Hrei ‘nâu, tơ̆ 7 xăh kơ 3 apŭng sơlam tơ̆ dêh char Gia Lai hlôi pơjing đei tơring tang găn kơjăp ‘lơ̆ng tơ̆ 49 pơlei pơla, hăm đĭ đăng kơsô̆ kon pơlei oei xa tơ̆ tơring sơlam đei hlŏh 11.700 unh hnam. Tơ̆ âu, Anih chĕp kơ̆l đảng dêh char, Anih vei lăng kon pơlei dêh char Gia Lai pơtho ăn dôm anih jang kơpal, khul kơdră tơring vang jang hơdoi hăm khul linh vei lăng tơring sơlam et pơm pô̆ ƀăn, tơgŭm ăn dôm pơlei pơla tơlĕch tơdrong jang nhen “Hnam dơnŏ tơ̆ tơring sơlam", Hnam dơnŏ ăn kon pơlei tơ̆ tơring sơlam, achon kông đak dơsĭ; Rơmo yŏng ăn bơngai tơnuh; Yak hơdoi hăm drŏ kăn tơ̆ tơring sơlam,... Kăn ƀô̆, linh tơ̆ tơring sơlam pleh iŏk jên khei, mong akŏm 1 sơnăm đei truh kơhrĕng triu hlak jên vă tơlĕch trong jang "Chông ba oh năm hŏk – Kon rong ƀô đô̆i vei lăng tơring sơlam”. Kiơ̆ đơ̆ng noh, iŏk tơgŭm ăn 52 ‘nu hŏk tro tơ̆ tơring sơlam, đei tơdrong arih xa pơmat tat đei năm hŏk đơ̆ng lăm 1 truh lăm 12, sut hŭt tơdrong ưh kơbăt chư ăn kơhrĕng ‘nu mon hơ iŏh tơ̆ tơring hơtăih yăih.

Yă kră pơlei Ksor H'Lâm, tơ̆ xăh sơlam Ia Mơr, apŭng Chư Prông ăn tơbăt: “Hăm kon pơlei tơ̆ tơring sơlam nhen xăh nhôn, đe linh vei lăng tơring sơlam jĭ kơtum kơtŏng ‘nhŏng oh. Rim tơdrong tih iĕ nhen pơm hnam, choh khai hoang chŭn, na, linh vei lăng tơring sơlam hơnơ̆ng tơgŭm ăn; đei tơdrong kiơ hil băl âu to kŭm gơnơm kơ đe linh truh sek tơlang ăn, jĭ pơlŏ tŏ hơkâu kŭm gơnơm kơ đe linh vei lăng tơring sơlam khăm hơmet ăn ‘năi".

Kŭm hăm ‘nŏh, khul linh vei lăng tơring sơlam hăm khul kơdră tơring oei jang hơdoi, tơlĕch jang ‘lơ̆ng dôm tơdrong tơgŭm ăn kon pơlei jang tŏk mŭk drăm, sut pơđĭ pơngot, tơjur tơnuh hin, tơplih ming đon tơchĕng, trong jang xa. Tơdrong ‘nâu vang tơgŭm jang atŏk tơiung mŭk drăm, tơpôl tơ̆ tơring sơlam, pơjing tơdrong drơ̆ng nơ̆r, mât mĭnh jơhngâm đon đơ̆ng kon pơlei păng khul kơdră tơring lơ̆m tơdrong vei lăng kơjăp tơdrong sơđơ̆ng tơ̆ tơring sơlam.

Pơma tơ̆ Hop akŏm, ƀok Trương Hải Long- Phó Bí thư đảng dêh char, Kơdră vei lăng kon pơlei dêh char Gia Lai chih răk păng tơchĕng ‘lơ̆ng dôm tơdrong jơnei lơ̆m tơdrong jang pơjing tơring tang găn kơjăp ‘lơ̆ng tơ̆ tơring sơlam khei ‘năr âu ki. Atŭm hăm ‘noh pơma hơdăh, tơdrong pơm tơm tơ̆ tơring sơlam teh đak tôch kăp gĭt, ưh gơ̆h pơm glăi, athei khul linh ƀô đô̆i vei lăng tơring sơlam hơnơ̆ng hơtŏk hơnăp jang đơ̆ng khul jang vei lăng tơring sơlam; hơtŏk tơdrong pơvei hăm kon pơlei; tưk tơiung tơdrong tơroi tơbăt, pơtho tơƀôh găh tơdrong pơm tơm tơ̆ tơring sơlam teh đak; năng kăl tơdrong pơjing anih jang pran kơjăp tôm tơdrong, pơjing dôm xăh sơlam kơjăp ‘lơ̆ng găh rim tơdrong, vang tơgop vei kơjăp ‘lơ̆ng tơdrong sơđơ̆ng tơ̆ tơring.

Găh khul linh vei lăng tơring sơlam, Thiếu tướng Nguyễn Đức Mạnh, Phŏ Kơdră chĕp kơ̆l Ƀô đô̆i vei lăng tơring sơlam Việt Nam bơnê kơ Anih chĕp kơ̆l đảng dêh char, Anih vei lăng kon pơlei dêh char păng dôm tơring, anih jang kơpal tơ̆ dêh char Gia Lai kŭm hăm kon pơlei tơ̆ tơring sơlam hơnơ̆ng jang hơdoi, tơgŭm ăn khul linh vei lăng tơring sơlam jang đang ‘lơ̆ng tơdrong jang đei pơjao. Kiơ̆ Thiếu tướng Nguyễn Đức Mạnh, tơdrong lơ̆m apŭng plenh tĕh păng tơ̆ tơring tơplih hơnơ̆ng, pơm tơlĕch lơ nơ̆r athei ‘nao, athei hơtŏk loi dơ̆ng jơhngâm pran đơ̆ng đĭ đăng kon pơlei, pơjing jơhngâm đon kon pơlei sơđơ̆ng dơ̆ng kơjăp păng rim anih jang chinh trĭ rơgŏh ‘lơ̆ng, pran kơjăp tôm tơdrong. Lơ̆m nŏh, khul linh vei lăng tơring sơlam athei hơnơng tưk tơiung hơnăp jang hơdoi, vang roi tơƀôh ăn kon pơlei păng khul kơdră pơgơ̆r dêh char vă gơ̆h jang đang ‘lơ̆ng tơdrong jang atŭm:

“Hăm ƀô đô̆i vei lăng tơring sơlam Gia Lai athei iĕm hơnơ̆ng jang mă ‘lơ̆ng tơdrong jang roi tơƀôh ăn Kơdră chĕp kơ̆l Anih jang Đảng Khul linh păng Anih chĕp kơ̆l đảng dêh char, Jơnŭm pơgơ̆r kon pơlei, Anih vei lăng kon pơlei dêh char lơ̆m tơdrong chĕp kơ̆l pơgơ̆r rim anih jang, khul grŭp păng kon pơlei tưk tơiung jơhngâm pran atŭm lơ̆m tơdrong jang atŏk tơiung mŭk drăm, tơpôl, sut pơđĭ pơngot, tơjur tơnuh hin, pơjing Anih jang chinh trĭ tơ̆ tơring vang tơgop jang đang ‘lơ̆ng tơdrong jang vei lăng tơdrong pơm tơm teh đak, vei kơjăp tơdrong sơđơ̆ng tơ̆ tơring sơlam teh đak”.

Ƀlep ƀât ‘măng mă âu, Anih chĕp kơ̆l pơgơ̆r khul linh Ƀô đô̆i vei lăng tơring sơlam Việt Nam, Anih vei lăng kon pơlei dêh char Gia Lai hơpăh ƀăng khen; Anih chĕp kơ̆l ƀô đô̆i vei lăng tơring sơlam dêh char Gia Lai hơpăh grat ăn dôm khul grŭp, rim bơngai jang rơgei đei lơ tơdrong tơgop tơ̆ tơring.