Kiơ̆ kơsô̆ chih jô̆, 1 ‘nu công nhân oei hre jên khei đơ̆ng 30 triu truh 50 triu. Ƀok Lê Tấn Thanh, oei tơ̆ xăh Đăk Wer, apŭng Đăk Rlấp, dêh char Đăk Nông tơroi: Khei 10/2023, ƀok krao vă gê̆ 70 ‘nu bơngai jang đơ̆ng: Đăk Nông, Phú Yên, Bình Phước păng dôm dêh char tơring Miền Tây năm jang, man anih rong nhŭng tơ̆ âu. Truh dang ei đĭ vă jê̆ 4 khei bơih, anih iŏk bơngai jang ‘nao kla lăp tŏ sĕt jên ăn bơngai jang đĕch.

Ƀok Thanh lơ ‘măng pơma nuh ră mă lei lăp pôm iŏk đei nơ̆r pơkă đĕch: “Inh rong ‘nhŏng ŏh dôm khei ‘nâu bơih, đơ̆ng ‘năr 16/10/2023 truh dang ei, đei 1 vât păih Công ty Vương Anh Thắng tŏk iŏk kla hơdrol 600 triu, truh dang jên bơngai jang păng jên thuê kơmăy dang 3 ti 2 dơ̆ng. 1 ‘măng inh đei pơma nuh hăm tơ ‘ngla tơmât jên jang ‘nŏh đe sư pơkă ăn inh truh ‘năr 20/12 ‘nhŏng oh jang tơgŭm hlôi giĕng ‘nŏh đei jên păng đe sư hơnơ̆ng pơkă thoi noh truh dang ei inh tam mă iŏk đei jên kiơ, rong ‘nhŏng ŏh ưh kơ kĕ bơih. Hơpơi anih jang kơpal pơm thoi yơ, pơjing tơdrong ‘lơ̆ng vă inh gơ̆h đei jên kla ăn ‘nhong oh jang vih tơ̆ pơlei xa têt. Oei rim tơdrong đơ̆ng rŏng kơnh tơkêng, bu trŏ, bu glăi ‘nŏh hlôi têt sek, yoa truh năr têt bơih, ‘nhong ŏh ‘mĕh vih tơ̆ pơlei xa têt”

Nhen thoi noh mơ̆n, ‘nhŏng Trần Minh Hướng (plei tơ̆ Tây Ninh) kŭm iŏk ‘nhŏng oh tơ̆ pơlei năm man anih rong nhŭng. Hloh 3 khei ‘nâu, kơdih kâu ‘nhŏng Hướng păng đe ‘nhŏng oh oei đei anih jang hre vă jê̆ 500 triu hlak jên khei: “Jur tơ̆ âu dang 3 khei bơih, blŭng a kŭm đei jĭt dôm ƀar jĭt ‘nu, dang ei vih đĭ pă 8 ‘nu đĕch, ưh đei jên, ưh băt chă jên đơ̆ng yơ vă kla ăn ‘nhŏng ŏh vih xa têt. Jô̆ păh lăp bơngai jang phŭ jên khei 12 triu, thơ̆ ‘nŏh 15 triu, hơpơi ‘mĕh jăh đei jên vă ‘nhŏng oh vih tơ̆ pơlei, oei dang ei ưh băt vă pơm thoi yơ vă ‘nhŏng oh vih hloi bơih”

Ƀok Hồ Công Anh Tuấn, oei tơ̆ apŭng Chư Sê, dêh char Gia Lai, iŏk man 6 tŏ hơdrong rong nhŭng yŏng tơ̆ anih jang âu kŭm oei tơƀâp tơdrong thoi noh ‘năi: “3 khei bơih kŭm tam mă đei kla jên ăn ‘nhŏng oh công nhân. Tơdrong kăl ‘nŏh găh tơ ‘ngla tơmât jên jang păng anih iŏk jang tơchĕng thoi yơ ‘nŏh inh ưh kơbăt. Mă lei dang ei apinh Vương Anh Thắng (anih iŏk jang) ‘nŏh đe sư akhan yoa anih tơmât jên jang tam mă chu tơlĕch jên. Mă tơpă inh lăp kĭ hla ar jang hăm Vương Anh Thắng đĕch, mă ưh kơbăt bơngai tơmât jên jang bu ôh. Hơpơi ‘mĕh đei trong yơ ‘lơ̆ng hlŏh, vă kla tôm jên khei ăn ‘nhŏng oh đơ̆ng hơtăih, đe truh tơ̆ âu jang 3 khei bơih, tơ̆ hnam đe oei đei kon kăn dơ̆ng, dang ei ưh đei jên, têt vă truh dơ̆ng, đe ưh đei jên vă vih ‘nŏh kŭm tôch mơnat”.

Tơdrong jang pơm hơdrong rong nhŭng yŏng tơ̆ plei Cây Xoài (xăh Ia H'la, apŭng Chư Pưh, Gia Lai) đei tơlĕch jang đơ̆ng khei 1/2023, yoa Công ty TNHH MTV Phát Tài Gia Lai pơm tơ ngla tơmât jên jang. Akŏm đĭ đăng jên jang dang 80 ti, Công ty TNHH Vương Anh Thắng pơm tơ ‘ngla iŏk bơ̆ jang ming man.

Tơdrong ưh jăh kla jên khei ăn công nhân tơ̆ âu, đei jâu yoa Công ty TNHH MTV Phát Tài Gia Lai păng anih iŏk jang, Công ty TNHH Vương Anh Thắng đei lơ tơdrong ưh kơlăp băl ƀơm truh dôm tơdrong hơgăt lơ̆m hla ar pơkăp jang mă dôm păh kĭ adrol kơ ‘nŏh. Kơlih yoa tam mă drơ̆ng pơm nơ̆r lơ̆m tơdrong jang, kơna kŭm tam mă đei trong chih hơdăh rim tơdrong đei bơ̆ jang ‘năi, găh anih mong jên kŭm tam gơ̆h tơlĕch jên pơm ăn công nhân ưh đei jên khei hơnơ̆ng.

Ƀok Rơ Lan Hoen, Kơdră vei lăng kon pơlei xăh Ia H'la tơroi, Anih vei lăng kon pơlei xăh ‘nao băt hơdăh tơdrong dôm jĭt ‘nu công nhân oei hre jên khei. Tơ̆ hơnăp dang ei, Anih vei lăng kon pơlei xăh hlôi athei khul công an truh hơlen năng păng vei lăng mă ‘lơ̆ng tơdrong sơđơ̆ng. Hơdai hăm ‘nŏh vă pơma nuh hăm dôm pang đei ƀơm truh vă sek tơlang pơ ‘lơ̆ng ăn bơngai jang. Đơ̆ng rŏng kơ ‘nŏh đei hla ar chih tơroi ăn Anih vei lăng kon pơlei apŭng Chư Pưh păng dôm anih jang đei ƀơm truh găh tơdrong ‘nâu.