Jăl jang 2018-2024, tơ̆ Tây Nguyên hlôi đei lơ tơdrong jang đĭ đăng kon pơlei vei lăng sơđơ̆ng Teh đak, jĭ hơnih hơdăh kiơ̆ trong chă vei lăng kơdih, chă tang găn kơ dih, đei tơpôl jang hơdai ‘lơ̆ng, đei tơpôl bơngai kon kông tơgŭm, hơdrin vang jang. Ƀôh hơdăh ‘noh jĭ dôm tơdrong jang “Vih hơlơ̆k đon lui, vei sơđơ̆ng pơlei pơla”, “Tơdrong jang vei lăng pơtho pơhrăm bơngai FULRO tơ̆ tơpôl” đơ̆ng dêh char Gia Lai; tơdrong jang “Hnam khop sơđơ̆ng - vei sơđơ̆ng lơ̆m tơpôl”, “Grŭp chă vei lăng kơdih găh tơdrong sơđơ̆ng lơ̆m tơôl păng pơtho pơhrăm hơdruh tơdăm pơm glăi khôi luơ̆t” tơ̆ dêh char Kon Tum; tơdrong jang “Hơnih kon pơlei oei sơđơ̆ng hiôk ưh kơ đei pơm glăi”, “3 sơđơ̆ng lơ̆m tơpôl Khŭl lui Tin lành Ea Sol” tơ̆ dêh char Đắk Lắk; tơdrong jang “5+1 vei lăng, pơtho pơhrăm, tơgŭm bơngai brŏk đơ̆ng hnam pơnă oei hơdai hăm tơpôl”, “Hnam khop Nhân Cơ sơđơ̆ng tơpôl” tơ̆ dêh char Đắk Nông; tơdrong jang “Tổ liên gia vei lăng găh tơdrong sơđơ̆ng”, “Kon pơlei kiơ̆ lui tơring kon pơlei kon kông thôn 4, xăh Tân Châu tơklep hăm tơdrong jang vei lăng sơđơ̆ng lơ̆m tơpôl” kơ dêh char Lâm Đồng…

Đơ̆ng tơdrong jang hlôi đei ƀôh lơ bơngai jang ‘lơ̆ng, pơm jŭk yŭk trong hơlâu bơ̆jang kiơ̆ ‘lơ̆ng trong jang đơ̆ng Đảng, tơdrong jang tơgŭm khôi luơ̆t đơ̆ng Teh đak, tơdrong hơgăt đơ̆ng tơring. Lơ bơngai hơdrin vang jang, tơgŭm rim khŭl lĭnh lơ̆m tơdrong vei sơđơ̆ng, tơroi tơbăt krao hơvơn kon pơlei kơchăng tơ̆ hơnăp tơdrong tơchĕng vă pơm kơ nê̆, tơdrong pơm che re tơgoăt tơgoăl hơdrĕch hơdrŭng, tang găn pơm glăi, tơdrong glăi lơ̆m tơpôl, tang găn ŭnh sa, pĭt ŭnh sa, vei lăng trong sơlam, jrăng sơlam, vei lăng cham char....

Tơ̆ Hop akŏm, Anih tơm vei lăng Kŏng an hlôi pơjao asong bằng khen ăn kơ 86 khŭl grŭp, bơngai jang ‘lơ̆ng tang măt ăn dôm tơdrong jang, bơngai jang ‘lơ̆ng lơ̆m tơdrong jang đĭ đăng kon pơlei vei lăng sơđơ̆ng teh đak tơring kon pơlei kon kông tơring Tây Nguyên jăl jang 2018-2024. Ƀok YDjan Êban, oei tơ̆ xăh Ea Ktur, apŭng Cư Kiun, dêh char Đắk Lắk jĭ 1 lơ̆m kơ sô̆ bơngai đei pôk pơ ư ‘măng ‘nâu, tơroi: “Ĭnh chơt hơiă dêh đei Anih tơm vei lăng Kŏng an hơvơn pơma dơnuh găh tơdrong jang tơpôl vei lăng sơđơ̆ng teh đak. Ĭnh tôch ‘nă. Đơ̆ng rŏng hop akŏm âu, ĭnh hơnơ̆ng vih tơ̆ tơring vang jang hăm kon pơlei jang tŏk ƀiơ̆ pơđĭ hloi găh mŭk drăm, joh ayŏ, tơpôl, vei sơđơ̆ng kŭm nhen jang sa đei ƀôh ƀiơ̆ hăm pơlei pơla.”

 Kŭm hăm hop akŏm atŭm lơ̆m tơring, hơdrô̆ tơ̆ dêh char Đắk Lắk, Anih tơm vei lăng Kŏng an kŭm hlôi pơgơ̆r Năr Đĭ đăng kon pơlei vei lăng sơđơ̆ng Teh đak lơ̆m tơring kon pơlei kon kông sơnăm 2024. Kiơ̆ tơroi tơbăt, tơdrong jang đĭ đăng kon pơlei vei lăng sơđơ̆ng Teh đak hlôi đei dôm hơyak hơtŏk tơiung pran kơtang, jrŭ să đơ̆ng dêh char truh tơring. Lơ tơdrong jang vei lăng găh tơdrong sơđơ̆ng, dôm grŭp jang tang găn pơm glăi hơtŏk đei yua. Pơma tơ̆ năr akŏm, Trung tướng Lê Quốc Hùng, Phŏ Kơdră Anih tơm vei lăng Kŏng an pơma hơdăh: Đắk Lắk tơ̆ anih kơdrơ̆m tơring Tây Nguyên đei hơnih teh gĭt kăl găh tơdrong sơđơ̆ng, chĭnh trĭ, mŭk drăm, joh ayŏ - tơpôl. Yua thoi noh, tơdrong jang vei sơđơ̆ng, pơm hơnih sơđơ̆ng, pơyua ăn hơtŏk tơiung mŭk drăm - tơpôl ‘noh jĭ hơnăp jang tôch kơ gĭt kăl hăm pơđĭ khŭl jang chĭnh trĭ.

Trung tướng Lê Quốc Hùng athei, Đắk Lắk hơnơ̆ng tŭn pran tơdrong jang đĭ đăng kon pơlei vei lăng sơđơ̆ng teh đak, tơgop tơiung păng hơtŏk hơnăp jang, jơhngơ̆m pran tih tên đơ̆ng Kon pơlei: “Kăl kơ bơngơ̆t hơmet ming, pơjing khŭl jang chĭnh trĭ tơ̆ tơring pran kơjăp tôm tơdrong. Rim kang ƀô̆, đảng viên athei năm kiơ̆ hơdai, hlôh vao tơpă jơhngơ̆m đon tơchĕng, ‘meh vă đơ̆ng kon pơlei, yua kơ tơdrong đei yua kơ Kon pơlei; pơm jŭk yŭk trong hơlâu lơ̆m tơdrong jang đĭ đăng kon pơlei vei lăng sơđơ̆ng Teh đak. Tŭn pran tơdrong jang krao hơvơn kon pơlei hơdai hăm tơroi tơbăt hơvơn, hơtŏk ‘lơ̆ng đon hlôh vao đơ̆ng kon pơlei. Akŏm năm mơ̆t lơ̆m dôm tơring tơm, tơring kon pơlei kon kông, tơplih ‘nao dôm trong jang tơroi tơbăt vă pơjing tơdrong jang đĭ đăng kon pơlei vei lăng sơđơ̆ng Teh đak.”

Tơ̆ năr akŏm, Anih tơm vei lăng Kŏng an păng Anih vei lăng kon pơlei dêh char Đắk Lắk hlôi asong lơ tơpu tơmam ăn kơ dôm ŭnh hnam bơngai kon kông đei tơdrong arih sa mơmat tat lơ̆m pơlei tơm Buôn Ma Thuột. ‘Măng âu, 1 khŭl tơpôl, 1 ‘nu bơngai iŏk Bằng khen đơ̆ng Anih tơm vei lăng Kŏng an; 1 khŭl tơpôl, 3 ‘nu bơngai iŏk hla ar pơ ư đơ̆ng Kơdră vei lăng Kŏng an dêh char Đắk Lắk yua kơ đei jơnei ‘lơ̆ng hloh lơ̆m tơdrong jang Đĭ đăng kon pơlei vei lăng sơđơ̆ng Teh đak sơnăm 2024.