Kơ sơ̆ 12/11, tơ̆ pơlei tơm Pleiku, Anih jang Đảng dêh char Gia Lai păng Học viện Chính trị Quốc gia Hồ Chí Minh pơgơ̆r hop akŏm khoa hŏk hơtŏk tơiung kơjăp tơmang lăng joh ayŏ păng tơmang lăng cham char bri brăh kơjăp tơring Tây Nguyên lơ̆m jăl jang hrei ‘nâu. Tơ̆ âu, 50 nơ̆r pơma dơnuh đơ̆ng dôm bơngai jang khoa hŏk, bơngai vei lăng, bơngai mơdro sa tơmang lăng hlôi đei dôm nơ̆r tơgop kăp gĭt găh tơchĕng hơlen păng yan âu găh tơmang lăng Tây Nguyên. Tơ̆ hop akŏm, dôm bơngai joăt jang, dôm bơngai khoa hŏk akŏm tơroi, pơma dơnuh găh dôm tơdrong nhen tơchĕng găh hơtŏk tơiung kơjăp tơmang lăng joh ayŏ păng tơmang lăng cham char bri brăh tơring Tây Nguyên; băt hơdăh tơmam păng jang hơdai pơtrŭt roi tơƀôh vă hơtŏk tơiung tơmang lăng tơring Tây Nguyên; Tơdrong hiôk, long nol păng dôm tơdrong tơlĕch ăn lơ̆m hơtŏk tơiung kơjăp tơmang lăng, păng tơmang lăng cham char bri brăh tơring Tây Nguyên lơ̆m tơdrong hrei ‘nâu; Chă trong vă jang hơtŏk tơiung kơjăp tơmang lăng joh ayŏ, tơmang lăng cham char bri brăh tơring Tây Nguyên;... 

Dôm bơngai pơcheh, bơngai tơchĕng hơlen, bơngai vei lăng kŭm tơgop lơ nơ̆r, apĭnh trong jang găh tŭn pran tơroi tơbăt, hơtŏk ‘lơ̆ng đon hlôh vao đơ̆ng tơpôl kon pơlei oei găh hơtŏk tơiung kơjăp tơmang lăng joh ayŏ, tơmang lăng cham char bri brăh; jang đang trong jang tơgŭm, pơm tơdrong ‘lơ̆ng hơtŏk tơiung hơnăp jang đơ̆ng tơpôl kon pơlei lơ̆m hơtŏk tơiung tơmang lăng kơjăp tơklep hăm chĕp răk păng tơƀăk mong dôm kơjă kăp gĭt joh ayŏ kon kông, pơjing tơring tơrang 'nao.