Thiếu tá H’Quý Rơ Chăm bơ̆ jang lơ̆m Khul pơrô̆ pơrôp joh ayŏ- Hơnih jang Chinh trĭ Ƀô̆ đô̆i dêh char Dak Lăk. Hloh 20 sơnăm tơklep hăm khul pơrô̆ pơrôp joh hơri, mŏ hlôi yak truh rim pơlei pơla tơnap tap tơ̆ dêh char, hăm hơpơi ‘meh vă hơnhăk ba nơ̆r hơri vang tơgop tơgŭm ăn kon pơlei pơm tơplih jơhngơ̆m đon tơchĕng, trong jang sa, pơm hơtŏk jơhngơ̆m đon hlôh vao găh trong bơ̆ jang khôi luơ̆t kơ Đảng, Teh đak. ‘Ngoăih kơ ‘noh, hăm hơnăp jang Kơdră chĕp pơgơ̆r Khul drŏ kăn Ƀô̆ đô̆i dêh char Dak Lăk, đơ̆ng sơnăm 2019 truh dang ei, mŏ H’Quý Rơ Chăm hlôi tơlĕch jang ‘lơ̆ng rim tơdrong jang nhen “Drŏ kăn hơgei bơ̆ jang teh đak, tơnăp pơvih pơvăn ŭnh hnam”, “Tơdrong jang ŭnh hnam ƀô̆ đô̆i hơnŭk hơnoa”; iŏk vei lăng năng tông 3 ‘nu mon kon hơ ‘lơ̆p ƀô̆ đô̆i hơrih sa tơnap tap, vang iung jang kơtang tơgŭm djru tơdrong oei sa tơpôl tơring... Thiếu tá H’Quý Rơ Chăm tơroi găh tơdrong pơm lơ liơ vă jang keh đang ‘lơ̆ng tơdrong bơ̆ jang: “ ‘Moi kiơ̆ khei năr, pơtih gia mưh khul đei tơdrong pơgơ̆r tih, ba tơgĕch jang lơ̆m jơ năr pơdơ̆h, vă pơm lơ liơ sơđơ̆ng ‘lơ̆ng hơ iă ƀar păh hơnăp jang păng tơdrong bơ̆ jang đei pơjao. Mư̆h vih hăm ŭnh hnam, ba hơdrin chă pơvih pơvăn tôm tong hăm hơnăp jang kơ bơngai mĕ, kơ bơngai hơkăn lơ̆m ŭnh hnam".

Găh mŏ Trần Thị Hải Yến, Bí thư Đảng ủy, Chính trị viên Hơnih Ƀô̆ đô̆i thĭ trân Quảng Phú, apŭng Cư M’gar, tơdrong hơnơ̆ng hŏk pơhrăm dôm tơdrong păng trong bơ̆ jang hlôi tơgŭm ăn mŏ 5 sơnăm hơnơ̆ng iŏk đei hơnăn kang ƀô̆ pơtho chinh trĭ hơgei lơ̆m dêh char Dak Lăk. Sơnăm 2023, mŏ vang năm ‘Măng pơlong pơđĭ khul ƀô̆ đô̆i chinh trĭ viên hơgei kơ yuơ Hơnih tơm Ƀô̆ đô̆i vei lăng sơlam teh đak pơgơ̆r păng iŏk đei tơmam hơpăh pơchhơp jơhngơ̆m. Mŏ Trần Thị Hải Yến, tơroi:“Sơ̆ ba jang lơ̆m Hơnih jang Tư pháp păng hlôi iung jang lơ ‘măng năm chă pơrô̆ pơrôp kon pơlei tơ̆ rim pơlei pơla lơ̆m apŭng găh bơ̆ jang khôi luơ̆t. Mư̆h bơ̆ jang lơ̆m Ban Pháp chế Jơnŭm vei lăng kon pơlei apŭng, jei hlôi bơ̆ jang dăr lăng hơlen tơdrong krao tơmơ̆t pơm ƀô̆ đô̆i, hlôi hơlen tôch brĕ rim tơdrong tơchơ̆t găh tơdrong jang ou, kơna mưh đei pơjao iŏk jang pơtho pơhrăm chinh trĭ ăn khul dân kuân ‘noh ưh kơ đei tơnap tap kiơ ôh. Găh tơdrong tơlĕch jang bơ̆ jang vei lăng sơđơ̆ng Teh đak, ‘noh hăm tơdrong hơdrin đơ̆ng kơdih hŏk răh jang răh, jei hlôh bơ̆ jang keh đang dôm tơdrong jang đei pơjao”

Jei hơgei bơ̆ jang tơdrong jang teh đak, pơđĭ bre mŏ H’Quý hăm mŏ Hải Yến jei hơgei tơnăp tơdrong jang lơ̆m ŭnh hnam, vei lăng năng tông ŭnh hnam hơrih sa tơƀĕ dang dŏng tơƀŏng dang dan. ‘Nhŏng Lê Ngọc Nghĩa, klo mŏ Hải Yến, tơbăt, băt hlôh ƀôh hơdăh tơdrong bơ̆ jang kơ hơkăn, ‘nhŏng jei hơnơ̆ng vang chă pơvih pơvăn lơ̆m ŭnh hnam:“Lơ̆m mă hơkăn đei tơdrong jang kăl dăh mă năm bơ̆ jang tơ̆ hơtăih, ba gô iŏk jang đĭ đăng tơdrong jang vei lăng năng tông kon hơ ‘lơ̆p hloi. Chă pơtho khan ăn kon hơ ‘lơ̆p lăng tông nông gia mĕ, hŏk kiơ̆ mĕ, kơ yuơ ‘noh jĭ dôm tơdrong ƀôh hơdăh yan ou hloi. Đei ‘măng jei pơma pơ ư kơ hơkăn vă kon hơ ‘lơ̆p ƀôh, đơ̆ng rŏng ou kơnh đe kon hơdrin hŏk pơhrăm jang kiơ̆ nhen mĕ đe hăp”.

Pơma tơroi găh rim đe mŏ H’Quý Rơ Chăm păng Trần Thị Hải Yến, Đại tá Trần Minh Trọng - Kơdră chĕp pơgơ̆r Khul Đảng Ƀô̆ đô̆i dêh char Dak Lăk tơbăt, ‘nou jĭ dôm bơngai ‘lơ̆ng tơnăp hloh lơ̆m tơdrong jang pơting dih băl bơ̆ jang pran kơtang kơ dêh char lơ̆m khei năr ou ki.“Rim đe mŏ H’Quý Rơ Chăm păng Trần Thị Hải Yến jĭ dôm bơngai gĭt kăl hlŏh, nhen lĕ tơmŏng hơdăh ang rang ‘lơ̆ng lơ̆m tơdrong pơting dih băl jang pran kơtang gơ̆h hơgei kơ khul ƀô̆ đô̆i dêh char jăl jang 2019 - 2024. ‘Nou jĭ tơpă jing “Bôp pơkao ‘lơ̆ng” lơ̆m pơgar pơkao pơting dih băl kơ khul ƀô̆ đô̆i dêh char, gô pơjing đei jơhngơ̆m đon lang să păng hưch hanh ăn kang ƀô̆, ƀô̆ đô̆i, adoi nhen rim đe drŏ kăn lơ̆m Khul ƀô̆ đô̆i dêh char Dak Lăk kiơ̆ rok yok jơ̆ng”.

Đại tá Trần Minh Trọng pơma hơdăh, vei răk tơgoăt iŏk kơtang nơ̆r pơtho khan đơ̆ng Ƀok Hô: “Pơting dih băl jang pran kơtang ‘noh ‘mêm kơ eng teh đak, ‘mêm kơ eng teh đak lei kăl pơting dih băl jang pran kơtang. Dôm bơngai pơting dih băl jang pran kơtang ‘noh jĭ dôm bơngai ‘mêm kơ eng Teh đak hloh”, dôm sơnăm ou ki, tơdrong jang pơting dih băl jang pran kơtang lơ̆m khul ƀô̆ đô̆i dêh char Dak Lăk hlôi lang să roi năr roi mơ̆t hlom jơ̆p jang. Đơ̆ng trong tơlĕch jang ou, hlôi đei ƀôh kơ mơjĭt ‘nu bơngai, khul jang pran kơtang gơ̆h hơgei, hăm lơ trong jang hơ iă, trong jang ‘nao, tơgop lơ̆m tơ iung pơjing khul ƀô̆ đô̆i dêh char Dak Lăk gơ̆h hơgei nuih mơng, pran kơjăp iăp kơtang hloh dơ̆ng, trŏ lăp hăm dôm tơdrong jang lơ̆m chăl hle.