Mă hơdăh, dang 2 jơ kơsơ̆ năr 2/10, 4 ‘nu hơdruh tơdăm vei rơmo, găn koa thoong đak hơnih Chơ kơi 2, găh tơring Ia Blư̆, vă brŏk tơ̆ hnam, Mư̆h tŏk bŏk thoong đak, ‘nŏh ưh kơ tom băt thoong đak tŏk tôch kơtang, 1 ‘nu tom tŏk tơ̆ kông, 3 ‘nu tŏk bŏk tơhlăk đom ƀơ̆t tơmo tŏk bŏk thoong đak.

Lăp kơtơ̆ng tơdrong au, khul jang tơgŭm dŏng kơ Kŏng ang dêh char Gia Lai đei 9 ‘nu kang ƀô̆, kŏng ang hlôi iung năm dŏng, iŏk tơlei tơdruh păng chô̆ rim đe mon đơ̆ng noh hiot hơtŏk tơ̆ kông.Lơ̆m mă au đei 1 ‘nu mon kơ yuơ tăr văr, pơm ăn đak jrŏh huch mĭnh jăl, mă lei pŭn ai đei khul tơgŭm dŏng ngơi kiơ̆, dŏng kĕ jơnei. Truh 5 jơ 45 pơnĭt, pơđĭ 3 ‘nu mon hlôi đei dŏng tŏk tơ̆ kông sơđơ̆ng.