Mŏ Th. Mĭnh ‘nu bơngai drŏ kăn oei tơ̆ phương Tây Sơn, pơlei tơm Pleiku ‘nao năm truh tơ̆ Hơnih bơ̆ jang Vei lăng sơđơ̆ng mạng păng tang găn khul yoch hăm kmăi kmŏk hơgei kơ Kŏng ang dêh char Gia Lai vă tơroi tơbăt sư put ƀơm khul hơlĕnh pơdăr iŏk truh 160 triu hlak jên.

Đunh kơ au 2 năr, mŏ kơtơ̆ng đe krao điên thoăi tơroi akhan pôk ăn kơ mŏ tơmam drăm tôch kơmăt kơ yuơ hơdrol ‘nŏh mŏ răt tơmam drăm tơ̆ siêu thị điện máy.  Vă sơng iŏk đei tơmam hơpăh au lei mŏ Th. ăl tai tơmơ̆t app Telegram lơ̆m điên thoăi vă gơ̆h chă pơma dơnuh dih băl. Kiơ̆ nơ̆r khul hơlenh athei, mŏ kơtĭt lơ̆m rim trong link vă chă rơ̆ih tơmam drăm, hăm mĭnh ‘măng kơtĭt iŏk đei đơ̆ng 10.000 hlak jên truh 40.000 hlak jên. Mư̆h pơjing đei jơhngơ̆m đon put, khul hơlĕnh au chă pơdôr mŏ pơtruh kon jên lơ tơmơ̆t jang, hăm đei sa jên cheh đơ̆ng 40 truh 60%. Lơ̆m năr 11/5, mŏ hlôi đei 10 ‘măng plôih tai khoan kơdih vă pơtruh hloh 160 triu hlak jên lơ̆m 2 tai khoan, đơ̆ng noh mă băt dih kau hlôi puh ƀơm đe hơlĕnh pơdăr. Đei băt, blŭng sơnăm 2023, tơ̆ Gia Lai hlôi đei bơngai răm kơ đe hơlĕnh pơdăr truh 3 ti 500 triu hlak jên.

‘Ngoăih trong hơlĕnh pơdăr hle, dôm trong hơlĕnh pơdăr sơ̆ ki pơm ya kong ang tơroi tơbăt akhan bơ̆n đei tơdrong glăi, pơjoă khoă hê̆ sim điên thoăi, khoă tai khoan, pơtruh kon jên vă tơgŭm ăn bơ̆ jang dăr lăng hơlen tơdrong yoch; pơm hơlĕnh bơngai teh đak đe vă pơm boăl joăt, pôk ăn tơmam drăm; tơchă tơmơ̆t bơngai jang tĕch mơdro tơmam drăm hăm sa jên lơ;krao hơvơn tơmơ̆t jên jang; ăn tŏk iŏk jên kiơ̆ online…jei đei khul hơlĕnh pơdăr “pơjing” kơna oei đei kon pơlei puh ƀơm đe sư.Lơ̆m sơnăm 2022, khul vei lăng sơđơ̆ng mạng dêh char Gia Lai, sơng iŏk đei 124 ‘măng kon pơlei tơroi tơbăt hăm kon jên hiong răm truh 40 ti hlak jên. Bơngai puh ƀơm khul kơnê̆ hơlĕnh pơdăr iŏk lơ hloh ‘nŏh hloh 10 ti hlak jên.