Pơhlom lơ̆m 1 khei kơ âu, hơnơ̆ng ah kơmăng jur, jơva duk chơ chuơh atŭm hăm jơva kơmăi ƀôm re pơlŭk pơlăk lơ̆m tơring kơ dơnâu đak hnam kơmăi unh hơyuh Ia Ly. Lơ kơmăi kôch chuơh, gre ben mơ̆t lĕch chơ chuơh vih vơ̆t ưh kơ pơdơh nhen minh anih đe ming man tơdrong kăl. Kiơ̆ đơ̆ng lơ năr chă hơlen lăng, nhôn băt hơdah rim kơmăng đei hloh 10 tong duk tih, iĕ pơlơh băl chơ chuơh mơ̆t lĕch tơ̆ anih akŏm. Minh ƀar tong duk kôch chuơh ƀơm kơtă hơtŏk tơ̆ gre ben păng chơ ‘nhăk tĕch tơ̆ anih nai. Minh ‘nu kon pơlei hơrih jang xa tơjê̆ hăm dơnâu đak hnam kơmăi unh hơyuh Ia Ly (ưh kơ ăn băt hơnăn) ăn tơbăt: “Anih kôch iŏk âu jang đơ̆ng đunh bơih, ah jơ âu (ah kơmăng) pơtơm năm kôch iŏk chuơh, oei ah kơ ‘năr noh ưh đei kôch ôh, kơ ‘năr duk oei ah cham gah to. Kôch iŏk chuơh đang noh kơdâu brŏk ah cham gah âu păng hơtŏk hloi tơ̆ gre, ưh đei cham akŏm kiơ ôh, hơnơ̆ng minh tong duk noh minh tong gre thoi ăi, ‘năr mă yơ adoi thoi ăi ngăl”

Ƀok Lê Xuân Dũng, Kơdră Anih jang Mŭk drăm păng Cham char apŭng Chư Păh ăn tơbăt, dang ei lơ̆m tơring teh kơ apŭng đei 10 anih, hăm 10 anih jang mŭk drăm, kŏng ti đei asong hla bar phep kôch iŏk chuơh, tơ̆ dôm xah Hà Tây, Ia Khươl, Ia Nhin păng Ia Ka. Đơ̆ng blŭng sơnăm 2023, Anih jang vei lăng kon pơlei apŭng Chư Păh hlôi pơjing minh khul jang vă chă dăr hơlen, chih akŏm nơ̆r pơtơ̆ng gah tơdrong kôch iŏk chuơh glăi. Mă lei, lơ̆m năr chă dăr hơlen noh ưh đei ƀôh kiơ ôh: “Iŏk yua mŭk drăm kăp gĭt tơ̆ dơnâu đak hnam kơmăi unh hơyuh Ia Ly truh dang ei tam mă đei minh anih yơ gơh iŏk yua kiơ̆ tơchơ̆t đơ̆ng khôi luơ̆t teh đak. Khul kơpal kơ Anih jang vei lăng kon pơlei apŭng, Kŏng an, Anih jang gah mŭk drăm cham char hlôi chă hơlen lơ̆m dơnâu đak, mă lei tơ̆ dôm ‘măng chă hơlen adoi tam mă ƀôh băt. Dơnâu đak noh tih să pơdui đơ̆ng dêh char Gia Lai hăm Kon Tum mă ah ƀôh băt noh dôm bơngai tơtông hlôi băt hơdrol, pơkăp tôm tơdrong, ƀôh rôp kơtă tôch tơnap tap, dôm bơngai tơtông hơnơ̆ng kôch iŏk ah jơ rơnguơ̆, ‘nguaih kơ jơ jang, ah kơmăng kơmơ̆t”

Kiơ̆ tơroi đơ̆ng Anih jang vei lăng kon pơlei apŭng Chư Păh, dang ei tơ̆ dơnâu đak hnam kơmăi unh hơyuh Ia Ly đei 4 anih jang trŏ tơchơ̆t tŏk bŏk oei pơm jang kôch iŏk chuơh. ‘Nguaih kơ 1 anih akŏm trŏ tơchơ̆t oei đei 3 anih kôch iŏk chuơh kơ anih jang nai hăm tơdrong akhan, kôch pơ-‘nguaih klŏng dơnâu đak. Mă tam chă tĕch răt, chơ pơdŭ mŭk drăm mă lei tơdrong kôch iŏk, chơ pơdŭ hlôi đei lơ̆m đunh khei năr bơih. Ƀok Nay Kiên, Kơdră Anih jang vei lăng kon pơlei apŭng Chư Păh ăn tơbăt, tơdrong akŏm, chơ pơdŭ chuơh glăi hơnơ̆ng noh ah kơmăng, noh pơm tơnap tap ăn khul jang kơpal chă dăr hơlen:  “Tơdrong đei âu ƀôh lơ̆m 1 khei kơ âu bơih, hăm dôm hla bar phep asong pơm jang noh kôch hơmet klŏng dơnâu đak đơ̆ng Anih tơm Kŏng thương asong ăn chă kôch lơ̆m dơnâu đak đĕch. Gah tơm noh dôm anih jang âu ưh gơh chơ pơdŭ lĕch tơ̆ ‘nguaih. Mă lei lơ̆m kơmăng dah mă kơplah ưh đei anih jang kơpal chă dăr hơlen lăng noh đe hlôi chơ tơlĕch. Truh âu kơnh nhôn gô akŏm khul jang dăr hơlen hăm 4 anih asong jang tơ̆ tơring âu. Mă yơ lơ̆m sơnong jang kơ apŭng, nhôn gô sek tơlang mă tơnăp, mă yơ sơnong kơ dêh char, dah mă dêh char boăl noh nhôn pơtruh nơ̆r hăm dêh char vă dêh char pơtruh nơ̆r hăm dêh char Kon Tum vă sek tơlang kiơ̆ tơchơ̆t tơlĕch”

Đei lơ gre chơ chuơh glăi hlôi pơdŭ chuơh lĕch đơ̆ng dơnâu đak hnam kơmăi unh hơyuh Ia Ly ưh kơ mơ̆ng kơ bu. Tơdrong rơhơi, ưh đei tơnăp hăm sơnong jang vei lăng tơ̆ âu tŏk bŏk oei pơm huach lơ mŭk drăm kăp gĭt kơ tơring păng pơrăm truh lơ tơdrong nai gah vei sơđơ̆ng tơpôl.

Kơ hrĕng met khô̆i chuơh đei chơ pơdŭ tĕch rim năr, ưh hơdrô̆ pơrăm mŭk drăm, mă oei pơrăm truh tơdrong pơyua ăn tơring. Ƀok Đoàn Tiến Cường – Kơdră Kŏng ti hnam kơmăi unh hơyuh Ia Ly (lơ̆m Anih jang Unh hơyuh Việt Nam) ăn tơbăt, tơdrong kôch iŏk chuơh glăi tơ̆ dơnâu đak hnam kơmăi unh hơyuh tam mă pơrăm truh tơdrong ‘lơ̆ng sơđơ̆ng kơ dơnâu đak. Khei năr âu ki, anih jang hơnơ̆ng yua ca nô, duk chă dăr hơlen vă vei sơđơ̆ng ăn dơnâu đak. Lơ̆m pơhlom 300m ataih đơ̆ng anih tơm dơnâu đak, bơngai jang tơ̆ hnam kơmăi unh hơyuh hơlen tơpuh dôm duk kôch iŏk chuơh truh tơ̆ noh. Oei ‘nguaih kơ anih tơroi tơ̆ kơpal lơ̆m dơnâu đak noh jing sơnong chă dăr hơlen vei đơ̆ng dôm anih jang kơpal kơ apŭng Chư Păh, Anih jang Mŭk drăm păng Cham char, Kanh sat vei cham char. Mă tơdrong kôch iŏk chuơh glăi tam mă pơrăm truh tơdrong sơđơ̆ng tơ̆ dơnâu đak, mă lei tơdrong âu kăl đei sek tơlang mă tơnăp, vă vei vêr mŭk drăm, cham char tơ̆ dơnâu đak păng vei sơđơ̆ng ăn tơdrong ‘lơ̆ng hăm cham char.