Lơ̆m 9 sơnăm kơ âu, rim khei, ‘nhŏng Nguyễn Văn Tiến, kăn ƀô̆ Anih jang Đảng xah Buôn Tría, apŭng Lăk, dêh char Đăk Lăk adoi mong 10 rơbâu hlj vă tơgop lơ̆m “Jên mong pơm kiơ̆ nơ̆r Ƀok” kơ anih jang. ‘Nhŏng tơroi: Kơsô̆ jên tơgop ưh đei lơ, trong pơm jang adoi ƀônh mơ̆n mă lei hlôi pơyua kăp gĭt hloh: Inh ƀôh tơdrong jang Mong jên pơm kiơ̆ nơ̆r Ƀok âu ‘noh kăp gĭt tơpă, noh đei tôm đảng viên lơ̆m Đảng ƀô̆ adoi nhen đoan viên tơ̆ dôm thôn pơlei adoi pơm kiơ̆ tơnăp. Nhen đảng viên mơlôh nhôn rim khei tơra 10 rơbâu hlj.

Jên mong pơm kiơ̆ nơ̆r Ƀok ‘noh tơdrong đei jơnei lơ̆m tơdrong pơlong “Jên mong pơm kiơ̆ nơ̆r Ƀok” đei Anih juăt jang Huyên uy Lăk pơtoi jang lơ̆m lơ sơnăm kơ âu vă tơgŭm dôm bơngai tơnap tap.

Kiơ̆ kơ noh, rim kăn ƀô̆, đảng viên, đoan viên, bơngai jang lơ̆m jâ̆p apŭng lơ̆m 3 năr noh mong 1.000 hlj; đoan viên, bơngai jang tơ̆ tơring lơ̆m 10 năr mong tŏ sĕt jat noh 1.000 hlj. Jên mong âu kơyuơ Anih jang Tuyên giáo Huyên uy vei lăng. Yă Đào Thị Thanh An, Phŏ Ƀĭ thư Anih juăt jang Huyên uy Lăk ăn tơbăt, hăm trong jang âu lơ̆m 9 sơnăm kơ âu, jâ̆p apŭng hlôi tơgop đei jê̆ 3 tih hlj, tơgŭm rim sơnăm ăn dôm bơngai tơnap tap ‘noh unh hnam mă teh đak tơchơ̆t tơgŭm, đảng viên, bơngai ưh đei ‘nhŏng oh vei rong, bơngai ƀơm tơdrong jĭ hli hlơt: “Tơmơ̆t tơdrong jang âu roi năr roi pơlan să păng pơyua kăp gĭt hăm đon bơnôh dơnưp, tơgop pơlan să đon bơnôh ‘mêm băt truh hăm tơpôl adoi nhen roi năr vang glơng tơnap tap hăm dôm bơngai đei tơdrong hơrih tơnap, ưh đei ‘nhŏng oh rong ‘me, bơngai ƀơm tơdrong jĭ hli hlơt vă đe yĕt đei jơhngơ̆m pran păng hơ-iă hloh lơ̆m tơdrong hơrih”

Atŭm hăm apŭng Lăk, trong jang “Jên mong pơm kiơ̆ nơ̆r Ƀok” hlôi đei pơih să, pơtoi jang đei jơnei tơ̆ lơ tơring nhen: Cư M'gar, Cư Kuin, Krông Ana, Krông Bông, Krông Buk, Krông Pach, păng M’Drak kơ dêh char Đăk Lăk. Lơ̆m 2 sơnăm kơ âu, tơdrong jang âu hlôi mong đei hloh 10 tih hlj, kiơ̆ đơ̆ng noh tơgŭm man đei 89 tŏ hnam oei, 2 lăm oei ăn bơngai pơtho, asong kơ hrĕng tơpu tơmam ăn dôm unh hnam mă teh đak tơchơ̆t tơgŭm, bơngai tơgŭm jơhngơ̆m ăn kăch mang.

Minh ƀar tơring hlôi đei trong tơlĕch jang mong jên gơh hơgei, hơvơn đei lơ kăn ƀô̆ đảng viên păng kon pơlei vang jang. Hơdah nhen dôm tơdrong jang “Tơlĕch mong jên tơgŭm đảng viên đei tơdrong hơrih tơnap tap” đơ̆ng Thanh uy Buôn Ma Thuột; “Ming man hnam pơyơ̆ng ăn trưng hŏk” đơ̆ng Huyên uy Cư M’gar, “Kơsơ̆p hla bar mong jên Búa Liềm vàng” đơ̆ng Thĭ uy Buôn Hồ... Ƀok Phạm Minh Tấn, Phŏ Ƀĭ thư juăt jang Tĭnh uy Đăk Lăk sơkơ̆t hơdah: ‘Nâu jing dôm tơdrong jang hơdah, pơyua kăp gĭt lơ̆m tơdrong jang “pơm kiơ̆ nơ̆r Ƀok, tơra jên mong” đơ̆ng tơring: “Hŏk pơhrăm păng pơm kiơ̆ đon kơchĕng, trong jang Hồ Chí Minh jing minh tơdrong jang hơnơ̆ng. Păng Tĭnh uy hlôi pơgơ̆r hơdah đơ̆ng chi ƀô̆ tơ̆ tơring, đơ̆ng rim đảng viên athei ‘nhăk tơdrong hŏk pơhrăm păng pơm kiơ̆ đon bơnôh trong jang Ƀok jing tơdrong jang hơnơ̆ng lơ̆m rim ‘măng akŏm jang, rim khei vă rim bơngai băt hơdah păng jing tơdrong jang kơdih đơ̆ng tơdrong jang iĕ truh tơdrong jang tih, lơ̆m tơdrong tơgŭm băl sut lê̆ pơngot tơjur hin dơnuh, pơjing tơring tơrang ‘nao, keh đang dôm sơnong jang đei pơjao”.

Ưh hơdrô̆ tơdrong jang, “Mong jên pơm kiơ̆ nơ̆r Ƀok” hlôi jing minh tơdrong jang hơnơ̆ng đơ̆ng rim kăn ƀô̆, đảng viên păng kon pơlei tơ̆ Đăk Lăk kơdih pơm jang. Trong jang ƀônh mă lei kơjă păng tơdrong pơlan să ‘noh tih tên, hơ-‘nhăk tơdrong hơ-iă ăn lơ bơngai hin dơnuh đơ̆ng bơbŭng hnam kơjăp ‘lơ̆ng, dah mă tơgŭmt ơtom lơ̆m khei năr tơnap tap. Tơdrong jang âu hlôi chĕp vei juăt jue “tơgŭm dih băl” ‘lơ̆ng rŏ đơ̆ng hơdrung hơdrĕch bơ̆n, jing trong jang kăp gĭt hloh lơ̆m hŏk pơhrăm păng pơm kiơ̆ đon bơnôh ‘lơ̆ng Hồ Chí Minh.