Đơ̆ng rŏng hlŏh 20 sơnăm chông unh hnam tŏk oei tơ̆ Đắk Lắk jang xa, truh dang ei tơdăm xung phong so sơ̆ Vũ Văn Khanh tơ̆ thôn 7, xăh Ea Nam, apŭng Ea Hleo, dêh char Đắk Lắk pơjing đei 1 pơgar pơtăm lơ kơloăi ‘long, rong lơ kon yŏng. Hăm 12ha teh, ƀok pơtăm hơlam lơ kơ loăi ‘long nhen cao su, tiu, điêu, mit, sầu riêng; hơdai hăm rong kon tơrong, sir sơlŭng rong ka păng mong đak tơruih ăn ‘long pơtăm. Đơ̆ng pơgar xă âu, 1 sơnăm unh hnam ƀok iŏk đei hlŏh 1 ti hlak jên; chă tơdrong jang hơnơ̆ng ăn 10 ‘nu bơngai jang.

Ƀok Vũ Văn Khanh tơroi: “Tưk tơiung tơdrong juăt đơ̆ng Khul druh dăm xung phong sơ̆, đơ̆ng rŏng kơ khei ‘năr jang xa pơmat tat ‘nŏh dar deh dar deh mŭk drăm roi tŏk sơđơ̆ng. Đei tơdrong arih xa sơđơ̆ng bơih ‘nŏh ba athei vang tơgŭm ăn dôm bơngai pơmat tat ƀiơ̆, pơtih gia nhen tơgŭm đak tơruih ăn ‘nhŏng oh kon pơlei kon kông jŭm dăr, sơnăm ‘nâu kŭm đei truh 10 ha. Pơlei ưh đei hnam hôp ‘nŏh inh chĕng song dang 1.000 m2 teh vă pơm hnam hôp vă mih ma duch nă đei anih hŏk hôp”.

Jĭ tơdăm xung phong vang vei lăng tơring sơlam găh Tu, đơ̆ng rŏng kơ pơjing đei 1 teh đak kơjăp ‘lơ̆ng, ƀok Nguyễn Đình Chiến lĕch đơ̆ng pơlei Quảng Ninh mât jang xa tơ̆ phường An Lạc, thĭ xăh Buôn Hồ. Đơ̆ng rŏng lơ sơnăm adrin choh jang xa, truh dang ei ƀok pơm đei 1 Hnam kơmăy ot ƀôt chĕh phe, pơih anih tĕch mơdro tơmam pơyoa ăn choh jang xa, pơvih ăn tơdrong chă tơmang lăng, iŏk yoa hlŏh 1,5 ti hlak jên 1 sơnăm. Jang mŭk drăm hai, ƀok Chiến oei adrin vang bơ̆ jang lơ̆m dôm tơdrong tơ̆ tơring hai, tơgŭm ăn lơ bơngai pơmat tat tŏk iŏk jên vă jang xa, tơgŭm tơmam vă choh jang xa ưh kơ iŏk jên kon.

Tơdăm xung phong so Nguyễn Đình Chiến tơroi: “Hŏk pơhrăm kiơ̆ nơ̆r Ƀok Hô athei ‘mêm kơ bôl boăl, mât 1 ƀơ̆r đon, tơgŭm băl lơ̆m tơdrong sut pơđĭ pơngot tơjur tơnuh hin. Ƀôh dôm bơngai đei tơdrong arih xa pơmat tat ‘nŏh vang tơgŭm băl, chă tơdrong jang ăn kon sâu lơ̆m khul. Pơlung bơngai jang lơ̆m Khul hŏk pơhrăm khôi luơ̆t, pơjing tơring đang kơ ‘nŏh pơjing anih oei xa tơ̆ tơring kơdih oei xa”.

Bơ̆ jang tơdrong jang “Druh dăm xung phong so jang mŭk drăm rơgei – Yoa kơ bôl boăl”, tơ̆ Đắk Lắk đei lơ trong jang mŭk drăm rơgei lơ̆m dôm tơdrong jang xa, pơm tơlĕch tơmam, rei pơtăm hơdai hăm rong kon tơrong, tĕch mơdro… Lơ̆m 5 sơnăm âu ki, đei vă jê̆ 50 unh hnam păng HTX choh jang xa jang xa rơgei yoa đe druh dăm xung phong so pơm tơ ‘ngla, chă tơdrong jang ăn vă jê̆ 200 ‘nu druh dăm xung phong so păng ‘nhŏng oh đe sư.

Kiơ̆ yă Trần Thị Xuân, Kơdră vei lăng Khul druh dăm xung phong so dêh char Đắk Lắk, hơdai hăm tơdrong tơgŭm băl jang xa, dôm bơngai jang oei adrin tơgop jên mong yoa kơ bôl boăl, hơnơ̆ng tơgŭm jên ăn khul grŭp tơ̆ tơring bơ̆ jang, tơgŭm ăn dôm bơngai đei tơdrong arih xa pơmat tat, jĭ jăn păn hnong.

“Tơdrong jang “Druh dăm xung phong so jang mŭk drăm rơgei, yoa bôl boăl” păng tơdrong jang “Yoa bôl boăl, rim bơngai jang, vang jang đei lơ tơdrong ‘lơ̆ng”, ‘nŏh jĭ 2 tơdrong jang ‘lơ̆ng mă đe druh dăm xung phong so athei hơnơ̆ng hŏk pơhrăm, tơlĕch tơdrong pơjei băl đơ̆ng Khul dêh char truh tơ̆ rim bơngai. Tơdrong jang “Druh dăm xung phong so jang xa rơgei, yoa bôl boăl” ‘nŏh dang ei vih dơ̆ng hăm tơdrong arih xa hăm, đe druh dăm xung phong so oei đei jơhngâm pran kŭm adrin choh jang vang tơgop ăn tơdrong jang tŏk mŭk drăm, jŏh ayŏ kơ dŏ xoang tơpôl tơ̆ tơring”.

Chĕp răk nơ̆r pơtho đơ̆ng Ƀok Hô “Ưh đei tơdrong kiơ pơmat tat, lăp hli jơhngâm ưh kơ hơđơ̆ng, kôch kông păng kơlơ̆p đak dơsĭ, khŏm jang lei jing đei”, đơ̆ng rŏng kơ jang đang tơdrong jang hăm teh đak, vih dơ̆ng hăm tơdrong arih xa hmă, đe druh dăm xung phong so tơ̆ Đắk Lắk hơnơ̆ng hơtŏk jơhngâm đon “Oei tơdăm khŏm năm hơdrol, truh kră chă đon 'lơ̆ng”. Đe sư oei plang pơyơ̆r đĭ jơhngâm kơdih vang jang atŏk tơiung mŭk drăm păng tơgop ăn tơdrong jang tŏk mŭk drăm, tơpôl tơ̆ tơring.