên/Dơ̆ng tơblơ̆
VOV Tây Nguyên/Dơ̆ng tơblơ̆
VOV4.Bahnar - Vă hơtŏk tơdrong jang hơdoi vang jang tŏk pran ‘lơ̆ng, pơgê brei (19/10), tơ̆ plt Kon Tum, Khul tang măt ăn dêh char Kon Tum păng Khul tang măt ăn dêh char Ratanakiri, tĕh đak Campuchia pơgơ̆r Hop akŏm roi tơbăt găh tơdrong jang mŭk drăm, tơpôl tơ̆ rim dêh char, hơlen năng dôm tơdrong jang đei đơ̆ng jang hơdoi kơ 2 dêh char khei ‘năr âu ki, tơlĕch trong jang hơdoi tơ̆ hơnăp kơnh păng kĭ hla ar pơkăp Hơtŏk tơdrong pơvei, jang hơdoi đơ̆ng 2 dêh char đơ̆ng 2023- 2028.
Pơma tơ̆ jơ bơ̆ jang, ƀok Dương Văn Trang, Kơdră jang lơ̆m Trung ương Đảng, Bí thư đảng dêh char, Kơdră Jơnŭm pơgơ̆r kon pơlei dêh char Kon Tum pơma hơdăh, tơdrong pơvei jang tơbôl đơ̆ng sơ̆, tơdrong jang hơdoi tôm tơdrong đơ̆ng Việt Nam- Campuchia păng 2 dêh char Kon Tum- Ratanakiri hơnơ̆ng đei hơmet kơjăp, tŏk pran ‘lơ̆ng jing um rup tơƀôh ăn tơdrong pơvei tôch sĭt ‘lơ̆ng, jĭ tơmam bĭ tôch kăp gĭt.
Găh tơdrong vă jang hơdoi đơ̆ng 2 dêh char tơ̆ hơnăp kơnh, kiơ̆ đon hlôh vao băl, lui băl, ƀok Dương Văn Trang athei dêh char Ratanakiri pơjing tơdrong ‘lơ̆ng vă bơngai Việt Nam oei arih xa, bơ̆ jang tơ̆ dêh char Ratanakiri mât hơdai, đei tơdrong arih xa sơđơ̆ng, vang tơgop lơ ƀiơ̆ ăn tơdrong jang tŏk đơ̆ng dêh char.
Viết bình luận