Đơ̆ng sơnăm 2016 truh dang ei, dêh char Gia Lai đei 257 tơdrong jang đei ƀơk ăn Hla ar asong tơmât jên jang, hăm kơsô̆ jên hlŏh 78.000 ti. Dôm tơdrong jang akŏm lơ găh choh jang xa, pơtăm ‘long, unh hơyuh, jang kơmăy, ming man, sir iŏk tơmam… Mă lei mă tơpă, lăp đei 163 tơdrong jang mât jang xa đĕch. 72 tơdrong jang tam mă đei tơlĕch jang.

Anih tơmât jên jang xa tam mă gan ‘lơ̆ng đei tơƀôh hơdăh kiơ̆ đơ̆ng kơsư̆k pơjei kơ dêh char PCI sơnăm 2022 âu ki, Gia Lai lăp dơ̆ng mă 45/63 dêh char, plt (jur 19 ƀơ̆k pơtêng hăm sơnăm 2021); dơ̆ng mă 4/5 dêh char Tây Nguyên. Vă hơmet pơ ‘lơ̆ng anih tơmât jên jang, khei 9/2023, Anih vei lăng kon pơlei dêh char Gia Lai hlôi tơlĕch trong hơmet ming, hơtŏk kơsô̆ pơjei đơ̆ng dêh char sơnăm 2023 păng dôm sơnăm đơ̆ng rŏng dơ̆ng. Đon pơhnŏng vă jang ‘nŏh hơtŏk kơsô̆ pơjei PCI dêh char sơnăm 2023 lơ̆m grŭp 20 dêh char, plt đei điêm kơjung hlŏh.