Khul drŏ kăn rim tơring, thi trân iung jang hơdoi dăr lăng hơlen rim ŭnh hnam ‘noh bơngai kon kông ‘meh vă chă tŏk iŏk kon jên, tơgŭm djru teh oei, teh jang sa, tơplih tơdrong jang păng atŏk tơ iung choh jang sa kiơ̆ trong đei iŏk yua kơjăp vă tơgŭm djru kon jên jang kiơ̆ tơdrong tơchơ̆t. Truh dang ei, Khul drŏ kăn apŭng hơnơ̆ng iung jang dơ̆ng pang tang măt hăm Hơnih mong jên tơgŭm djru tơpôl ăn rim drŏ kăn dơnuh tŏk iŏk jên vă atŏk tơ iung choh jang sa hăm kon jên tŏk iŏk hloh 195 ti hlak jên. ‘Ngoăih kơ ‘noh, Khul dơ̆ng pang hăm Hơnih mong jên choh jang sa păng Atŏk tơ iung tơring tơrang apŭng Di Linh hloh 10 ti hlak jên ăn 150 ŭnh hnam tŏk iŏk. Yă Ka Hương- Kơ iĕng Kơdră chĕp pơgơ̆r Khul drŏ kăn apŭng Di Linh, dêh char Lâm Đồng tơbăt:“Di Linh ‘noh apŭng đei lơ kon kông hơrih sa, lơ̆m ou oei lơ ŭnh hnam dơnuh, lơ̆m ou đei ŭnh hnan pơmai oh bơngai kon kông. Khul drŏ kăn apŭng hlôi đei lơ trong jang vă xut xa dơnuh hăm rim drŏ kăn lơ̆m khul ŭnh hnam dơnuh chă tŏk iŏk kon jên vă tơmơ̆t jang sa păng Khul drŏ kăn apŭng jei pơjing Hơnih mong jên Kơ yuơ bơngai drŏ kăn dơnuh, kơ yuơ pơmai oh vang tơra tơgop minh ‘nu 10.000 hlak jên, păng hrei ou, kon jên mong ou hlôi đei truh 1 ti hlak jên. ‘Moi kiơ̆ kon jên mong ou, pơmai oh gơ̆h chă tŏk iŏk vă tơmơ̆t choh jang sa, xut xa pơngot rơvĕt tơjur dơnuh”.