Grŭp vei lăng bri plei Keo, xăh Ayun, apŭng Chư Sê iŏk vei lăng hlŏh 100ha bri ‘long đơ̆ng Anih vei lăng bri ‘long tang găn sar bar Chư Sê. Dôm hơgăt teh bri ‘long tơ̆ âu đei lơ ‘ngiĕt kro kơna tôch ƀônh đei unh xa bri. ‘Nhŏng Bùi Văn Khánh, jang lơ̆m Grŭp vei lăng bri plei Keo, xăh Ayun ăn tơbăt: “’Nhŏng oh hơnơ̆ng năm dăr joang tơ̆ bri, mă loi lơ̆m ‘năr tŏ kơnê̆ thoi âu. Tơdăh đei tơdrong kiơ ‘nŏh nhôn tơroi ăn Anih vei lăng bri ‘long păng anih jang kơpal hloi vă đei trong tơjră”.

Mât lơ̆m khei tŏ dêh hlŏh kơ pơyan phang, Anih vei lăng bri ‘long tang găn sar bar Chư Sê hơmet kơjăp 7 khul vei lăng bri; hơnơ̆ng năm dăr joang. Vei lăng tơ̆ dôm chơ ƀôt bri gĭt kăl, hơmet đei unh xa dêh hlŏh. Hơdai hăm ‘nŏh pơgơ̆r soh hơmet ‘ngiĕt vă pơm trong găn ưh ăn unh xa mơ mrok jŭm dăr hlŏh 400 ha bri ‘long pơtăm păng bri brăh hơmơt unh xa dêh hlŏh tơ̆ 3 xăh: Bar Maih, Ayun păng H’Bông.

Ƀok Đinh Mạnh Phong, Kơdră Anih vei lăng bri ‘long tang găn sar bar Chư Sê, dêh char Gia Lai ăn tơbăt, tơdrong sŏh hơmet ‘ngiĕt kro hơdrol đei bơngei vei lăng gơ̆h tơgŭm ăn tơdrong tang găn unh xa bri đei yoa ‘lơ̆ng ƀiơ̆. “Truh pơyan phang, tơmam ƀônh đei unh xa tôch lơ, kơna mưh sŏh bri đei bơngai vang vei lăng ‘nŏh gơ̆h găn ƀiơ̆ unh xa mơ mrok, huei đei unh xa tih; đơ̆ng noh bơ̆n gơ̆h vei lăng sơđơ̆ng ‘lơ̆ng ăn bri ‘long.”

Anih vei lăng bri ‘long tang găn sar bar Chư A Thai đei bri ‘long găh 2 apŭng Ia Pa păng Phú Thiện, dêh char Gia Lai, xă vă jê̆ 19 rơbâu ha. Ƀok Phạm Đắc Vịnh, Phŏ Kơdră vei lăng bri ‘long tang găn sar bar Chư A Thai ăn tơbăt: Dang ei, ‘nâu jĭ tơring đei nơ̆r khan hơdrol krê kơ unh xa kơsô̆ V, (krê kơ unh xa dêh hlŏh): “Anih jang klăih song pơm 5 khul vang jang hơdoi hăm 125 unh hnam vei lăng bri găh anih jang, tơlĕch tơdrong jang vei lăng năng tông păng tang găn unh xa bri. Hăm bri ‘long đei hla kro lơ mă anih jang oei vei lăng, adrol kơmât lơ̆m pơyan phang ki, nhôn pơgơ̆r sŏh hơmet ‘ngiĕt pơm trong găn unh xa mơmrok vă găn unh ăn unh xa mât tơ̆ bri”.

Vă tang găn unh xa bri đei yoa ‘lơ̆ng hlŏh, đơ̆ng sơnăm 2023 truh dang ei, Anih vei lăng kon pơlei apŭng Ia Grai kŭm hăm dôm tơ ‘ngla bri vang jang hơdoi hăm khul kơdră tơring pơgơ̆r 15 ‘măng chă roi tơbăt Luơ̆t vei lăng păng atŏk tơiung bri tơ̆ 5 xăh đei bri hăm hlŏh 1000 ‘nu kon pơlei vang akŏm; Kĭ pơkăp vei lăng ‘lơ̆ng unh, hăm kơhrĕng unh hnam oei xa jê̆ bri, ƀơk hlŏh 2 rơbâu hlak hla ar chih tơroi ăn kon pơlei dôm xăh đei bri vă tơdrong jang tang găn unh xa bri gơ̆h đei yoa ‘lơ̆ng hlŏh.

Ƀok Đỗ Văn Đông, Phŏ Kơdră vei lăng kon pơlei apŭng Ia Grai, dêh char Gia Lai ăn tơbăt: “Anih vei lăng kon pơlei apŭng pơgơ̆r năm dăr joang tơ̆ yăn âu tơ̆ 1,2 anih vei lăng bri păng anih tơ ‘ngla bri vă hơtŏk đon jang tơnăp lơ̆m tơdrong tang găn unh xa bri, mă loi athei tang găn, ưh ăn đei unh xa bri ‘long yơ".