Kiơ̆ tơroi tơbăt, jên jang Trung ương sơnăm 2024 tơgŭm bơ̆jang kiơ̆ 3 Tơdrong jang tơm teh đak (Tơdrong jang hơtŏk tơiung mŭk drăm - tơpôl tơring kon pơlei kon kông păng tơring groi kông; Tơdrong jang tơ jur dơnuh hin kơjăp păng Tơdrong jang pơjing tơring tơrang ‘nao) tơring Tây Nguyên ‘noh jĭ hloh 5.500 ti hlak jên, lơ̆m noh jên tơmơ̆t jang hơtŏk tơiung hloh 3.400 ti hlak jên, jên tơdrong jang hloh 2.100 ti hlak jên.

Tơlĕch jên tơmơ̆t jên jang teh đak truh ‘năr 30/6/2024, dôm dêh char tơring Tây Nguyên hlôi tơlĕch jên jang đei hloh 1.500 ti hlak jên, iŏk đei hloh 36% trong tơlĕch jang. Truh dang ei, tơring Tây Nguyên đei dang 373 xăh đei tơchơ̆t drơ̆ng ăn xăh jang đang tơring tơrang ‘nao; Kơsô̆ ŭnh hnam dơnuh hin kiơ̆ hơgăt dơnuh hin lơ trong sơnăm 2024 kơ tơring jur đơ̆ng 3-4% pơting hăm sơnăm 2023. Tơ̆ Hop akŏm, Phŏ Thủ tướng Trần Lưu Quang pơma hơdăh, vă tơlĕch jang kiơ̆ đei yua dôm Tơdrong jang tơm teh đak, dôm dêh char athei jang đĭ hơnăp jang, kơtang hloh dơ̆ng tơ̆ hơnăp kơnh; dôm tơring athei hŏk pơhrăm dih băl, tơring hơyơ jang tam mă đei ‘noh athei hŏk pơhrăm dôm tơring jang ‘lơ̆ng vă vang hơdai băl bơ̆jang jơ nei hơnăp jang đei pơjao.