Kră pơlei Rơ Chăm Tích (bơngai Jrai) oei tơ̆ pơlei Mook Đen 2, tơring Ia Dom, apŭng Đức Cơ, dêh char Gia Lai jĭ mĭnh lơ̆m dôm bơngai đảng viên gơ̆h hơgei ‘lơ̆ng hơ iă hloh lơ̆m iung jang hơdoi hăm rim hơnih Đảng, kơdră tơring păng rim hơnih bơ̆ jang vă pơrô̆ pơrôp, hơvơn kon pơlei vei lăng trong sơlam teh đak, hơdrơ̆ng sơlam teh đak.

Lơ sơnăm kơ au, ƀok hơngŭr năm truh rim hnam chă pơrô̆, pơtho khan ăn kon pơlei băt hơdăh, ưh kơdau jăk oei tơ̆ teh đak đe; hŭt hloi tơdrong bơbĭt iŏk teh vă mŭih rŏh choh mir tơ̆ tơring sơlam teh đak; jang kiơ̆ kơjăp jơhngơ̆m đon tơgoăt tơgoăl, xut hŭt dôm tơdrong joăt joe pă trŏ lăp, pơting dih băl jang sa, jang ksu, chehphe vă atŏk tơ iung mŭk drăm ŭnh hnam atŏk tơ iung hlŏh dơ̆ng. Kră pơlei ƀok Rơ Chăm Tích tơbăt: Ia Dom ‘nŏh tơring sơlam teh đak tơnap tap hloh, bơngai kon kông tim mă hlôh vai lơ găh khôi luơ̆t. Pơgơ̆m lơ̆m tơdrong au, rim khul kơnê̆ hơnơ̆ng chă pơhlŭ pơdôr, pơchôih kon pơlei kơdau jăk oei tơ̆ teh đạ đe, pơm chere tơdrong tơgoăt tơgoăl pôm nơ̆r ƀơ̆r đon hơdrĕch hơdrung. Hăm ƀok, vei lăng năng tông trong sơlam teh đak, hơdrơ̆ng sơlam teh đak, vei kơjăp tơdrong sơđơ̆ng tơring sơlam teh đak ‘nŏh jĭ tơdrong gĭt kăl hlŏh. “Tơ̆ au tôch sơđơ̆ng, găh bơ̆ jang vei lăng sơlam teh đak ‘nŏh ĭnh năm tơ̆ kơđông ƀô̆ đô̆i atŭm hăm kơđông năm pơtrui, năm gak vei lăng hơdrơ̆ng sơlam teh đak. Sơnăm ayơ jei năm, vă pơrô̆ pơrôp, pơtho tơbăt ăn kon pơlei ưh kơ gơ̆h chă mơ̆t glăi păh to sơlam teh đak; chă jang mir ƀa păh bơ̆n đĕch. Mă kăl khul mơlôh găh tơdrong iŏk ŭnh om hrôih ba jei pơtho akhan lơ kơ yuơ trong bơ̆ jang đơ̆ng Đảng păng khôi luơ̆t Teh đak kơ̆m, đe hơ ioh iŏk ŭnh om hrôih ‘nŏh ưh kơ gơ̆h ôh”.

Yă Lê Thị Khánh Hòa, Bí thư Đảng tơring Ia Dom, apŭng Đức Cơ tơbăt: Lơ̆m tơring đei 4 ‘nu kră pơlei. Rim kră pơlei hơnơ̆ng pơm jŭk yŭk trong hơlau lơ̆m rim tơdrong jang lơ̆m tơring, tơgop atŏk tơ iung mŭk drăm-tơpôl, vei lăng sơđơ̆ng chinh trĭ păng sơđơ̆ng dơ̆ng kơjăp tơpôl tơ̆ tơring. Mă kăl, Ia Dom ‘noh tơring sơlam teh đak kơna rim kră pơlei, jĭ bơngai đảng viên pơm jŭk yŭk trong hơlau, hơnơ̆ng atŭm hăm rim hơnih bơ̆ jang, ƀô̆ đô̆i Kơđông ƀô̆ đô̆i vei lăng sơlam teh đak chă pơrô̆ pơrôp, pơtho khan ăn kon pơlei vang vei lăng năng tông trong sơlam teh đak, hơdrơ̆ng sơlam teh đak, vei lăng tơring sơlam kơ teh đak. “Hăm tơring ‘nŏh rim kră pơlei, thôn trơng, bơngai đei kon pơlei yom hlôi jang ‘lơ̆ng hơnăp jang kơdih. Đơ̆ng kơtum kơtŏng, ŭnh hnam, pơm jŭk lơ̆m jang kiơ̆ lơ̆m tơdrong chă pơkong, groong ƀŭ, jang ‘lơ̆ng hơrih sa ‘lơ̆ng hơ iă, chă pơtho khan ăn tơdrong iŏk ŭnh om hrôih, pơrô̆ hơvơn pơtho khan hŏk tro hơdrin năm tơ̆ hnam trương hok pơhrăm, răt ƀao hiêm ăn kon pơlei kơna đơ̆ng noh kon pơlei mă mơ̆ng păng pơm kiơ̆”.

Jei lei lăi, tơ̆ apŭng sơlam teh đak Chư̆ Prông, rim kră pơlei, đảng viên jei bơ̆ jang ‘lơ̆ng hơnăp jang, tơdrong lui yom đơ̆ng kon pơlei kơna chă pơrô̆ pơrôp kơtum kơtŏng, kon pơlei vang atŏk tơ iung mŭk drăm-tơpôl, tơ iung pơjing Đảng păng khul jang chinh trĭ; Vei kơjăp sơđơ̆ng, tơ iung pơjing tơgoăt tơgoăl hơdrĕch hơdrung. Ƀok Rơ Lan Hlêk, kră pơlei kơ pơlei Klah, tơring Ia Mơ, apŭng Chư Prông tơbăt:“ Jĭ tơring sơlam teh đak kơna tơdrong chă pơrô̆ pơrôp kon pơlei jei tơƀơ̆p tơnap tap mă lei kơdih ba bơ̆ jang tơdrong au hơnơ̆ng vă băt hơdăh tôm tơdrong lơ̆m pơlei. Kơdih ba ‘noh đei kon pơlei pôk tơmơ̆t pơm kră pơlei kơna ba hơdrin đĭ ai. Dang yơ ba oei hơrih ‘nŏh ba oei hơnơ̆ng iung jang tơgŭm ăn kon pơlei vă kon pơlei hlôh vao hloh dơ̆ng găh trong bơ̆ jang khôi luơ̆t đơ̆ng Đảng păng Teh đak hăm tơring sơlam teh đak, tơring kon kông”

 Hrei au lơ̆m dêh char Gia Lai đei 955 ‘nu kră pơlei, bơngai đei kon pơlei yom lơ̆m tơring kon kông, lơ̆m au đei lơ đảng viên. Lơ̆m jăl sơnăm 2021-2023, dôm bơngai đei kon pơlei yom tơ̆ Gia Lai hơnơ̆ng kơrŭn jơhngơ̆m iung jang hơdoi hăm rim hơnih bơ̆ jang tơ̆ tơring chă pơrô̆ pơrôp, pơtho khan kon pơlei vang pơm kiơ̆ tơdrong chă tơgop, tơgŭm kơtang lơ̆m tơdrong jang “Đĭ đăng kon pơlei tơgoăt tơgoăl tơ iung pơjing tơring tơrang ‘nao, tơring kơdrơ̆m gơ̆h hơgei” hăm hloh 700 ti hlak jên, plang ăn hloh 132.000m2 teh păng vang jang hloh 47.000 năr jang. ‘Ngoăih kơ ‘noh, dôm bơngai đei kon pơlei yom tơgum djru ăn hloh 20.000 ŭnh hnam kon kông dơnuh tơplih jơhngơ̆m đon tơchĕng, trong jang sa, hơdrin jang sa yak hloh dơnuh hin, tơgop pơm tơjur ŭnh hnam dơnuh lơ̆m dêh char. Ƀok Hồ Văn Niên, Kơdră jang lơ̆m Trung ương Đảng, Bí thư Đảng dêh char Gia Lai hơlen: Atŏk hơnăp jang, sơnong jang hăm kon pơlei, dôm bơngai đei kon pơlei yom tơ̆ Gia Lai hlôi jang ‘lơ̆ng hơnăp jang kơdih lơ̆m bơ̆ jang chă pơrô̆ hơvơn, pơtho khan ăn kon pơlei jang kiơ̆ tơdrong jang atŏk tơ iung mŭk drăm-tơpôl, vang iung jang vei lăng sơđơ̆ng dơ̆ng kơjăp tơ̆ tơring. “ Sơnong, hơnăp jang kơ dôm bơngai đei kon pơlei yom ‘noh tơgŭm djru pơjing đei tơdrong hơrih sa sơđơ̆ng kơ kon pơlei tơ̆ rim pơlei pơla adoi nhen tơdrong sơđơ̆ng chinh trĭ, sơđơ̆ng tơpôl tơ̆ tơring đei vei kơjăp. Vei răk gei dôm tơdrong oei sa joh ayŏ ‘lơ̆ng rŏ hơbŏ nhen đơ̆ng sơ̆ kơ kon kông, kơna khul kơdră đảng, kơdră chĕp pơgơ̆r tơring kơ apŭng păng kơ dêh char bơ̆n dau, bơ̆n tôch hôn bơnê hăm hơnăp jang kơ đe kră pơlei păng dôm bơngai đei kon pơlei yom kiơ̆”.