Đơ̆ng rŏng 11 sơnăm đơ̆ng năr Tổng Bí thư tŏk ngôi, pơma nuh, hăm lơ nơ̆r pơlung, ƀok Thào Dìn – 1 ‘nu bơngai jang chŭn mir, bơngai Mông tơ̆ plei Cốc Phương, xăh Bản Lầu, apŭng Mường Khương, dêh char Lào Cai dang ei vă jê̆ 60 sơnăm bơih, oei ƀlŏk hơnơ̆ng nơ̆r tơtă tôch hơiă đơ̆ng bơngai chĕp kơ̆l tih hlŏh kơ Đảng.

Sơnăm dŏh sơ̆, ƀok jĭ 1 ‘nu bơngai tang măt ăn kon pơlei jang chŭn mir jang xa gơ̆h đơ̆ng Mường Khương kŭm nhen Lào Cai đei Tổng Bí thư Nguyễn Phú Trọng truh ngôi tơ̆ hnam. Adrol kơ ‘nŏh, lơ bơngai băt truh ƀok Thào Dìn hăm hơnăn “pơtao chik”, 1 sơnăm pơtăm chik đei iŏk yoa truh 700 triu hlak jên. Mă lei ƀât Tổng Bí thư truh, ưh lăp ‘măn hơdrô̆ nơ̆r pôk pơ ư đĕch, ƀok oei pơma truh lơ tơdrong pơm ăn rim bơngai đơ̆ng kăn ƀô̆, kơdră chĕp kơ̆l truh tơ̆ kon pơlei athei tơchĕng ming dơ̆ng. ‘Nŏh jĭ jang tŏk mŭk drăm athei năng truh tơdrong tơgŭm băl jang tŏk pơdrŏng hai, ưh gơ̆h lê̆ đei tơdrong pơdrŏng, tơnuh plŏh plĕch băl dêh; bơngai pơdrŏng athei tơgŭm ăn bơngai oei tơnuh, đảng viên pơdrŏng chă tơgŭm ăn đảng viên oei pơmat tat ƀiơ̆ vă “đĭ đăng vang tŏk pơdrŏng, đĭ đăng gơ̆h klăih đơ̆ng tơnuh hin ngăl”:

“Mơ̆ng ƀok pơma thoi noh ba kŭm athei hŏk pơhrăm kơdih, chă trong jang xa thoi yơ vă unh hnam roi tŏk, athei mât 1 ƀơ̆r đon hai, đei tơdrong kiơ pơmat tat đĭ đăng pơlei athei tơgŭm băl thoi nŏh mă gơ̆h tơplih ‘lơ̆ng.”

Hăm Thào Dìn, dôm nơ̆r tơtă đơ̆ng Tổng Bí thư kŭm jing jơhngâm pran vă truh dang ei, mă đơ̆ng ưh pă đei tơnuh kiơ bơih mă lei ƀok oei rơih iŏk trong arih xa ưh đei pơang pơrŏ, oei hơnơ̆ng arih lơ̆m hnam man lăp ai, rim năr năm jang tơ̆ mir roh. Kon pơlei tơ̆ plei Cốc Phương pơjei băl jang xa, dang ei ưh pă đei unh hnam tơnuh, đei hlŏh 70% jĭ unh hnam đei ƀôh, đei pôk ăn hla ar chih tơbăt jĭ pơlei Tơring tơrang ‘nao ‘lơ̆ng rŏ.

Jĭ bơngai đei Tổng Bí thư truh ngôi, pơma nuh hơdai hai, Trung tá Nguyễn Ngọc Hà, Yŏng kơ đông linh vei lăng tơring sơlam Bản Lầu, apŭng Mường Khương oei ƀlŏk hơnơ̆ng dôm nơ̆r pơlung, tơiung jơhngâm đơ̆ng Tổng Bí thư, kŭm hăm nơ̆r tơtă ăn kăn bô̆, linh athei jang ‘lơ̆ng tơdrong vei lăng tơring sơlam, jang tơbôl, mă loi athei pơjing đei jơhngâm đon kon pơlei sơđơ̆ng, dơ̆ng kơjăp.

“Kiơ̆ nơ̆r Tổng Bí thư Nguyễn Phú Trọng tơtă, nhôn hlôi tơgŭm ăn kon pơlei kiơ̆ đơ̆ng lơ tơdrong jang tôch đei yoa nhen ƀơk ăn tơđăh ‘long, kon yŏng, pơtho ăn kon pơlei tơplih ming trong jang xa vă đei tơdrong arih xa sơđơ̆ng, man hnam hŏk, sơlŭng đak hum, pơtho glơi vă tang găn glơ̆k tơ̆ đak ăn đe hơiŏh, vă tơƀôh jơhngâm đon băt bơnê kơ kon pơlei hlôi tơgŭm, oei hơdai hăm nhôn.

Chih răk nơ̆r tơtă đơ̆ng Tổng Bí thư, anih chĕp kơ̆l đảng, khul kơdră pơgơ̆r tơring, khul linh ƀô đô̆i păng kon pơlei 12 hơdrĕch hơdrung ‘nhŏng oh tơ̆ Bản Lầu dôm sơnăm âu ki hơnơ̆ng mât 1 ƀơ̆r đon, vei kơjăp tơdrong pơm tơm, tơdrong sơđơ̆ng tơ̆ tơring sơlam. Bản Lầu dang ei ưh lăp dơ̆ng ƀât tơring pơtăm chik, pơtăm prit tơm kơ Lào Cai đĕch, mă oei đei dơ̆ng kơhrĕng ha ‘long hla che, ‘long kuê̆, đei mir chŭn ƀa ‘lơ̆ng Séng Cù, oei adrin jang tŏk jing xăh tơring tơrang ‘nao pơdrŏng, đei ƀôh tơ̆ hơnăp kơnh./.