Oh Hoàng Thị Anh Thơ- hŏk tro lăm 12C1, Hnam trưng THPT Phạm Văn Đồng- xăh Ia Sao, apŭng Ia Grai, dêh char Gia Lai ăn tơbăt, thi tốt nghiệp truh âu kơnh tôch gĭt kăl hăm tơdrong arih ning mônh kơnh kơ oh. Yoa thoi noh, oh kơchăng ôn hơmet tôm ƀai vă gơ̆h thi đei điêm ‘lơ̆ng hlŏh: “Oh chih măt năm hŏk thim dôm lăm tơ̆ hnam thây kô vă pơhrăm, pơtâp pơm ƀai. Mă 2 ‘nŏh sŏng xa mă tôm, tep mă hrăp vă jơhngâm đon hiôk rơhău, hơnơ̆ng hŏk pơhrăm. Găh tơdrong chih măt thi đăi hŏk ‘nŏh ŏh đei hnam trưng pơtho tơƀôh tôch hơlen, hơlen năng hô sơ lơ ‘măng. Kơna hô sơ chih măt thi, oh đĭ pơm đang bơih.”

Pơma truh tơdrong hơmet tơ̆ Anih thi kơsô̆ 11 kơ dêh char Gia Lai, ƀok thây Nguyễn Trọng Tuấn- Phŏ hiê̆u trơng vei lăng Hnam trưng THPT Phạm Văn Đồng- xăh Ia Sao, apŭng Ia Grai ăn tơbăt: “Truh dang ei, 186 ‘nu hŏk tro đĭ chih măt đang hơnăn vang thi tốt nghiệp kiơ̆ kơmăy phần mềm. Găh tơmam, lăm thi, Hnam trưng hơmet tôm 12 lăm thi, dôm lăm ming đê thi, lăm ming ƀai thi, lăm bơ̆ jang ăn khul pơgơ̆r, vei lăng thi; unh điên, trong tang găn, pĭt unh xa kŭm đei hơlen năng, hơmet ming ngăl.”

Oei tơ̆ hnam trưng THPT Hà Huy Tập, apŭng Kông Chro, ƀok thây Phạm Hữu Hùng- Hiê̆u trơng Hnam trưng tơroi, sơnăm ‘nâu anih thi đei 57/246 ‘nu hŏk tro jĭ bơngai kon kông. Kŭm hăm tơdrong pơgơ̆r ‘lơ̆ng tơdrong ôn thi păng hơmet tơmam, lăm thi, hnam trưng oei hơmet anih oei xa, tep pơdơ̆h tơgŭm ăn đe oh tơ̆ hơtăih: “Hnam trưng pơm hla ar gơih ăn Anih vei lăng kon pơlei apŭng apinh tơgŭm 1 ‘nu oh 400.000 hlak lơ̆m 3 năr thi. Găh hnam trưng, pơtho ăn khul druh dăm jang hơdoi hăm anih jang đoan apŭng pơngơ̆t ăn 57 ‘no ŏh bơngai kon kông sŏng xa, tep pơdơ̆h tơ̆ hnam trưng. Rim sơnăm păng sơnăm ‘nâu kŭm thoi noh, hnam trưng đei 12 lăm oei xa hơdai ăn đe ŏh hŏk tro pơmat tat ‘mĕh ƀich, oei kơtă tơ̆ hnam trưng lơ̆m dôm năr thi. Đe oh ưh đei oei tơ̆ hnam trưng ‘nŏh đei khul jang tơgŭm chơ đe oh vih vât lơ̆m pơyan thi.”

Tơchĕng hơdrol ‘măng thi tốt nghiệp THPT teh đak sơnăm 2024 tơ̆ dêh char Gia Lai đei hlŏh 15.200 ‘nu hŏk tro. Lơ̆m noh, đei hlŏh 14.400 ‘nu hŏk tro lăm 12 păng 800 ‘nu hŏk tro chih măt thi kơdih. Dêh char hơmet 41 anih thi tơpă păng 1,2 anih thi hơmet hiă tơ̆ 17 apŭng, thĭ xăh, plt. Anih vei lăng pơtho pơhrăm dêh char Gia Lai jang hơdoi kơjăp hăm dôm anih công an, hnam pơgang, anih jang unh điên… hơmet ‘lơ̆ng hlŏh ăn tơdrong thi. Tơdrong pơtâp trong vei lăng, pơgơ̆r thi, kơmăy phần mềm vei lăng thi, trong pơm hla ar chih măt thi ăn hlŏh 15.200 ‘nu hŏk tro đĭ jang đang ngăl bơih.

Ƀok Nguyễn Văn Long- Phŏ Kơdră Anih vei lăng pơtho pơhrăm dêh char Gia Lai tơroi dơ̆ng: “Đơ̆ng dang ei truh năr pơgơ̆r thi, Anih vei lăng hơlen năng rim tơdrong ƀơm truh tơ̆ hŏk tro, pơgơ̆r pơtâp pơhrăm trong năng thi, hơnơ̆ng pơtho tơƀôh tơdrong hơgăt thi ăn kăn ƀô̆, thây kô vei lăng thi păng đe ŏh hŏk tro năm thi. Dôm tơdrong ‘nâu gô đei bơ̆ jang hơnơ̆ng đơ̆ng dang ei truh năr thi. Anih vei lăng pơtho pơhrăm dêh char jang hơdoi hăm Anih vei lăng kon pơlei dôm apŭng hơlen năng mă nhen rim anih thi, đơ̆ng tơmam, lăm thi, kơmăy kơmŏk truh dôm tơdrong ƀơm truh tơ̆ hŏk tro năm thi vă gơ̆h đei trong tơgŭm mă lăp”.

Hăm tơdrong hơmet tôch ‘lơ̆ng, Gia Lai oei năm truh ‘măng thi tốt nghiệp THPT teh đak 2024 sơđơ̆ng ‘lơ̆ng păng tơpăt hlŏh.