Ƀar sơnăm năm tơ̆ au, tơdrong tĕch mơdro tơdrô ge Êđê kơ mŏ H’Trang Niê, oei tơ̆ ƀuôn Kna A, tơring Cư Mgar, apŭng Cư Mgar, dêh char Dak Lăk pơih să, chă tĕch mơdro roi năr hlot roi lơ. Kiơ̆ đơ̆ng mŏ H’Trang Niê, gơnơm iŏk yua mạng tơpôl nhen Zalo, Facebook, vang mơ̆t lơm khul tĕch mơdro ... tơgŭm ăn mŏ tĕch mơdro hlot lơ pơtêng hăm trong tĕch mơdro sơ̆ ki. Atŭm hăm ‘noh, mŏ oei đei Khul drŏ kăn tơring tơbăt vang mơ̆t lơ̆m khul drŏ kăn pơjing tơdrong jang dăh mă vang năm hŏk pơhrăm kiơ̆ trư̆k tuyên. Lăp hăm điên thoăi chĕp ti đei tơgoăt hăm Internet, mŏ gơ̆h vang hŏk pơhrăm kơtă lơ̆m hnam. Jei kiơ̆ đơ̆ng mŏ H’Trang, đơ̆ng mă vang mơ̆t lơ̆m rim khul, mŏ mă băt tôm tong păng tĕnh koăng dôm tơdrong jang kơ yuơ Khul drŏ kăn kơpal tơlĕch ăn tơring, tơdrong chă tơbăt dih băl kơtơ̆ng ang au to ƀônh ƀŏ hloh."Ĭnh ‘meh vă hŏk pơhrăm păng pơma dơnuh hăm rim pơmai oh lơ̆m au, băt lơ hloh dơ̆ng găh tơdrong jang sa, tĕch mơdro, tơbăt dih băl găh dôm tơdrong ‘lơ̆ng hơ iă chă pơvih pơvăn lơ̆m ŭnh hnam hăm tơdrong jang tơ̆ ‘ngoăih".

Ư̆h khan lăp hơdrô̆ pơmai oh lơm khul mă lei khul kang ƀô̆ Khul jei tôch rơvơn iŏk yua mạng tơpôl vă tơlĕch tơdrong jang. Mŏ Nguyễn Thị Thanh Nga, Kơdră Khul drŏ kăn thôn Đoàn Kết, tơring Ea Mdroh, apŭng Cư Mgar tơbăt: Tơplih ăn năm tơroi tơbăt truh hloi hăm rim bơngai ‘noh dang ei, lăp chă chih lơ̆m điên thoăi ‘noh đĭ đăng pơmai oh lơ̆m khul jei băt hloi dôm tơdrong mă bơ̆n ‘meh vă hơvơn păng tĕnh koăng tơl hơdăh, tơlĕch jang kiơ̆."Dang ei đei kơtơ̆ng ang Zalo ‘noh kơdră kơpal pơjao dôm hla bơar, kơthơ krao hơvơn dăh mă tơdrong jang ‘noh ba gơ̆h phĭn iŏk păng kơpi tơmơ̆t lơ̆m trang kơ bơ̆n vă pơtruh kơtă ăn pơmai oh, pơmai oh chă pơma dơnuh. Păng mưh pơgơ̆r hop akŏm ‘noh chă pơma dơnuh dih băl koăng hloh, dă ƀiơ̆ tơhoach lơ jơ ‘năr ăn pơmai oh".

Jang kiơ̆ kmăi kmŏk pơre nơ̆r oei tơlĕch jang tơ̆ rim khul drŏ kăn lơ̆m dêh char Dak Lăk lơ̆m iŏk yua phân mêm vei lăng kang ƀô̆, bơngai jang lơ̆m khul kơ yuơ Trung ương Khul tơlĕch jang đơ̆ng sơnăm 2021. Mŏ Ngô Thị Kim Long, Kơ iĕng Kơdră chĕp pơgơ̆r Khul drŏ kăn tơring Cư Dliê Mnông, apŭng Cư Mgar tơbăt, phân mêm au tơgŭm ăn pơmai oh hơlen, vei lăng ‘lơ̆ng tơdrong jang kơ hloh 1.700 ‘nu bơngai lơ̆m khul tơ̆ tơring mă lei hoei tơhoach jơ ‘năr răk mong, hơlen lơ̆m hla bơar au to."Ba đei Khul drŏ kăn apŭng pơtho ăn chih tơmơ̆t hơnăn rim bơngai kơ khul lơ̆m kmăi, chih tơmơ̆t dôm tơdrong jang, trong tơgum djru rim bơngai lơ̆m khul. Ba ƀôh tôch rơvơn kơ yuơ phân mêm au răk akŏm đei lơ tơdrong lơ̆m bơ̆ jang khul păng tơdrong jang drŏ kăn, tôch hơdăh".

        Tơdrong tơchơ̆t pơm lêh hop akŏm mă 18, jăl jang 2021 - 2026 kơ Khul drŏ kăn dêh char Dak Lăk sơkơ̆t hơdăh: jang kiơ̆ kmăi kmŏk pơre nơ̆r lơ̆m bơ̆ jang Khul ‘noh 1 lơ̆m 2 trong jang gĭt kăl hloh lơ̆m bơ̆ jang khul păng tơdrong jang đe drŏ kăn. Kiơ̆ kơ ‘noh, rim sơnăm Khul jei pơgơ̆r ‘măng hop akŏm pơma dơnuh, pơih lăm pơtho pơhrăm tơdrong bơ̆ jang ăn kang ƀô̆ khul, pơtho tơbăt jang kmăi kmŏk ksô̆ lơ̆m pơjing tơdrong jang, choh jang sa pơm tơlĕch, tĕch mơdro tơmam drăm ăn bơngai drŏ kăn. Yă Tô Thị Tâm, Kơdră chĕp pơgơ̆r Khul drŏ kăn dêh char Dak Lăk tơbăt: sơnăm au hăm hơnăn Atŏk kơtang jang kiơ̆ kmăi kmŏk pơre nơ̆r lơ̆m tơdrong jang Khul, rim hơnih Khul gô tơlĕch ăn truh rim pơmai oh lơ̆m khul jang kiơ̆ tơnăp. Adoi pơchoh trong, apĭnh chă răt ăn tôm tong kmăi tinh bơ̆ jang ăn Khul drŏ kăn tơ̆ tơring păng pơgơ̆r pơtho tơbăt hlôh vao tơdrong jang kmăi kmŏk kơsô̆ ăn rim bơngai lơ̆m khul."Nhôn hlôi hơvơn đei hloh 30 tŏ kmăi tinh. Lơ̆m khei năr kơnh nhôn hơnơ̆ng chă pơrô̆ hơvơn vă ăn đĭ đăng Khul tơ̆ tơring jei đei kmăi tinh vă bơ̆ jang. Đĭ đăng kang ƀô̆ Khul păng rim bơngai drŏ kăn lơ̆m khul jei băt yua kmăi kmŏk pơre nơ̆r, băt truh kmăi kmŏk kơtơ̆ng ang lơ̆m chăl 4.0 hrei au".

Jang kiơ̆ kmăi kmŏk kơtơ̆ng ang pơre nơ̆r hlôi tơgop pơm tơplih kơtang lơ̆m rim tơdrong jang Khul drŏ kăn dêh char Dak Lăk. Đơ̆ng noh pơm hơtŏk iŏk đei jơnei rim tơdrong jang, pơtrŭt pơmai oh tĕnh koăng druh kiơ̆ tom hăm kmăi kmŏk kơsô̆, vang iung jang đĭ ai lơ̆m tơdrong jang tơplih kơsô̆ teh đak.