Tơ̆ ‘măng pơlong, 20 ‘nu pơlong tang măt ăn dôm tơdrong jang kơtă tơroi păng tơl nơ̆r dôm tơdrong apinh đơ̆ng jơnŭm châ̆m hơlen gah tơdrong vă iung pơm jang kơ po. ‘Nâu jing dôm tơdrong tơlĕch jang hơgei hloh đei rơih đơ̆ng rŏng kơ 2 ‘măng pơlong hơgơ̆l, pơtơm đơ̆ng khei 2 âu ki.

Đơ̆ng rŏng jê̆ 2 khei tơlĕch pơlong, tơdrong pơlong hlôi iŏk đei hloh 100 tơdrong vă jang hơgei đơ̆ng jơnŭm jang đe drăkăn vang pơlong hăm hơnăn “tơplih jơk” rơgoh ‘lơ̆ng lơ̆m pơm jang, tĕch pơdro. Dôm tơdrong jang hăm dôm tơmam drăm kăp gĭt, iŏk yua dôm tơdrong pran đơ̆ng tơmam drăm đei lơ̆m tơring nhen kaphê, măk ka, điu, dôm ‘long pơtăm pơm pơgang; iŏk yua dôm tơmam djah lơ̆m choh pơtăm vă pơm tơlĕch phŏng, mơ̆r rơgoh ‘lơ̆ng hăm cham char.