Hăm pơ hnŏng jang đang hơdrol trong tơlĕch, đơ̆ng ‘năr 4/5 truh ‘năr 19/9/2023, Anih jang ŭnh điên Ea H’leo hlôi pơ jing grŭp bơ̆jang, klăih song hưnăp jang ăn dôm bơngai vang jang, bơ̆jang kiơ̆ dôm tơdrong jang nhen: tơplih kơ thŭng công tơ, cáp blŭng mơ̆t păng lĕch đơ̆ng công tơ, Aptomat, proh hơmet, chô̆ klĕp tơ ley, chong pơ ‘ngoăih jih trong tơley ŭnh điên...

Mă đơ̆ng tŏ ‘mi kial đei ƀôh mơ mat tat, ‘mi pơ dui đunh pơm ăn ưh kơ đei yua ăn kŏng nhân jang, lơ tơring hơtăih hơ tŏ, trong nơ năm kơ nê̆, mă lei anih jang hlôi hơdrin hơmet pơ ‘lơ̆ng mơmat tat, jang ‘lơ̆ng dôm tơdrong jang vei lăng, hơmet pơ ‘lơ̆ng kơmăy pơ tŏ jô̆ ŭnh điên, hơdai hăm tơdrong tơtĕnh hơmet ming dôm tơdrong sar bar yua đơ̆ng ‘mi kial pơm ăn nhen tơgơ̆ jrăng ŭnh điên, hơ lih jih jrăng.... Dôm tơdrong jang đang hrôih hlôi tơgŭm vei sơđơ̆ng lăng ‘lơ̆ng, sơđơ̆ng găh ŭnh điên, tang găn hiong ŭnh điên, pơvei tơdrong pơtruh ŭnh điên sơđơ̆ng ăn kơ vă jê̆ 38.000 tơmoi lơ̆m tơring.