Kơsô̆ tŏk asong tŏk iŏk jên đơ̆ng anih mong jên tơgŭm tơpôl apŭng jô̆ păh lăp rim sơnăm đei 12%. Lơ̆m apŭng đei 4 anih jang khŭl pơjao jang (lơ̆m noh đei Khŭl vei lăng drŏ kăn). Truh dang ei, đĭ đei hloh 11 rơbâu ‘nu tơmoi, hăm akŏm rơkăh hre dang 550 ti hlak jên. Jĭ tơring đei kơsô̆ kon pơlei kon kông đei hloh 70%, apŭng Krông Pa tôch kơ bơngơ̆t truh dôm ŭnh hnam kon pơlei kon kông ƀơ̆t đei tŏk iŏk jên tơgŭm đơ̆ng Anih mong jên tơgŭm tơpôl vă hơtŏk tơiung mŭk drăm.

Yă Ksor H’ Druin – Kơdră Khŭl vei lăng drŏ kăn xăh Chư Đrăng, apŭng Krông Pa tơbăt, tơring kŭm ‘nao tơƀôh muh măt tơdrong jang “Pơlei drŏ kăn jang ‘lơ̆ng” vă pơm tơdrong hiôk ăn kơ mŏ oh lơ̆m khŭl pơma dơnuh tơdrong hlôh vao lơ̆m jang sa, iŏk yua jên đei jơnei: “Vă kơ mŏ oh iŏk yua jên tŏk iŏk đơ̆ng anih mong jên tơgŭm ƀlep ‘noh nhôn kŭm hlôi pơgơ̆r năm tơroi tơbăt, pơtho ăn kơ mŏ oh drŏ kăn hlôh. Đơ̆ng rŏng kơ tŏk iŏk jên ‘noh bơ̆n kăl kơ tơmơ̆t jên jang lơ̆m dôm tơdrong jang sa vă tơplih ‘lơ̆ng tơdrong hơrih sa. Âu ki, ĭnh kŭm dơ̆ng tang tơgŭm mŏ oh tŏk iŏk jên, đơ̆ng jên tŏk iŏk âu lơ ŭnh hnam kŭm đĭ băt tơmơ̆t jên jang lơ̆m choh pơtăm, vei rong kon tơrong. Klĕp truh khei ‘năr dang ei ‘noh tôch kơ lơ ŭnh hnam hlôi iŏk yua jơnei jên tŏk iŏk đơ̆ng anih mong jên tơgŭm vă hơtŏk tơiung mŭk drăm ŭnh hnam”.