Đơ̆ng 20 sơnăm hơdrol, tơgĕch groi bri đei kơ ŭnh hnam păng kon pơlei lơ̆m tơring, ƀok Hà Ngọc Hợp oei tơ̆ thôn Lương Thịnh, tơring Tân Thịnh, pơlei tơm Yên Bái hlôi rong sut kơdrot lơ̆m bri ‘long vă iŏk đak. Dôm sơnăm tơjê̆ au, lăng ƀôh đe ‘meh vă răt yua đak sut kơdrot roi lơ, ƀok Hợp hlôi atŏk kơtang chă rong lơ. Truh dang ei, ŭnh hnam ƀok hlôi đei 100 kơthŭng rong kơdrot, lơ̆m khei năr lơ hloh ‘noh 150 kơthŭng rong, hơnhăk đei iŏk yua truh kơ hrĕng triu hlak jên lơ̆m 1 sơnăm.

Ƀok Hợp tơbăt, tơdrong jang rong sut kơdrot ưh kơ hoach lơ kon jên tơmơ̆t jang, lơ̆m mĭnh kơthŭng rong lăp tơhoach dang 1 triu hlak jên, mă lei bơngai rong jei kăl hơlen păng băt hơdăh tơdrong chă trep pơkao kơ sut kơdrot vă vei lăng năng tông kiơ̆ pơyan. Bơngai rong sut kơdrot jei hlôh vao găh rim kơ loăi pơkao ‘long, pơyan pơkao chôh, tơring đei lơ pơkao ... vă chă chơ ba sut kơdrot truh tơ̆ groi đei lơ pơkao. Atŭm hăm ‘nŏh jei kăl băt hơdăh khei ‘năr sut kơdrot pơm sal, tơklăh khul vă veh ver sut kơdrot jăk: “Tơdrong chă rong au đơ̆ng ƀar jĭt sơnăm kơ au bơih, mă lei rong lơ ‘noh dang đunh kơ au 7 sơnăm đĕch. Chă rong sut kơdrot ‘noh bơ̆n kăl kơchăng lăng hơlen mă brĕ, hơnơ̆ng chă lăng hơlen hăp ‘nŏh kơna mă gei hơnơ̆ng”.

Brŏk vih tơ̆ pơlei pơla đơ̆ng kơdrăn tơblăh Tây Nguyên sơnăm 1975, bơngai rơka dŏng teh đak Nguyễn Minh Đông oei tơ̆ thôn Hạnh Phúc, tơring Y Can, apŭng Trấn Yên, dêh char Yên Bái jei iung jang hăm tơdrong jang atŏk tơ iung mŭk drăm. Khei năr ‘noh, jei iŏk jang Kơdră chĕp pơgơ̆r khul choh jang sa kơ Hơp tak xah, adoi tơjră hăm tơdrong jĭ jăn đơ̆ng ƀơm ƀrơ̆m lơ̆m sơnăm tơblăh vang sơ̆, ƀok Đông atŭm hăm hơkăn hơngur jang sa vă rong ‘me kon hơlơ̆p. 

Ƀok Đông tơbăt, dang 10 sơnăm hơdrol, mưh kơdră tơring chă pơrô̆ hơvơn tơplih ‘long pơtăm, rong kon tơrong, ŭnh hnam ƀok tơchơ̆t tơplih 2ha teh groi pơtăm ƀum ƀlang chă pơtăm ‘long kuê̆. Truh dang ei, đơ̆ng chă kŏh rơih, mĭnh sơnăm ŭnh hnam ƀok iŏk đei vă jê̆ 100 triu hlak jên. Kơdih ƀok Đông ling lang tơchăng, jĭ bơngai ƀô̆ đô̆i Ƀok Hô, mă đơ̆ng tơnap tap dang yơ hơdrin yak hloh, ưh kơ lê̆ pơngot rơvet tơngiĕt găng drŭh kiơ̆ hơnơ̆ng, dang ei hơrih sa lơ̆m chăl sơnăm rơngei hiôk hian, ưh kơ lê̆ pơngot rơvĕt hơnơ̆ng, ưh kơ lê̆ tơpôl hơnơ̆ng lăng tông nông gia:“Ĭnh tôch lăp đon hăm nơ̆r Ƀok Hô pơma ‘noh: "Ƀô̆ đô̆i rơka mă lei ưh kơ hơven hơvo jo jăn”, jĭ bơngai ƀô̆ đô̆i brŏk vih hơrih sa jing kon pơlei hmă kơna dôm tơdrong yă kiơ jei jang keh đang ngăl, nơ̆r pơma tơ-‘ngla iung jang hloi; ưh kơ hli tơdrong pơmat tat hrat hrĭn, mă đơ̆ng tơnap tap truh dang yơ jei hơdrin jang mă keh, chă pơtho khan kon hơkăn hơdrin jang sa”.

Hrei au, Khul Ƀô̆ đô̆i so dêh char Yên Bái đei hloh 36.500 ‘nu, vang mơ̆t lơ̆m 1.400 chi hô̆i atŏk hơnăp jang kơ ƀô̆ đô̆i so lơ̆m chăl hle, Khul Ƀô̆ đô̆i so dêh char Yên Bái hơnơ̆ng pơrô̆ athei rim khul jang kiơ̆ ‘lơ̆ng rim tơdrong jang pơting dih băl jang pran kơtang, rim ‘măng hơvơn kơ yuơ tơring pơgơ̆r; tơgop atŭm khul đảng, kơdră tơring păng kon pơlei pơla jang kiơ̆ jơnei rim tơdrong jang chinh trĭ đei pơjao.

Mă kăl, tơdrong jang “Ƀô̆ đô̆i so tơgum dih băl tơjur dơnuh, jang sa hơgei” đei atŏk kơtang hăm lơ trong jang hơ iă, trŏ lăp hăm trong pơprŏ jang, trong pơchoh ăn atŏk tơ iung muk drăm-tơpôl kơ tơring păng trŏ lăp hăm dôm tơdrong gơ̆h jang kơ rim bơngai. Ƀok Vũ Văn Huyên, Kơ iĕng kơdră chĕp pơgơ̆r Khul Ƀô̆ đô̆i so apŭng Yên Bình, dêh char Yên Bái tơbăt, ‘ngoăih tơgĕch dôm tơdrong đei păng kon jên tơgŭm djru đơ̆ng Trung ương, đơ̆ng dêh char păng tơring vă tơ iung pơjing, atŏk tơ iung trong choh jang sa, pơm tơlĕch tĕch mơdro trŏ lăp, Khul jei hơnơ̆ng iung jang hơdoi hăm hơnih jang vei lăng choh jang sa pơgơ̆r pơtho ăn rim bơngai lơ̆m khul găh kih thuơ̆t rong kon tơrong, vei lăng ‘long pơtăm, chă pơrô̆ hơvơn rim bơngai lơ̆m khul jang kiơ̆ khoa hŏk kih thuơ̆t, kmăi kmŏk lơ̆m choh jang sa vă đei iŏk yua kơjăp: “Nhôn hlôi hơlêm pơtrŭt ƀô̆ đô̆i so atŏk tơ iung mŭk drăm hăm lơ trong jang ‘lơ̆ng hơ iă, kơrŭn jơhngơ̆m atŏk tơ iung pơm pơdrŏng. Nhôn ling lang vei kơjăp Câu lạc bộ bơngai mơdro sa Khul Ƀô̆ đô̆i so apŭng, hơlêm pơtrŭt ƀô̆ đô̆i so, kôn mon kon sau păng kon pơlei atŏk tơ iung mŭk drăm”.

Hơbĕch hơbal, tơchăr hơ iă, iŏk đei “jơnei tih tên” lơ̆m tơdrong jang mŭk drăm, rim ƀô̆ đô̆i so Yên Bái hrei au hlôi păng tŏk bŏk tơgop tih tên lơ̆m tơdrong jang tơjur dơnuh kơjăp ‘lơ̆ng, tơ iung pơjing tơring tơrang ‘nao păng tơring kơdrơ̆m gơ̆h hơgei kơ tơring; tơgop lơ̆m ba Yên Bái atŏk tơ iung tĕnh koăng, kơjăp iăp kơtang kiơ̆ trong “rơgoh ‘lơ̆ng rŏ hơbŏ nhen păng hơnuk hơnoa”.