Mŏ Nay H'Tó tơ̆ xăh Ia Rtô, thĭ xăh Ayun Pa, dêh char Gia Lai hăm hơnăn “Tơdrô ge Jarai" iŏk đei hla ar chih tơbăt OCOP 3 sơnglŏng – tơmam OCOP mă blŭng đơ̆ng xăh. Mŏ chih, phĭn hơtŏk lơ̆m facebook, zalo păng fanpage "Tơdrô ge Jarai Ayun Pa" vă roi tơbăt tơmam ‘lơ̆ng. Mŏ Nay H’Tó ăn tơbăt, tơdrong pơih livestream tơdrong pai, pơđih tơdrô tơgŭm ăn lơ bơngai băt truh tơmam đơ̆ng sư jang đei, đơ̆ng noh tơdrong tĕch mơdro kŭm tŏk hơnơ̆ng kiơ̆ khei: “Mưh đei Ocop 3 sơnglŏng kơ thĭ xăh ‘nŏh tôch hiôk hian, đei lơ bơngai truh răt. Mưh jang đei ocop tơmoi truh răt lơ hlŏh 2 ‘măng, bơngai đơ̆ng nai tôch lơ, đei hloi bơngai đơ̆ng Hà Nội, đơ̆ng plt Hồ Chí Minh. Inh pơm hla ar pơkăp hăm shipper, inh nôp jên rim khei mưh krao đe sư ‘nŏh đe sư truh năm gơih ăn hloi.”

Kŭm nhen mŏ Nay H’Tó mơ̆n, khei ‘năr âu ki, lơ drŏ kăn đơ̆ng plt truh tơ̆ tơring tơrang, tơring pơmat tat tơ̆ dêh char Gia Lai adrin hŏk pơhrăm, băt hơdăh dôm tơdrong đei yoa đơ̆ng kơmăy sô̆ pơma atŭm păng mang tơpôl pơma hơdrô̆ vă roi tơbăt tơmam truh hăm rim bơngai răt.

Mŏ Hoàng Thị Hồng Hà tơ̆ plei Quý Đức, xăh Ia Trok, vang truh hăm tơdrong tĕch mơdro lơ̆m fanpage Khul drŏ kăn apŭng Ia Pa hăm tơmam Sữa chua tơyông. Jơ livestream sơng đei hlŏh 3.300 ‘nu bơngai năng, iŏk đei dơ̆ng kơhrĕng ‘nu bơngai apinh răt: “Mưh chă tĕch sữa chua tơyông tơ̆ ‘ngoăih ‘nŏh đei lơ mih ma duch nă păng bơngai răt lui păng tơgŭm. Khul drŏ kăn năm lăng, pơma nuh păng pơtho tơƀôh ăn inh iŏk yoa facebook, zalo kŭm nhen tik tok vă roi tơbăt tơmam kơdih. Gơnơm đơ̆ng khul mă tơmam đơ̆ng inh pơm roi đunh roi tŏk ‘lơ̆ng, gơh truh hăm kon pơlei păng bơngai răt hrĕnh ƀiơ̆, roi tơbăt tơmam ‘lơ̆ng ƀiơ̆”

Hrei ‘nâu, Khul drŏ kăn apŭng Ia Pa đĭ pơjing đei 5 trong jang iŏk yoa kơmăy kơmŏk tơroi tơbăt hơnhăk ăn đei yoa ‘lơ̆ng. ‘Nŏh jĭ roi tơbăt “1 khei 1 ‘nu bơngai jang rơgei”, “1 năr 1 tơdrong jang hơiă”, “1 giĕng 1 tơmam chă tĕch mơdro tơ̆ Kơchơ điên tư” lơ̆m dôm mang tơpôl; trong jang “Vei lăng khul ưh kăl hla ar”, tơdrong jang “Chă mơ̆ng nơ̆r pơma đơ̆ng bơngai jang, đe mŏ oh drŏ kăn”. Dôm trong jang âu vang tơgop tơgŭm ăn đe drŏ kăn druh kiơ̆ tom hăm tơdrong tơplih hăm kơmăy sô̆, atŭm hăm ‘nŏh tơgŭm chep ba lơ tơmam truh hăm bơngai răt.

Yă Huỳnh Thị Ngọc Lan – Kơdră vei lăng khul drŏ kăn apŭng Ia Pa ăn tơbăt dơ̆ng: “Nhôn tôch lăp đon hăm trong jang “1 gĭeng 1 tơmam chă tĕch mơdro hăm kơchơ điên tư”. Adrol kơ ‘nhôn pơjing trong jang âu, kiơ̆ đơ̆ng dôm tơdrong jang pơlong năng vă pơtho tơƀôh ăn dôm bơngai jang livestream tơ̆ mang tơpôl nhen facebook, zalo... Kiơ̆ đơ̆ng kơchơ điên tư ‘nŏh lơ mŏ oh đei tơdrong ‘lơ̆ng vă roi tơbăt tơmam kơdih tơ̆ mang tơpôl jơ̆p jang.”

Lơ̆m dêh char Gia Lai, khul drŏ kăn jơ̆p tơring bơ̆ jang đei 65 trong jang "Grŭp drŏ kăn jang kiơ̆ kơmăy 4.0" păng "Drŏ kăn tơplih hăm kơmăy sô̆" hăm rơbâu ‘nu bơngai jang, pơjing păng vei kơjăp rơbâu grŭp zalo, facebook, tiktok, kênh youtube….Kiơ̆ yă Rơ Chăm H’Hồng – Kơdră vei lăng Khul drŏ kăn dêh char Gia Lai, tơdrong tơmât yoa kơmăy kơ mŏk roi tơbăt hlôi tơgŭm ăn đe mŏ oh dar dĕh tơplih ming trong jang xa, tĕch mơdro, tơgop pơm hơtŏk tơdrong đei yoa lơ̆m tơdrong jang khul păng jang tŏk mŭk drăm.

“Nhôn vă hơnơ̆ng tưk tơiung tơdrong tơroi tơbăt lơ̆m dôm grŭp hlôi đei pơjing adrol ki đơ̆ng Khul, website, trang điên tư kơ khul, trang zalo, facebook... roi tơbăt hrĕnh, tơtom truh hăm dôm bơngai jang găh tơdrong tơgŭm, trong bơ̆ jang đơ̆ng, dôm tơdrong tơchơ̆t đơ̆ng Đảng, đơ̆ng dôm Hop akŏm Khul kơdră chĕp kơ̆l truh hăm rim bơngai jang hrĕnh hlŏh.”./.