Hrei au, dêh char Kon Tum đei hloh 215.000 ‘nu kon pơlei lui khop, tơmơ̆t 40% măt bơngai kon pơlei lơ̆m dêh char. Lơ̆m dôm sơnăm au ki, dêh char Kon Tum hlôi lăng ba kơjăp kiơ̆ hơnăp jang băh mă pơchoh trong ăn kơdră kơpal xek tơlang tơtom rim tơdrong ‘meh vă, nơ̆r apĭnh athei trŏ ƀlep đơ̆ng rim khul, rim bơngai lui khop.

Kiơ̆ đơ̆ng nŏh tơdrong pơgơ̆r lui khop roi năr roi ‘lơ̆ng hơ iă, pơm kiơ̆ kơjăp tơdrong tơchơ̆t kơ khôi luơ̆t; kon pơlei lui khop vang iung jang tơnăp dôm tơdrong jang đơ̆ng tơgŭm djru ‘mêm mơnat, hơrih sa tơpôl păng rim tơdrong jang pơting dih băl ‘mêm kơ eng Teh đak kơ yuơ kơdră tơring tơlĕch jang...Iung pơma tơ̆ jơ tơƀơp muh măt, kơdră chĕp pơgơ̆r Hơnih vei lăng kon pơlei dêh char Kon Tum ‘meh vă rim ƀok soi yă giĕng, bơngai chĕp kơ̆l khul lui khop hơnơ̆ng pơrô̆ pơrôp, pơtho khan ăn kon khop, kon pơlei lui jang kiơ̆ kơjăp hơrih sa ‘lơ̆ng “Hơrih sa ‘lơ̆ng, lui tơpăt”, tơ iung pơjing, hơmet pơ ‘lơ̆ng tơgoăt tơgoăl kon pơlei pơla pôm nơ̆r ƀơ̆r đon; kơrŭn đĭ jơhngơ̆m vang iung jang rim tơdrong jang pơting dih băl ‘mêm kơ eng Teh đak, rim ‘măng hơvơn kơ yuơ rim hơnih bơ̆ jang tơlĕch ăn.