Đơ̆ng rŏng dôm jơ hrăt hrot pơm hla ar hành chính tơ̆ anih jang 1 ‘măng kơ xăh Ea Tul, đảng viên Y Dũng Hwing ‘noh tơklep hăm grŭp chă vei lăng sơđơ̆ng plei Tu, păng hơtŏk tơiung 8 sào sầu riêng kơ ŭnh hnam. Hơbĕch hơbal lơ̆m tơdrong jang, hơdrin vang jang tơdrong jang tơpôl, dôm tơdrong vang tơgop đơ̆ng Y Dũng hlôi đei chih iŏk, pôk pơdăh tơ̆ “Năr đĭ đăng kon pơlei vei lăng sơđơ̆ng teh đak xăh Ea Tul sơnăm 2023” ‘nao pơgơ̆r giĕng hơdrol. Đảng viên Y Dũng Hwing tơroi:

Hăm hơnăp jang ‘noh jĭ đảng viên, kơdih kâu ĭnh bơ̆jang lơ̆m pơlei vă đei tơdrong arih sa hơtŏk tơiung, ĭnh hơdrin đĭ jơhngơ̆m lơ̆m tơdrong jang, proh hơmet jơnăr bơ̆jang tơ̆ hnam păng tơdrong jang teh đak. Ĭnh đei pơtăm sầu riêng 8 sào đơ̆ng sơnăm 2017, sơnăm ‘nâu đei kơjă kơna ĭnh jô̆ pơhlom đei hloh 1 ti. Hăm hơnăp jang ‘noh jĭ bi thư chi bộ, ĭnh pơm jŭk yŭk trong hơlâu ăn kon pơlei, krao hơvơn kon pơlei vang tơgop jên vă chô̆ camera vei sơđơ̆ng tơ̆ ‘ngoăih trong vă vei lăng mŭk tơmam kon pơlei nhôn lơ̆m pơyan iŏk yua. Đơ̆ng noh kon pơlei kŭm tơgop jên păng chô̆  9 camera vei lăng sơđơ̆ng tơ̆ plei Tu. Dang ei ‘noh lơ̆m pơlei ưh pă đei đe tơ tông klĕ nhen hơdrol dơ̆ng bơih.

Kŭm yua kơ tơdrong arih sa sơđơ̆ng kơ pơlei pơla Ea Tul, đảng viên, kră pơlei Y Đhé Ayun oei tơ̆ plei Phơng ling lang hơdrin, pơnam, pơm jŭk yŭk trong hơlâu lơ̆m rim tơdrong jang. Ƀok tơbăt, teh mŭk tơmam đĭ klăih song ăn kơ đe kon, dang ei klo kăn sư lăp vei dơ̆ng 2 hek tar pơtăm cheh phe, tiu păng sầu riêng, iŏk yua rim sơnăm dang 400 triệu hlak jên. Kŭm hăm jang mŭk drăm hơgei, ƀok kŭm hơdrin tơ roi tơbăt krao hơvơn kon pơlei pơnam jang sa, pơjing pơlei pơla sơđơ̆ng hơtŏk tơiung:

Đảng viên jĭ bơngai năm hơdrol, pơm jŭk yŭk trong hơlâu ăn rim bơngai păng krao hơvơn kon pơlei, thoi noh kon pơlei mă vang jang. Bơngai đei đe lui yom ‘noh ŭnh hnam, pơđĭ ŭnh hnam tă kơ hơdrin bơ̆jang ăn tơdrong arih sa dang ei. Iŏk đơ̆ng ĭnh pơm kang ƀô̆ truh pơdơh hưu ‘noh ling lang đei tơdrong hơdrin bơ̆jang păng hơtŏk tơiung mŭk drăm ŭnh hnam, tơgŭm ăn kon pơlei păng ŭnh hnam jang kiơ̆ ĭnh; hơdrin tơ tă kơ kon pơlei jang kiơ̆ dôm trong jang tơgŭm đơ̆ng đảng, ưh kơ lê̆ kon pơlei pơm glăi khôi luơ̆t, tơroi tơbăt pơm kiơ̆ trong jang đơ̆ng Đảng, khôi luơ̆t đơ̆ng teh đak, vei lăng sơđơ̆ng lơ̆m pơlei pơla, pơm ƀlep khôi luơ̆t đơ̆ng teh đak.

Ea Tul jĭ 1 lơ̆m 5 xăh mă blŭng jang đang tơring tơrang ‘nao kơ dêh char Dak Lak đơ̆ng sơnăm 2016. Dang ei lơ̆m xăh đei hloh 2.870 ŭnh hnam hăm 12.800 ‘nu bơngai, lơ̆m noh kon pơlei bơngai Ê đê đei 97%. Kơ sô̆ ŭnh hnam dơnuh hin kơ xăh lăp oei pă 3,12 %, tŏ sĕt hloh apŭng Cư M’gar. Đảng bộ xăh Ea Tul dang ei đei 222 đảng viên hŏk hôp tơ̆ 18 chi bộ đảng tơring, lơ̆m noh 137 đảng viên Ê đê, đei vă jê̆ 62%, lơ hloh dêh char Dak Lak. Ƀok Y Uốt Ayun – Bí thư Anih jang Đảng xăh Ea Tul, tơbăt, dôm sơnăm âu ki, dôm đảng viên adoi tơƀôh đei hơnăp jang tơm pơm jŭk yŭk trong hơlâu lơ̆m jang sa, vei sơđơ̆ng tơ̆ tơring kon pơlei oei. Lơ̆m ‘noh ƀôh hơdăh nhen kră pơ lei Y Đhé Ayun păng Y Dũng Hwing, hlôi pơm jơhngơ̆m păr ang pran kơtang lơ̆m dôm tơdrong jang pơjei băl ‘mêm kơ teh đak tơ̆ tơring.

Ama Chen hlôi pơm kang ƀô̆ xăh, truh ƀơ̆t vih hăm pơlei pơla kŭm pơnam kơjang, jĭ bơngai đei đe lui yom lơ̆m pơlei, bơ̆jang răh, krao hơvơn răh kon pơlei pơnam bơ̆jang, arih ‘lơ̆ng hơiă, ưh kơ pơm tơdrong glăi hăm khôi luơ̆t đơ̆ng teh đak. Mă 2 ‘noh Y-Dũng Hwing jĭ kang ƀô̆ tư pháp kơ xăh, jĭ bơngai hơbĕch hơbal păng hlôh vao, ‘nhŏng Y- Dũng pơtăm ‘long sầu riêng, 1 sơnăm iŏk đei 200 – 300 triệu hlak jên. Kon pơlei kŭm hŏk pơhrăm jang kiơ̆ trong jang đơ̆ng Y-Dũng, păng xăh kŭm pôk sư pơm bí thư chi bộ, sư ling lang hơdrin jing bơngai chông hơdrol, đơ̆ng noh đĭ đăng dôm pơlei adoi gô jang kiơ̆.

Hăm dôm jơnei hơdăh lơ̆m tơdrong jang mŭk drăm hơgei kŭm nhen tơdrong jang tơpôl, dôm đảng viên Y Dũng Hwing, Y Đhé Ayun hlôi lơ ‘măng đei rim kơdră rim anih jang pôk pơ ư. Mă loi ‘noh, tơ̆ Năr đĭ đăng kon pơlei vei lăng sơđơ̆ng teh đak sơnăm 2023 tơ̆ xăh Ea Tul đei tơdrong vang truh akŏm đơ̆ng Phŏ Thủ tướng Trần Lưu Quang, pơđĭ Y Dũng Hwing, Y Đhé Ayun adoi chơt hơiă đei pôk pơ ư. Dôm tơdrong pơlung ‘noh roi hơtŏk dơ̆ng tơdrong ‘lơ̆ng hiă vă dôm đảng viên bơngai kon kông nhen Y Dũng păng Y Đhé hơnơ̆ng hơdrin, pơjing tơdrong arih sa ŭnh hnam hiôk hian, pơlei pơla roi pơdrŏng ‘lơ̆ng rŏ dơ̆ng.