Lơ̆m hnam iĕ kơ 3 ‘nu mŏ oh RahLan H’Kưm tơ̆ plei Chuêt Ngol, xăh Chư Á, plt Pleiku, dêh char Gia Lai roi chơt hơiă ƀiơ̆ mưh đe mĕ, đe mŏ jĭ công an găh Khul drŏ kăn Công an dêh char Gia Lai năm ngôi, pơchơt hăm đe kon. Mŏ kơdră kơ 2 ‘nu ŏh ‘lơ̆p ‘nŏh jĭ H’Kưm sơnăm ‘nâu ‘nao 15 sơnăm tơroi: mĕ ƀă 3 ‘nu mŏ oh nhôn lôch đunh kơ âu đei 6 sơnăm bơih. Đơ̆ng noh truh dang ei, Khul drŏ kăn Công an dêh char iŏk tơgŭm, vei rong đơ̆ng tơdrong sŏng xa, truh hŏk pơhrăm ăn 3 ‘nu mŏ oh. Đe oh hơnơ̆ng đei đe mĕ, đe duch công an pơlung, tơgŭm ăn rim tơdrong: ƀât lăp ‘nŏh hơpăh ăn hơbăn ao ‘nao, ƀât lăp ‘nŏh răt ăn hla ar, tơmam hŏk pơhrăm.

H'Kưm pơma: “Rim năr mưh đei tơdrong kiơ ‘noh inh krao ăn đe mŏ truh tơgŭm. Đe mŏ pơlung nhôn lê̆ hŭt hŏk, athei băt ‘mêm băl. Oh ƀôh da ƀiơ̆ pơmat tat păng hiôk jơhngâm ƀiơ̆. Oh vă adrin chu yom vă tơgăl hăm tơdrong tơgŭm đơ̆ng đe mŏ”.

Ưh lăp hơdrô̆ mŏ oh RahLan H’Kưm, tơ̆ dêh char Gia Lai oei đei 31 ‘nu oh pơti dơ̆ng, mă lơ ‘nŏh jĭ bơngai kon kông đei dôm khul grŭp drŏ kăn Công an dêh char Gia Lai iŏk tơgŭm. Hăm kơsô̆ jên mong, tơnôm đơ̆ng đe kăn ƀô̆, linh tơ̆ dôm anih jang păng jên vang tơgop đơ̆ng tơpôl, khul drŏ kăn pơm ‘lơ̆ng kla jên tơgŭm ăn 1 ‘nu mon đơ̆ng 4 - 5 triu 1 sơnăm. Kơsô̆ jên âu tơgŭm ăn đe hơiŏh pơti đei dơ̆ng tơdrong ‘lơ̆ng vă hŏk pơhrăm păng răt tơmam yoa kăl. 

Thượng tá Nguyễn Thị Ngọc Thúy- lơ̆m Khul drŏ kăn Công an dêh char Gia Lai ăn tơbăt, lơ mon đei iŏk tơgŭm, vei rong âu hŏk gơ̆h ngăl, roi đunh roi ‘mêm băt kơ đe mĕ hơđơ̆ng: “’Ngoăih kơ pơngơ̆t, năm ngôi, jet gia pơma nuh găh tơdrong hŏk pơhrăm, jơhngâm pran đe kon mon, mưh đei jơ rơhơi ‘nŏh inh năm tơ̆ hnam, chông ba đe mon chă ngôi. Inh chông đe mon năm ngôi tơ̆ hnam nhôn hai vă đe mon pơm juăt hăm kon drŏ kăn inh. Mưh hŏk pơhrăm, rim tơdrong đe mon roi tơbăt ngăl, krao điên thoăi mă ưh ‘nŏh chih tin nhăn ăn kơ mĕ vă mĕ tơgŭm ăn. ‘Nŏh jĭ tơdrong tôch hơiă”.

Kŭm hăm tơdrong pơngơ̆t đơ̆ng dôm khul grŭp drŏ kăn, sơnăm 2022 xăh Phú An, apŭng Đak Bơ pơih lăm pơtho xoă mu chư ăn đe mŏ oh bơngai Bahnar. Gơnơm thoi noh, đơ̆ng ưh băt chư, lơ mŏh oh jing gơ̆h đŏk, gơ̆h chih, gơ̆h jô̆ hơlen lơ̆m tơdrong tĕch mơdro. Mŏ Bùi Thị Minh Dương-Kơdră vei lăng Khul drŏ kăn xăh Phú An, apŭng Đak Bơ ăn tơbăt, đơ̆ng tơdrong đei yoa âu, tơdrong pơih lăm pơtho xoă mu chư đei pơgơ̆r truh tơ̆ dôm xăh nai. Sơnăm ‘nâu, khul drŏ kăn dôm xăh Yang Bắc, Ya Hội kŭm pơih dơ̆ng 2 lăm pơtho xoă mu chư, sơng đei 160 ‘nu mŏ oh vang hŏk:

“Mŏ oh oei ưh kơ juăt, năm hŏk oei hrơ mơlou, ưh pơ̆n iung đŏk hli đŏk ưh kơ tro, kô hiĕk, ƀât lăp lơ mŏ đei pơjao pơm ƀai tơ̆ hnam mă lei ưh đei pơm. Mưh đei pĭnh hơlen ‘nŏh akhan, chĕp ‘long chih mơmat hlŏh kơ chĕp gơ̆r ‘nhik jang mir dŏng. Mưh chih đei chư blŭng a ‘nŏh đon adrin đơ̆ng đe mŏ oh roi iung. Truh dang ei, đe mŏ đĭ gơ̆h đŏk, gơ̆h chih, gơ̆h hŏk ƀai hơdai hăm kon hơ ‘lơ̆p păng gơ̆h pơih năng bơ̆n ineternet vă tơmât yoa lơ̆m tơdrong jang xa, sut pơngot, tơjur tơnuh hin”. 

Yă Rơ Chăm H’Hồng- Kơdră vei lăng Khul drŏ kăn dêh char Gia Lai ăn tơbăt, hơdai hăm iŏk tơgŭm ăn hơiŏh pơti păng pơih lăm pơtho xoă mu chư ăn ŏh mŏ bơngai kon kông, rim khul grŭp drŏ kăn tơ̆ dêh char oei mong akŏm jên hŏk ƀŏng vă hơpăh ăn hŏk tro tơnuh hŏk rơgei, đei đon yak hlŏh pơmat tat, man hnam ‘mêm mơnat, tơgŭm jên ăn đe drŏ kăn, răt hơpăh ‘long pơtăm, kon yŏng. Kiơ̆ đơ̆ng noh, rơbâu ‘nu hơiŏh păng drŏ kăn đei tơgŭm: 

“Tơ̆ hơnăp kơnh, Khul drŏ kăn dêh char Gia Lai hơnơ̆ng tưk tơiung hlŏh dơ̆ng dôm tơdrong hlôi jang đei; pơtho ăn rim khul grŭp hŏk pơhrăm iŏk dôm trong jang ‘lơ̆ng, đei yoa tơ̆ tơring păng lơ̆m dêh char vă jang kiơ̆ lơ̆m tơdrong jang atŏk tơiung mŭk drăm unh hnam. Atŭm hăm ‘nŏh tơlĕch lơ trong jang, câu lạc bộ vă sơng rim bơngai vang mât jang; hơpăh tơmam, pơlung, pôk pơ ư mă tơtom hăm dôm bơngai, trong jang rơgei đei yoa vă pơih xă lơ̆m rim khul grŭp”.

Hăm jơhngâm đon ‘mêm kơ eng păng dôm tơdrong jang tôch đei yoa, Khul drŏ kăn tơ̆ jơ̆p tơring lơ̆m dêh char Gia Lai oei tơgŭm ăn đe oh pơti păng drŏ kăn bơngai kon kông da ƀiơ̆ kơ pơmat tat, vang tơgop bơ̆ jang ‘lơ̆ng tơdrong vei lăng sơđơ̆ng arih xa lơ̆m tơpôl tơ̆ tơring./.