Yak hloh 42 sơnăm pơjing, atŏk tơ iung truh dang ei pơlei đei 210 ŭnh hnam hăm 950 ‘nu măt bơngai, đei 27 ‘nu đảng viên. Lơ̆m au, ŭnh hnam dơnuh pă dang 6%, lơ̆m pơlei đei 3 hơdrĕch hơdrung vang hơrih sa ‘noh Tày, Bahnar păng Jarai. Kon pơlei tơ̆ au găh lơ choh jang sa, jang ƀa ƀar pơyan đei 146 ha, ƀum ƀlang 180 ha, pơtăm tơ̆h hơƀo au to 6 ha, jang sa iŏk đei jô̆ hơtŏ măt bơngai kơ sơnăm ‘nŏh 41.000.000 hlak jên.

Dôm sơnăm au ki, rim khul jang chinh trĭ tơpôl păng kon pơlei tơ̆ Pơlei Kte lớn A hlôi hơdrin iung jang kiơ̆ rim ‘măng chă pơrô̆ hơvơn, tơdrong jang pơting dih băl ‘mêm kơ eng teh đak tơ̆ tơring, mă kăl ‘nŏh ‘măng hơvơn “Đĭ đăng kon pơlei tơgoăt tơgoăl pôm nơ̆r ƀơ̆r đon tơ iung pơjing tơring tơrang ‘nao, tơring kơdrơ̆m gơ̆h hơgei”; “Pơm tơplih jơhngơ̆m đon tơchĕng, trong jang sa lơ̆m kon kông vă roi năr roi atŏk tơ iung yak hloh dơnuh hin”.