Đơ̆ng rŏng 1 sơnăm iung jang ming man, mă lei Tơdrong vă jang trong glung Nguyễn Chí Thanh, jăl trong đơ̆ng trong Trường Chinh truh tơ̆ trong Lê Duẩn, pơlei tơm Plei Ku, ‘nao tơlĕch kon jên jang lăp 1 ti 500 triu hlak jên lơ̆m akŏp kon jên klăh asong ‘noh 185 ti hlak jên, jơnei 3,6%. Jei tơ̆ Pkei Ku, Tơdrong vă jang trong glung Nguyễn Văn Linh, ‘nao lăp tơlĕch kon jên 27% lơ̆p akŏm 100 ti hlak jên kơ sơnăm. Găh tơdrong vă pơm Trong glung jih jang mŭk drăm găh Hơlĕch (Trong ver trong glung 19)- tơdrong vă jang tơm kơ dêh char, hăm kon jên tơmơ̆t jang 1.200 ti hlak jên, mă lei jei ‘nao lăp tơlĕch kon jên jang 3,6%.

Pơđĭ 3 tơdrong vă jang au jei hiơ hiơ̆, jei kơ yuơ 1 tơdrong pơm ăn ‘noh jang tim mă keh đang iŏk tơvih teh, tim mă pơjao ăn păh hơnih jang ming man. Ƀok Phan Việt Tân-Kơ iĕng Kơdră Hơnih vei lăng Tơdrong vă jang Choh jang sa găh Hơnih bơ̆ jang vei lăng Tơmơ̆t jên jang Tơ iung pơjing ming man dêh char Gia Lai tơbăt, kiơ̆ tơdrong tơchơ̆t kơ Khôi luơ̆t Teh đak tơmơ̆t jên jang, tơdrong sơkơ̆t hơdăh kơjă teh vă iŏk tơvih teh kăl đei lơ trong jang, kơna pơm ăn truh tơdrong hiơ hiơ̆: “Dang ei tok bŏk gô chang iŏk tơvih teh. Găh lơ tơring kơ apŭng Đak Đoa păng pơlei tơm Pleiku jei hlôi bơ̆ jang đang chă jô̆ hơlen dôm twodrong ƀơm truh kơ tơdrong vă jang au. Mă lei hrei au, tŏk bŏk tơhlăk tơhlĭn tơdrong sơkơ̆t hơdăh kơjă teh, kơna kăl gô chang hơnih jang tơgŭm sơkơ̆t hơdăh, vă Hơnih vei lăng Mŭk drăm bri brăh păng Cham char kĭ tơchơ̆t. Lăp đơ̆ng rŏng hơnih iŏk jang ming man keh đang, ‘nŏh rŏ năng gô tơlĕch ăn kon jên ming man đang. Mă lei truh dang ei tim mă jang keh đang ƀlep tơdrong tơlĕch ăn”.  

‘Ngoăih tơdrong kơyuơ tơhlăk tơhlĭn iŏk tơvih teh, ‘nŏh tơdrong ưh kơ măh teh vă pơm trong jei pơm ăn lơ tơdrong vă jang tơ̆ Gia lai iung jang keh đang hiơ hiơ̆. Tơpă yan au, tơ̆ Gia Lai đei 4 hơnih groi teh vă kôch iŏk păng 5 hơnih kôch iŏk tơmo hlôi ăn asong chă kôch iŏk. Mă lei găh lơ hơnih groi teh au jei hơtăih kơ hơnih ming man kăl ‘meh vă đei lơ teh chă ƀŭ pơm trong.

Lơ̆m lơ khei au ki, dêh char Gia Lai hlôi ăn pơgơ̆r tơchă bơngai răt iŏk, kĭ tơchơ̆t, pơm hla bơar ăn asong iung jang kơ rim groi teh vă kôch iŏk teh, tơmo tơgum ăn ming man trong nơnăm, mă lei truh dang ei tơdrong au oei tim mă xek tơlang keh đang. Ƀok Nguyễn Văn Quảng-tang măt ăn hơnih ming man kơ Kŏng ti tơ iung pơjing ming man 510, iŏk jang ming man tơnô̆ kơsô̆ 7 kơ Tơdrong vă jang ming man trong jih jang mŭk drăm găh Hơlech pơma tơbăt dôm tơdrong tơnap tap kơ hơnih ming man au: “Tơnô̆ jang kơsô̆ 7 đei 3 tong gơng păng 1km 500 met trong glung. Truh dang ei ‘nao đei 1 tŏ gơng M2 tơ̆ Biển Hồ ‘noh đei ming man bơih. Lơ̆m 1km 700 met trong, ‘nŏh tơngla tơmơ̆t jên jang ‘nao pơjao 500m trong glung, tơ-‘ngla tơmơ̆t jên jang jei tŏk bŏk tơlĕch jang, mă lei tim mă đei hơnih vă iŏk teh pơm trong. ‘Meh vă atŏk kơtang ming man keh đang lei kăl đei teh vă tŭh pơm trong ‘nŏh ‘mơ̆i.”

Tơdrong chrih dơ̆ng tơ̆ Gia Lai ‘noh kơtă hloi mĭnh ƀar tơdrong vă jang sơđơ̆ng ăn ming man, jei tơƀơ̆p tơhlăk tơhlĭn lơ̆m tơlĕch kon jên jang, kơ yuơ dêh char... ưh kơ măh kon jên! ‘Nau jĭ tơdrong ƀôh hơdăh yan au tơ̆ rim tơdrong vă jang iŏk yua kon jên jang đơ̆ng jên iŏk yua teh păng ăn mơng teh, mưh sơnăm 2022 truh dang ei, tơdrong tĕch mơdro teh hlôi pơdơ̆h, dêh char ưh kơ iŏk đei kon jên đơ̆ng tơdrong tĕch răt teh au. Ƀok Trương Hải Long-Kơdră chĕp pơgơ̆r Hơnih vei lăng kon pơlei dêh char Gia Lai tơbăt, rim hơnih jang, rim tơring lơ̆m dêh char tŏk bŏk iung jang hăt hot tơchă trong hơmet pơ ‘lơ̆ng tơnap tap: “Hơnih bơ̆ jang Pơprŏ tơdrong jang păng Tơmơ̆t jên jang ‘nŏh jĭ hơnih hlôi ăn 3 khul bơ̆ jang tĕnh koăng pơtruh ăn kơdră kơpal klăh asong kon jên tơmơ̆t jang uơ oei; jang keh đang pơm hla bơar tơmơ̆t jên jang, atŏk kơtang iŏk tơvih teh păng pơjing hơnih oei hle. Hơnih vei lăng Pơprŏ tơdrong jang păng Tơmơt jên jang dêh char pơm tơm, iung jang hơdoi hăm rim tơ-‘ngla tơmơ̆t jên jang, rim hơnih bơ̆ jang, tơring akŏm hơmet pơ-‘lơ̆ng tơnap tap lơ̆m tơlĕch rim tơdrong jang hơmet pơ ‘lơ̆ng atŏk tơ iung mŭk drăm-tơpôl păng 3 tơdrong jang tơm teh đak. Hơmet ăn dôm trong jang pơchoh ăn hơnih vei lăng kon pơlei dêh char vă pơgơ̆r hop akŏm lăng hơlen hơmet pơ ‘lơ̆ng tơhlăk tơhlĭn hơdrol năr 20/9/2023”.