Jĭ 1 ‘nu bơngai tang măt kơ dêh char Đắk Lắk đei pơ ư tơ̆ Lêh pôk pơ ư hok tro, sinh viên, kon kông gơh hơgei ‘măng mă 10, sơnăm 2023, oh Đoàn Gia Hân, bơngai Tày, hŏk tro lăm 12 chuyên sinh, Hnam trưng THPT Chuyên Nguyễn Du hlôi iŏk đei lơ tơdrong jơnei tôch hơiă lơ̆m tơdrong hŏk pơhrăm. Oh iŏk đei lơ tơmam hơpăh nhen: yaih như̆k dêh char păng yaih nhi lơ̆m teh đak găh tơdrong thi Olympic Nơ̆r Anh ăn hŏk tro - sinh viên sơnăm 2022; jĭ “Hŏk tro 3 ‘lơ̆ng” kơ trung ương; đei măt lơ̆m Khul thi Hok tro rơgei lơ̆m teh đak môn Sinh. Ưh lăp hŏk rơgei đĕch, Gia Hân oei vang jang lơ tơdrong tơ̆ ‘ngoăih jơ hŏk, tơdrong jang lơ̆m tơpôl kŭm nhen dôm tơdrong jang đoan, khul. Oh jĭ bơngai vang jang lơ̆m Khul pơgơ̆r Đoan hnam trưng, jang lơ̆m Khul vei lăng Câu lạc bộ Nơ̆r Anh kơ dêh char.

Đoàn Gia Hân tơroi: hơnơ̆ng adrin hơmet jơnăr mă lăp ‘lơ̆ng vă gơ̆h vang jang lơ̆m rim tơdrong. Atŭm hăm ‘nŏh hơnơ̆ng adrin hŏk pơhrăm vă hơtŏk đon hlôh vao hai: “Oh ‘mĕh hơnơ̆ng adrin tưk tơiung kơdih kâu kŭm nhen hơmet pơ ‘lơ̆ng 1,2 tơdrong tam mă pran vă gơ̆h iŏk đei tơdrong jơnei ‘lơ̆ng, tơƀôh trong ăn tơdrong arih xa ning mônh kơnh gơ̆h ‘lơ̆ng ƀiơ̆. Ning mônh kơnh hăm môn chuyên ‘nŏh jĭ sinh hŏk ‘nŏh oh ‘mĕh jing 1 ‘nu bơngai jang khoa hŏk, tơchĕng hơlen găh kơmăy kơmŏk sinh hŏk kŭm nhen ki thuơ̆t y sinh vă hơnhăk dôm ki thuơ̆t ‘lơ̆ng rơgei ăn tơdrong hơmet jĭ vă tơgŭm ăn rim bơngai.”

Hăm Y Un Diễm, dang ei oei hŏk sơnăm mă 3 lăm Sư phạm Nơ̆r Anh, Hnam trưng Đăi hŏk Tây Nguyên, ‘mĕh năm hŏk hlôi tơgŭm ăn oh yak hlŏh rim tơdrong pơmat tat, pơlong nol. Vih dơ̆ng tơ̆ hnam trưng vă chĕp vei, tơiung dơ̆ng đon hơpơi đơ̆ng kơ dih đơ̆ng rŏng 3 sơnăm tơhlăk, hơdruh bơngai Triêng adrin hŏk pơhrăm păng vang jang lơ̆m tơdrong jang khul, jing “Sinh viên 5 ‘lơ̆ng” kơ dêh char păng jĭ Bơngai vei Grŭp iŏk đei hơnăn “Tơpôl Sinh viên 5 ‘lơ̆ng” kơ Trung ương. Oh oei jang hloi lơ tơdrong nhen Pơm bơngai vei lăng Câu lạc bộ Sinh viên 5 ‘lơ̆ng tơ̆ Hnam trưng, Jang lơ̆m Ban thư ký Khul Sinh viên Việt Nam dêh char Đắk Lắk. Năm hŏk răh, chă pơtho răh ăn hŏk tro păng pơvih ăn thây kô pơtho tơ̆ lăm hŏk, Diễm roi đei hlôh vao, đei đăi kon jên vă pơ ‘nhŏ ăn tơdrong arih xa. Atŭm hăm ‘nŏh, oh kŭm đei đon vă tơlĕch 1 tơdrong jang ăn kơdih păng ‘mĕh bơ̆ jang kơtă tơ̆ pơlei kơ dih ưh kơ đunh kơnh.

Y Un Diễm tơroi: “Oh đei 1 tơdrong vă jang ‘nŏh jĭ “hơnhăk nơ̆r Anh vih tơ̆ pơlei”. Hăm đe boăl bơngai kon kông nhen oh tơ̆ tơring ‘nŏh tôch pơmat tat păng hơnat vă gơ̆h hŏk nơ̆r Anh. Kơna mưh hok đang, lĕch ‘măng khoă kơnh ‘nŏh oh ‘mĕh vih dơ̆ng tơ̆ pơlei, vă chă tơgŭm dơ̆ng ăn đe bôl boăl tơ̆ noh vă đe boăl đei tơdrong ‘lơ̆ng gơ̆h hŏk nơ̆r Anh, gơ̆h năm truh tơ̆ dôm tơring ‘nao păng tơiung jơhngâm hưch hanh ăn bôl boăl, vă đe boăl đei đon tơchĕng sơđơ̆ng, đei tơdrong ‘lơ̆ng vă hŏk pơhrăm nhen oh.”

Đắk Lắk dang ei đei hlŏh 170 rơbâu ‘nu hŏk tro, sinh viên bơngai kon kông oei hŏk phô thŏng păng cao đẳng, đăi hŏk. Yak hơdai hăm hŏk tro, sinh viên, khei ‘năr âu ki, dêh char Đắk Lắk đei lơ tơdrong tơgŭm vă pơlung hŏk tro, sinh viên adrin hŏk, pơjing tơdrong ‘lơ̆ng vă đe ŏh sơđơ̆ng jơhngâm hŏk pơhrăm. Oh H’Phương Hoa Êban, sinh viên khoa Sư phạm nơ̆r Anh, Hnam trưng Đăi hŏk Tây Nguyên ăn tơbăt: “Lơ̆m tơdrong hŏk păng pơtâp pơhrăm, oh hơnơ̆ng iŏk đei tơdrong tơgŭm đơ̆ng Đảng păng teh đak, oh ƀôh roi đei đon adrin hŏk pơhrăm ƀiơ̆. Găh noh dơ̆ng kŭm yoa jơhngâm đon hơpơi ‘mĕh đei hŏk pơhrăm vă plang đĭ jơhngâm ăn tơpôl pơma atŭm kum nhen kon pơlei kơdih pơma adrô̆, oh oei ‘mĕh hŏk iŏk lơ ƀiơ̆ dôm tơdrong kăl, đon rơgei vă gơ̆h plang jơhngâm đon ăn kon pơlei hơdrĕch hơdrung nhôn.”

Kŭm hăm dôm tơdrong tơgŭm đơ̆ng Đảng păng teh đak, hăm hơnăp jang đơ̆ng bơngai dơ̆ng tang păng vei lăng tơdrong đei yoa tôch tơgăl ăn sinh viên, Khul Sinh viên Việt Nam dêh char Đắk Lắk oei năng kăl tơlĕch Tơdrong pơtho hơtŏk đon rơgei găh Nơ̆r Anh păng trong mât hơdai hăm apŭng plenh tĕh ăn sinh viên; pơjing tơdrong jang Vang yak hơdoi, tơgŭm păng tưk tơiung sinh viên kon kông. Chị H’Giang Niê, Bí thư đoan dêh char, Kơdră vei lăng Khul Sinh viên Việt Nam dêh char Đắk Lắk ăn tơbăt: đe sinh viên bơngai kon kông gơ̆h hơgei gô jing dôm bơngai đei jơhngâm đon ‘lơ̆ng hơiă tưk tơiung tơdrong ‘mĕh plang jơhngâm đon, khŏm jang tŏk ăn jơhnơr mơlôh, mă loi jĭ hăm bôl boăl tơ̆ pơlei pơla:

“Nhôn ‘mĕh, đe oh tơƀôh hơdăh hơnăp jang đơ̆ng kơdih lơ̆m tơdrong jang atŭm kơ Đoàn, Khul; hơtŏk hơnăp jang tơm ‘nŏh jĭ hŏk tro, sinh viên, druh dăm bơngai kon kông chĕp vei, tưk tơiung tơdrong jŏh ayŏ kơ dŏ xoang ‘lơ̆ng đơ̆ng hơdrĕch kơdih, vang bơ̆ jang kiơ̆ trong tơplih hăm kơmăy sô̆. Nhôn hơmĕng khul âu bơ̆ jang đei yoa păng kŭm hăm Anih jang đoan dêh char, Khul sinh viên bơ̆ jang ‘lơ̆ng rim tơdrong hơgăt.”

Hăm dôm tơdrong tơgŭm vang yak hơdai hlôi tơgŭm ăn lơ hŏk tro, sinh viên bơngai kon kông tơ̆ Đắk Lắk đei đon nuih, sơđơ̆ng jơhngâm ƀiơ̆ lơ̆m rim tơdrong jang. Đe ŏh kŭm adrin hŏk pơhrăm, hŏk iŏk dôm tơdrong rơgei vă hơmet 'lơ̆ng hlŏh ăn tơdrong arih xa ning mônh kơnh, hăm đon hơpơi 'mĕh plang đon rơgei, jơhngâm pran đơ̆ng kơ dih ăn tơpôl, ăn pơlei pơla.