Jơnŭm ƀăo Puih mak Ất Tỵ Kon Tum sơnăm 2025 pơdă hloh 100 ƀai chih găh puih mak đơ̆ng rim hơnih jang chih kơtơ̆ng ang lơ̆m dêh char păng dêh char anai. Mĭnh ƀai chih tơbăt hơdăh dôm tơdrong ‘lơ̆ng hơ iă găh tơdrong tơplih ‘nao, tơdrong hơdrin atŏk tơ iung kơ Teh đak păng hơmŏ găh ‘măng tơplih kơsô̆ kơ tơdrong jang chih kơtơ̆ng ang. Atŭm hăm tơdrong ‘lơ̆ng rŏ lơ, tơdrong pơdă păng đŏk ƀăo đei pơjing hơnih ‘lơ̆ng rŏ trŏ lăp lơ̆m pơyan puih mak, hơvơh hơvơi hơpơi bơngai chă lăng dêh char Kon Tum lơ̆m jơ ‘năr têt ou. Bơngai chih kơtơ̆ng, chih tơdrong tơroi hle Lê Văn Thiềng, Khul bơngai chih kơtơ̆ng ang sơnăm ‘lŏ kră găh Khul chih kơtơ̆ng ang dêh char Kon Tum tơbăt: “Rim ƀai chih jei trŏ lăp hăm trong pơchoh ăn păng chih tơbăt dôm kơtơ̆ng ang ‘nao, kơtơ̆ng ang nơ̆r pơrô̆ jang đơ̆ng Kơdră chĕp pơgơ̆r Đảng, teh đak, mă kăl ‘noh đơ̆ng Tổng Bí thư Tô Lâm. Đĭ đăng jĭ tôch trŏ lăp hăm trong bơ̆ jang đơ̆ng Đảng. Trong pơm tơlĕch tôch kơ ‘lơ̆ng hơ iă tơklep kơjăp hăm chăl tơplih kơsô̆”.Tơ̆ Pơm lêh pơgơ̆r blŭng a Jơnŭm ƀăo Puih mak Ất Tỵ sơnăm 2025, Khul jang chih kơtơ̆ng ang dêh char Kon Tum pôk ăn Hơnih tơm chĕp pơgơ̆r Ƀô̆ đô̆i vei lăng sơlam teh đak rim hla bơar ƀăo puih mạ vă pơtruh ăn rim kang ƀô̆, ƀô̆ đô̆i tŏk bŏk bơ̆ jang tơ̆ tơring sơlam teh đak.