Kiơ̆ hla bơar chih tơbăt bơ̆ jang kơ Khul kơdră chĕp pơgơ̆r Hơnih vei lăng kon pơlei dêh char Gia Lai, sơnăm 2023, dêh char jang keh đang 14 lơ̆m 21 tơdrong pơkăp jang mŭk drăm-tơpôl, tơdrong jang kiơ̆ rim trong jang tơgŭm djru oei sa hơrih sa tơpôl hăm bơngai đei iŏk yua ăn teh đak, ŭnh hnam đei iŏk yua ăn teh đak sơđơ̆ng ‘lơ̆ng, sơđơ̆ng tơring sơlam teh đak đei vei lăng kơjăp, sơđơ̆ng dơ̆ng kơjăp tơpôl sơđơ̆ng. Mă lei, dêh char oei 7 tơdrong pơkăp jang tim mă jang keh đang, tơdrong tŏk mŭk drăm tim mă nhen hơpơi ‘meh vă, bơ̆ jang hơvơn tơmơt jên jang tơƀơ̆p tơnap tap, mĭnh ƀar tơdrong tơhlăk tơhlĭn lơ̆m bơ̆ jang pơprŏ vă jang, hrŭ ăn, iŏk tơvih teh, chưk klơ̆p teh, tơdrong tơlĕch jang kiơ̆ rim tơdrong jang tơm Teh đak oei hiơ hiơ̆.

Vă sơđơ̆ng ăn jang keh đang rim tơdrong jang mŭk drăm-tơpôl sơnăm 2024, Gia Lai apĭnh Khul kơdră Teh đak păng rim Hơnih tơm hơnih jang tơgŭm djru xek tơlang rim tơdrong tơhlăk tơhlĭn nhen: hơmet ming tơdrong pơkăp iŏk yua teh truh sơnăm 2025 trŏ lăp tơdrong yan au kơ dêh char; tơ iung pơjing tơdrong pơjao jang mŭk drăm-kih thuơ̆t, tơdrong jang teh đak lơ̆m iŏk yua kon jên jang teh đak găh bơ̆ jang pơgang, hơmet pơ ‘lơ̆ng tơhlăk tơhlĭn lơ̆m tơlĕch jang kiơ̆ Tơdrong jang tơm Teh đak; ăn asong tơ iung pơjing trong gre rĕnh Pleiku- Quy Nhơn kiơ̆ trong teh đak tơmơ̆t jên jang ... Lơ̆m tơdrong jang ŭnh hơyuh ‘lơ̆ng, ƀok Phạm Văn Binh-Kơdră chĕp pơgơ̆r Hơnih vei lăng Mơdro sa Gia Lai pơma hơdăh:“Gia Lai pơm tơlĕch đei 3.000 MWp, mă lei rŏ năng gô sơlăh lê̆ pă 30 MWp, kơna pơm tơlĕch đei 10 pơdăh, lăp tĕch mơdro đei 1 pơnăh tơmơ̆t lơ̆m ŭnh hơyuh teh đak. Sơnăm 2020 păng 2021, dêh char jei tơlĕch 17 tơdrong vă jang ŭnh hơyuh hăm akŏp pơjing đei 1.200 MWP. Mă lei, au ki Pơprŏ jang ŭnh hơyuh 8 lăp đei 604 MWP ăn jăl jang 2021-2030. Kơna, pơtêng hăm tơdrong kĕ đei kơ dêh char ‘noh tôch tŏ sĕt sot, kăl đei tơdrong lăng ba kơjăp hloh dơ̆ng đơ̆ng Trung ương".

Tơ̆ jơ bơ̆ jang, tang măt ăn Hơnih tơm vei lăng Trong gre nơnăm, Hơnih tơm jang Jên hu, Hơnih tơm jang Mơdro sa, Hơnih tơm Pơprŏ tơdrong jang păng Tơmơ̆t jên jang, Hơnih tơm jang Tơbôl, Hơnih vei lăng Kon kông ... jei hlôi tơblang hơdăh, pơm hơdăh mĭnh ƀar tơdrong athei, athei đơ̆ng dêh char; adoi, tơgoăt iŏk, chih răk dôm tơdrong mă păh hơnih ưh kơ gơ̆h jang vă akŏm tơroi tơbăt ăn Khul kơdră teh đak hrôih lăng hơlen, xek tơlang ăn dêh char.

Pơma pơtôch hop akŏm, Ƀô̆ trơng Bùi Thanh Sơn pơma hơdăh: sơnăm 2024, Khul Kơdră teh đak tơlĕch trong jang “Tơgoăt tơgoăl kơjăp, pran kơtang hơbĕch hơbal, tơplih tơchăr, tơtom jơnei". Đơ̆ng tơdrong yan au kơ tơring, athei dêh char tơlech jang kiơ̆ trong lăp, hơdăh hloh dơ̆ng. Kiơ̆ kơ ‘noh, dêh char kăl akŏm tơlĕch jang kiơ̆ kơtang Tơdrong tơchơ̆t 23 Hơnih tơm Chinh trĭ; tơlĕch jang kiơ̆ pơprŏ jang dêh char Gia Lai 2021-2030; tơchĕng hơlen, tơlĕch nơ̆r apĭnh trong jang kăl tơgŭm djru tơring Tây Nguyên; pơgơ̆r tơlĕch jang kiơ̆ tơtom rim tơdrong jang tơm Teh đak; akŏm hơmet pơ ‘lơ̆ng bơ̆ jang pơm hla bơar, tơgŭm djru hơnih mơdro sa pơm tơlĕch tĕch mơdro tơmam drăm. Ƀô̆ trơng Bùi Thanh Sơn pơma hơdăh:“Ĭnh athei 3 tơdrong kăl iung jang ‘noh: tơlĕch jang kơtang rim hla bơar pơrô̆ jang đơ̆ng Trung ương Đảng, Kuô̆k hô̆i, Khul kơdră Teh đak jang kiơ̆ hrơ̆p mĭnh ‘măng iŏk đei jơnei kơtang trong jang atŏk tơ iung mŭk drăm tơpôl păng trong pơprŏ jang 5 sơnăm. Lơ̆m au mă kăl lăng kơjăp pêng ‘măng tơlĕch jang kơtang păng 6 tơdrong jang tơm 12 trong jang kăl mă khul kơdră teh đak tơlĕch ăn; sơđơ̆ng chinh trĭ, sơđơ̆ng dơ̆ng kơjăp tơpôl lơ̆m dêh char, tơ iung pơjing mŭk drăm pơm tơm kơdih tơklep hăm vang mơ̆t hơdoi apŭng plĕnh teh kơtang, jang kiơ̆ jơnei. Păng mă pêng ‘noh kơhret kơjăp pơm kiơ̆ kơjăp lơ̆m jang kiơ̆ rim hla bơar khôi luơ̆t, tơdrong tơchơ̆t kơ Kuô̆k hô̆i.”.

Ƀô̆ trơng athei, sơnăm 2024, Gia Lai kăl lăng kơjăp rim tơdrong jang, trong pơprŏ jang đơ̆ng Khul kơdră teh đak hăm trong jang “Tơlĕch jang kơtang hơnăp jang, iung jang tơtom, atŏk kơtang tơchăr păng jơnei kơjăp ‘lơ̆ng”; adoi, sơkơ̆t hơdăh ‘nau jĭ sơnăm kăl hloh lơ̆m jang kiơ̆ trong pơprŏ jang atŏk tơ iung mŭk drăm-tơpôl 5 sơnăm vă akŏm chĕp pơgơ̆r, pơrô̆ jang.

‘Ngoăih kơ ‘noh tơƀôh hơdăh tơdrong jang tơm mă dêh char Gia Lai akŏm jang kiơ̆,Ƀô̆ trơng Bùi Thanh Sơn jei athei rim hơnih tơm, hơnih jang, hơnih bơ̆ jang Trung ương đei ƀơm truh hơnơ̆ng lăng ba kơjăp, jang kiơ̆ ƀlep rim trong tơlĕch ăn, nơ̆r athei đơ̆ng tơring vă akŏm hơmet pơ ‘lơng; adoi, đei trong pơtho tơbăt hơdăh vă dêh char tơlĕch jang jơnei 3 tơdrong jang tơm teh đak, atŏk tơ iung ŭnh hơyuh ‘lơ̆ng, jang kmăi kmŏk pơm tơlĕch tơmam drăm, choh jang sa hăm kmăi gơ̆h hơgei, pơtrŭt kơtang mơdro sa yak hloh sơlam teh đak, tơmang pơhiơ̆ ... jei nhen tơgŭm djru chă tơchĕng hơlen mĭnh ƀar trong jang, trong tơgŭm kăl vă atŏk tơ iung tơring Tây Nguyên, lơ̆m au đei dêh char Gia Lai.