‘Măng năm tơmang đei pơgơ̆r đơ̆ng năr 11-13/1/2024. Lăp đơ̆ng rŏng pơm lêh sơng, Kơdră chĕp pơgơ̆r Teh đak Võ Văn Thưởng hăm Ƀok kơdră tơm Indonesia Joko Widodo chĕp kơ̆l khul kơdră kơpal ƀar teh đak pơgơ̆r pơma đam. Ƀar ‘nu kơdră chĕp pơgơ̆r drơ̆ng mĭnh nơ̆r, ‘moi kiơ̆ dôm tơdrong jang jei jang hơdoi tih tên vă jê̆ 70 sơnăm au ki, kăl hrôih hơnhăk tơgoăt tơgoăl Jang hơdoi gĭt kăl ƀar teh đak tŏk kơtang hloh dơ̆ng.

Kơdră chĕp pơgơ̆r Teh đak Võ Văn Thưởng pơma hơdăh, Việt Nam ling lang lăng kơjăp păng ‘meh vă tŏk kơtang hloh dơ̆ng tơgoăt tơgoăl joăt joe păng Jang hơdoi gĭt kăl hăm Indonesia; hmach chơt hơ iă ăn Indonesia pơgơ̆r jơnei ‘măng Pơgơ̆r pôk rơih jê̆ truh au kơnh, hơnơ̆ng atŏk tơ iung pơdrŏng hơnŭk hơnoa, tơgop kơtang hloh dơ̆ng ăn tơdrong rơngei hiôk hian păng jang hơdoi tơ̆ tơring păng lơ̆m apung plĕnh teh. Ƀar ‘nu Kơdră drơ̆ng mĭnh nơ̆r atŏk kơtang hloh dơ̆ng rim trong jang hơdoi dih băl; hrôih pơjing Tơdrong jang Iung jang jăl jang 2024 – 2028 trŏ lăp hăm chăl hle. Ƀar ‘nu Kơdră chĕp pơgơ̆r jei drơ̆ng mĭnh nơ̆r, ‘moi kiơ̆ dôm tơdrong iŏk đei jơnei tih tên vă jê̆ 70 sơnăm au ki, kăl hrôih hơnhăk Tơgoăt tơgoăl jang hơdoi gĭt kăl ƀar teh đak tŏk kơtang hloh dơ̆ng.

Lơ̆m pơgê năr 12/1, Ƀok kơdră tơm Indonesia hlôi truh ming gơvang pơkao, mơ̆t hơpong Kơdră chĕp pơgơ̆r teh đak Hồ Chí Minh păng Hơnih man tơbăt rim Bơngai nuih mơng lôch dŏng teh đak.