Giĕng joh ayŏ kơ dŏ xoang-Chă tơmang lăng Gia Lai sơnăm 2023 pơgơ̆r đơ̆ng ‘năr 11 truh ‘năr 18/11 hăm tơdrong vang akŏm đơ̆ng dang 1.000 ‘nu ngê nhơ̆n lơ̆m păng ‘ngoăih kơ dêh char. Lơ̆m noh, hơiă hlŏh jĭ Festival chĭng chêng Gia Lai 2023 akŏm đei khul ngê̆ nhơ̆n đơ̆ng 17 apŭng, thĭ xăh, plt lơ̆m dêh char păng dôm dêh char Tây Nguyên. Đơ̆ng rŏng kơ ‘nŏh jĭ dôm tơdrong lêh nhen Lêh pơkao dur yoăn – kông unh Chư Đang Ya (apŭng Chư Păh); tơdrong thi hao thŏng nan tơ̆ đak krong Pô Cô (apŭng Ia Grai). Ƀlep ƀât ‘măng mă âu, tơ̆ plt oei pơgơ̆r tơdrong lêh tơ̆ trong glung; pơgơ̆r dơ̆ng dôm tơdrong juăt đơ̆ng sơ̆ lơ̆m tơdrong arih xa tơpôl, dôm tơdrong et soi đơ̆ng kră sơ̆; ming pơdă, tôn reh tơmam joh ayŏ Tây Nguyên.

Pơtăl kơ Giĕng joh ayŏ kơ dŏ xoang-Chă tơmang lăng Gia Lai, tơ̆ plt Pleiku pơgơ̆r Năr chă tơmang lăng 2023 păng tơdrong thi kơdâu Gia Lai City Trail- Tơdrong hơpo kơ bri kông. Tơmoi chă tơmang lăng păng kon pơlei đei lăng ngôi tơdrong tôn chĭng chêng tôch kơchơt tơ̆ hơnăp anih ‘lơ̆ng rŏ Biển Hồ. Hơla yơ̆p ‘long hơngo tôch rơngơp, ‘nŏh jĭ tơdrong pơdă Pleiku Sơ̆ păng hrei ‘nâu, hăm 100 um rup găh lơ tơdrong nhen kon bơngai, cham char ‘lơ̆ng rŏ, tơring kơdrâm, joh ayŏ kơ dŏ xoang, tơdrong lêh tơ̆ Pleiku đơ̆ng sơnăm 1975 truh dang ei.

Ƀok Ngô Văn Hoà - Kơdră vei lăng Khul Thây păng hok tro, bơngai phĭn rup âu ăn tơbăt: “Rup so đơ̆ng inh ‘măn răk đơ̆ng 2008 truh dang ei. Rup ‘nâu ưh đei ƀan kuên, dôm trang mạng pơih tơƀôh ngăl. Inh pơm hơtŏ băl, rup ‘nao nhen thoi rup so, vă đe chă hơlen năng. Mĭnh kơsô̆ bơngai akhan rup sơ̆ tôch ‘lơ̆ng, đei bơngai akhan Pleiku hrei ‘nâu tơplih ‘lơ̆ng dêh. Inh ‘mĕh kon pơlei Pleiku năng dơ̆ng rup chăl adrol sơ̆; vă đe mơlôh Pleiku gơ̆h lăng ƀôh tơdrong jang tŏk pran ‘lơ̆ng nhen dang ei ‘nŏh jĭ tơdrong akŏm jơhngâm đơ̆ng lơ jơhnơr mĕ ƀă yă ƀok păng kon pơlei dôm hơdrĕch hơdrung lơ̆m dêh char”.

Mĭnh tơdrong hơiă đơ̆ng Năr chă tơmang lăng 2023 ‘măng mă âu ‘nŏh tơdrong thi kơdâu “Gia Lai City Trail – Tơdrong hơpo kơ bri kông” hăm tơdrong vang akŏm đơ̆ng 4000 ‘nu bơngai. Trong kơdâu 5km, 10km, 1 puăt marathon (21km) păng full marathon (42km) đei hơmet iŏk đơ̆ng Biển Hồ ngăl, kơdâu klĕch lơ pơgar ‘long hla che păng ‘long hơngo kơ hrĕng sơnăm, kơdâu klĕch kơ Hnam chuơ so Bửu Minh, truh tơ̆ kông unh Chư Đăng Ya ƀrŭng ƀrăng kơ pơkao dur yoăn tơ̆ apŭng Chư Păh. Trong kơdâu đei hloi tơ̆ tơring kơdrâm, trong ser, trong krang hloi, trŏ pơyan ‘lơ̆ng hlŏh tơ̆ groi kông Gia Lai.

Yă Nguyễn Thị Hậu Hiền, đĭ vă jê̆ 70 sơnăm bơih, kŭm hăm unh hnam đơ̆ng Hà Nội mât tơ̆ plt Pleiku chă tơmang lăng păng vang kơdâu thi, chơt hơiă pơma: “Kông unh păng pơkao dur yoăn, tôch ‘lơ̆ng; đei ‘long hơngo thoi âu hơyuh kial tôch rơgoh. Kon bơngai Pleiku tôch tơpăt ‘lơ̆ng. Hơnăn tơdrong thi kơdâu ‘nŏh Tơdrong hơpo kơ bri kông, ‘nâu tơpă mơ̆n tơdrong hơpo đơ̆ng inh, lơ sơnăm ‘nâu tơpă. Dang ei vang thi kơdâu tơ̆ âu hăm cham char tôch ‘lơ̆ng kŭm hăm hnam tơnŏ, inh tôch hơiă”.

Kiơ̆ Anih pơgơ̆r, tơdrong thi kơdâu trail-kơdâu jơ̆ng hoh hơdai hăm tŏk kông ‘măng mă blŭng đei pơgơ̆r tơ̆ Gia Lai, tơdrong thi sơnăm ‘nâu pơjing tơdrong ‘lơ̆ng sơng đei lơ bơngai lơ̆m tĕh đak vang truh thi. Lơ̆m kơsô̆ dôm bơngai vang thi ‘măng mă âu, đei lơ bơngai adrol sơ̆ kơdâu thi iŏk đei jơnei kơjung lơ̆m teh đak kŭm nhen tơdrong vang thi lơ̆m apŭng plenh teh hai. Tơdrong thi iŏk đei tơdrong tơrĕk, tơgŭm đơ̆ng 35 anih jang, anih tĕch mơdro hăm hlŏh 1 ti hlak jên păng lơ tơmam nai hai. ‘Ngoăih kơ tơdrong pơ ‘nhŏ ăn tơdrong pơgơ̆r, 1 păh jên vă pơyoa ăn tơdrong vei lăng năng tông tơdrong arih xa lơ̆m tơpôl tơ̆ plt Pleiku păng tơgop ăn Anih mong jên “Ao tơnŏ ăn oh”.

Ƀok Nguyễn Xuân Hà – Kơdră Anih vei lăng joh ayŏ kơ dŏ xoang, tơroi tơbăt kơ plt Pleiku, dêh char Gia Lai ăn tơbăt: hăm lơ tơdrong joh ayŏ kơ dŏ xoang, tơplŏng kơdâu, joh hơri hơxoang ‘lơ̆ng rŏ, Năr Chă tơmang lăng 2023 đơ̆ng plt Pleiku hơnhăk ba lơ tơdrong tôch hơiă hăm kon pơlei păng tơmoi. ‘Nâu kŭm jing jơnăr vă tơring roi tơbăt um rup kon bơngai ‘lơ̆ng hơiă, bri ‘long bri brăh păng tơdrong joh ayŏ kơ dŏ xoang ‘lơ̆ng rŏ kơ Pleiku.

“Dôm năr âu ki, dôm anih jang, dôm xăh phương, đe ngê̆ nhơ̆n adrin pơtâp pơhrăm, hơpơi ‘mĕh plang jơhngâm ăn tơmoi chă tơmang lăng păng dôm bơngai đơ̆ng dôm tơring vih akŏm tơ̆ âu, gơ̆h ƀôh tơdrong ‘lơ̆ng đơ̆ng joh ayŏ kơ dŏ xoang păng jơhngâm đon băt ‘mêm kơ tơmoi đơ̆ng kon pơlei Pleiku. Kiơ̆ đơ̆ng âu, plt ‘mĕh pơtruh nơ̆r tơbăt Plt Pleiku ‘lơ̆ng hơiă, ‘mêm kơ tơmoi, jĭ groi kông rơgŏh ‘lơ̆ng yoa jơhngâm pran”.

Năr chă tơmang lăng plt Pleiku 2023 pơgơ̆r đơ̆ng ‘năr 17-19/11 tơ̆ Anih chă tơmang lăng Biển Hồ, xăh Biển Hồ (plt Pleiku). Truh năr pơgơ̆r, tơmoi chă tơmang đơ̆ng jơ̆p tơring gơ̆h mât hơdai hăm tơdrong joh ayŏ kơ dŏ xoang ‘lơ̆ng hơiă đơ̆ng hơdrĕch kon kông tơ̆ tơring, kiơ̆ đơ̆ng dôm tơdrong tôn chĭng chêng, pơgơ̆r tơiung dơ̆ng 1,2 tơdrong et soi, joh ayŏ kơ dŏ xoang so kơ kon pơlei kon kông, ming pơdă um rup Pleiku Sơ̆ păng hrei ‘nâu, um rup chă tơmang lăng Pleiku… ‘Ngoăih kơ ‘nŏh, vang truh hăm năr pơchơt, tơmoi chă tơmang lăng đei xa ngôi bơ̆n tơmam xa tôch ‘lơ̆ng tơ̆ Gia Lai, dôm tơmam OCOP. Hăm dôm tơdrong joh ayŏ kơ dŏ xoang – chă tơmang lăng hơnơ̆ng đei pơgơ̆r lơ̆m khei 11/2023, tơƀôh hơdăh tơdrong juăt joh ayŏ kơ dŏ xoang ‘lơ̆ng hơiă đơ̆ng sơ̆ kơ dôm hơdrĕch kon kông. Hơdai hăm ‘nŏh roi tơƀôh tơdrong ‘lơ̆ng đơ̆ng chă tơmang lăng tôch hơiă đơ̆ng dêh char Gia Lai.