Anih jang Hơlen, pơgơ̆r tơring kơdrâ̆m gơh hơgei dêh char Đăk Lăk (krao kơđeh noh Đăk Lăk IOC)  tơmơ̆t pơm jang đơ̆ng khei 9/2021. Đơ̆ng rŏng 2 sơnăm pơm jang, ư̆ng yŭng Đăk Lăk trư̆k tuyê̆n đei jê̆ 30.000 ‘măng iŏk yua. Kŏng thŏng tin http://tuongtaccongdan.daklak.gov.vn/ tơbang tơdrong đei jơnei sek tơlang hlôi đei iŏk tơdrong tơrĕk đơ̆ng lơ kon pơlei. Pơmai Trần Lệ, tơ̆ phương Thắng Lợi, pơlei tơm Buôn Ma Thuột sơkơ̆t hơdah: “Phân mêm âu ƀônh iŏk yua, ƀônh băt hơdah. Đei lơ tơdrong ‘lơ̆ng hiôk. Pơtih nhen camera trư̆k tuyê̆n. Dang ei đei lơ bơngai ƀơm tơnap tap ah pơm hla bar kăl, gơnơmd dei phân mêm âu ba kơtă pơtruh hô sơ ăn dôm anih jang kiơ̆ trong trư̆k tuyê̆n kŏng noh đe iŏk hô sơ păng hơlen pơm keh đang tơtom. Kon pơlei iŏk yua ư̆ng yŭng âu noh ƀôh pơyua tơpă păng gơh băt hơdah tôm tơdrong jang kơ dôm anih jang”.

Ƀok Võ Nguyễn Hoàng Nam, Phŏ Kơdră pơgơ̆r Anih jang hơlen IOC dêh char Đăk Lăk ăn tơbăt, truh dang ei, anih jang hlôi keh đang păng tơmơ̆t yua hloh 450 kơmăi camera thŏng minh tơ̆ lơ tơring lơ̆m pơlei tơm Buôn Ma Thuột păng minh ƀar apŭng, thĭ xah lơ̆m dêh char. Tơdrong kăl iŏk đei đơ̆ng dôm kơmăi camera đei tơroh truh anih jang hơlen pơgơ̆r tơring kơdrâ̆m gơh hơgei kơ dêh char. Atŭm hăm noh, kơmăi kơmŏk kơ̆l ‘ngok hơgei đei akŏm lơ̆m phân mêm kơ tŏng đai 1022 păng 10 tơdrong jang kăl. Dôm tơdrong jang âu mă blŭng hlôi đei jơnei tơnăp sơnong jang tơm vă pơjing minh tơring kơdrâ̆m gơh hơgei. Ƀok Võ Nguyễn Hoàng Nam ăn tơbăt: “ Tơdrong jang tơring kơdrâ̆m hơgei jing kênh pơma dơnuh đơ̆ng jơnŭm pơgơ̆r tơring hăm kon pơlei, vă pơm thoi yơ kon pơlei gơh đei kênh pơma dơnuh tơnăp hăm jơnŭm pơgơ̆r tơring, lơ̆m noh gô akŏm lơ̆m tơdrong chih akŏm nơ̆r pơtruh đơ̆ng kon pơlei, dôm tơdrong mă kon pơlei pơngơ̆t kơ đon gah vei sơđơ̆ng tơpôl hơrih xa, sơđơ̆ng trong nơnăm, vei rơgoh cham char păng tôm tơdrong đei ƀôh tăp dăr mă đei tơdrong tam mă trŏ kiơ̆ nhen tơchơ̆t ‘noh gô đei kon pơlei tơroi truh anih jang IOC”.

Trong pơm jang roi năr roi đei lơ tơdrong pơtruh đơ̆ng kon pơlei jâ̆p tơring pơtruh. Kiơ̆ đơ̆ng noh, kơdră kơ dôm anih jang hlôi tơmơ̆ng nơ̆r pơtruh đơ̆ng kon pơlei, anih jang mŭk drăm, hơlen đei tơdrong jang păng sek tơlang, pơgơ̆r tơbăt dôm anih jang. Ƀok Trần Xuân Tiệp, Phŏ Kơdră Anih jang vei lăng kon pơlei apŭng Cư Mgar ăn tơbăt: “Tơdrong tơroh đơ̆ng tơring păng anih jang tơroi tơbăt hlôi đei iŏk yua tơnăp. Minh ƀar nơ̆r pơtruh đơ̆ng kon pơlei hlôi đei IOC pơtruh ăn tơring păng tơroi athei tơring dah sek tơlang tơtom”.

Kiơ̆ kơ ƀok Trương Hoài Anh, Kơdră Anih jang Tơroi Tơbăt dêh char Đăk Lăk, Anih jang hơlen pơgơ̆r tơring kơdrâ̆m gơh hơgei dêh char Đăk Lăk hlôi tơgŭm ăn tơdrong pơgơ̆r jang păng sek tơlang tơdrong jang kơ dôm anih jang kơpal pơm jang hơdah, tenh kuăng, đei jơnei tơnăp. Atŭm hăm noh jing gơng tơroh 2 pah ah mă kon pơlei gơh pơtruh nơ̆r tơgop, tơroi dah mă pơtruh nơ̆r ăn dôm anih jang kơ teh đak gah dôm tơdrong đei ƀôh ưh kơ ‘lơ̆ng lơ̆m tơpôl, vei lăng trong nơnăm, anih jang kih thuơ̆t kơ dêh char. Vă keh đang tơdrong akŏm chih răk nơ̆r kăl kiơ̆ pơkăp kơsô̆ tơ̆ anih jang, ƀok Trương Hoài Anh ăn tơbăt: “Hơvơn rim tơring mưh kĕ noh dar deh asong jang vă đei anih jang IOC kơdih kơ po vă jang hadoi hăm IOC kơ dêh char, vă pơm thoi yơ pơm trŏ tơdrong pơkăl lơ̆m pơgơ̆r pơm jang adoi nhen tơdrong vang jang vei lăng đơ̆ng teh đak hăm kon pơlei păng anih jang mŭk drăm lơ̆m tơring teh kơ dêh char gơh hiôk hian hloh”