Hla ar roi tơbăt ăn Khul dăr lăng chih hơdăh: Hrei ‘nâu, Gia Lai đei tơprŏh hơmet 88 tơdrong jang unh hơyuh rơgŏh, đei kơsư̆k hlŏh 4 triu 347 rơbâu MW đei: 60 tơdrong jang man hnam kơmăy unh điên hăm đak, 9 tơdrong jang pơm tơlĕch unh điên măt ‘năr, 17 tơdrong jang unh điên kial, ‘ngoăih kơ ‘nŏh đei hlŏh 3.200 anih pơm unh điên măt ‘năr kơpal bơbŭng hnam.

Dêh char apinh hăm Thủ tướng tĕh đak, Anih tơm vei lăng jang kơmăy, tĕch mơdro păng dôm anih tơm, anih jang kơpal đei ƀơm truh, tơmât lơ̆m tơdrong tơprŏh trong jang unh điên tĕh đak đơ̆ng 2021 - 2030 hăm 135 tơdrong jang unh hơyuh rơgŏh păng chô̆ tơlei unh điên sơđơ̆ng ‘lơ̆ng, akŏm đĭ đăng đei kơsư̆k dang 15.566 MW vă akŏm jên, tơmam jang atŏk tơiung roi đunh roi ‘lơ̆ng. 

Dêh char Gia Lai oei apinh Kuô̆k hô̆i pơtho tơƀôh trong pơjing păng tơlĕch Luơ̆t unh hơyuh rơgŏh; Apinh Khul kơdră tĕh đak kŭm hăm dôm anih tơm, anih jang kơpal jăh tơlĕch tơdrong hơgăt vei lăng, bơ̆ jang dôm tơdrong jang kăl găh unh điên đei lơ̆m trong vă jang atŏk tơiung unh điên, vang tơgop vei sơđơ̆ng chinh trĭ, sơđơ̆ng lơ̆m tơpôl tơ̆ tơring.