Mă hơdăh, pơgê ‘năr 1/3, tơ̆ Anih chĕp kơ̆l đảng apŭng Chư Păh, ƀok Châu Ngọc Tuấn, Phó Bí thư chĕp kơ̆l đảng dêh char, Kơdră chĕp kơ̆l Khul tang măt Quốc hội dêh char Gia Lai pơgơ̆r Hop akŏm roi tơbăt tơdrong Tơchơ̆t đơ̆ng Khul kơdră chĕp kơ̆l đảng dêh char găh tơdrong jang kăn ƀô̆. Hop akŏm roi tơbăt tơdrong Tơchơ̆t pôk ƀok Trần Minh Sơn, Kơdră jang lơ̆m Anih chĕp kơ̆l đảng dêh char, Bí thư đảng apŭng, Kơdră Jơnŭm pơgơ̆r kon pơlei apŭng Chư Păh pơm Bí thư Đảng khul Anih MTTQ Việt Nam dêh char đơ̆ng 2019 - 2024. Ƀok Sơn iŏk tơdrong jang tơ̆ Anih MTTQ Việt Nam dêh char đơ̆ng ‘năr 1/3/2024.

Kơsơ̆ lơ̆m năr âu mơ̆n, Khul kơdră chĕp kơ̆l Anih MTTQ Việt Nam dêh char Gia Lai pơgơ̆r hop akŏm ‘măng mă 12 (ưh kơ ê) jăl X đơ̆ng 2019 - 2024 kiơ̆ tơdrong hơgăt, drơ̆ng nơ̆r asong ăn ƀok Hồ Văn Điềm, Kơdră jang lơ̆m Anih jang đảng dêh char, Kơdră Anih MTTQ Việt Nam dêh char pơdơ̆h pơm Kơdră Anih MTTQ Việt Nam dêh char Gia Lai jăl X đơ̆ng 2019 - 2024 kiơ̆ tơdrong ‘mĕh vă đơ̆ng kơdih; pôk ƀok Trần Minh Sơn, Kơdră jang lơ̆m Anih chĕp kơ̆l đảng dêh char, Bí thư Đảng Khul Anih Mặt trận Tổ quốc Việt Nam dêh char jang lơ̆m Khul kơdră chĕp kơ̆l Anih MTTQ Việt Nam dêh char păng pơm Kơdră Anih MTTQ Việt Nam dêh char jăl X, đơ̆ng 2019 - 2024.