Kiơ̆ hla ar chih tơroi tơ̆ Hop akŏm Khul kơdră chĕp kơ̆l Đảng ƀô̆ dêh char Gia Lai, ‘măng mă 12 (pơih xă), tơdrong jang tŏk mŭk drăm kơ Gia Lai 6 khei âu ki iŏk đei 5,54% pơtêng hăm khei âu sơnăm 2022. Dôm tơdrong hơgăt găh thu mong jên, jang kơmăy kơmŏk, đei 48,7 păng 44,6%; kơsô̆ anih tĕch mơdro pơm hla ar jang xa hơlơ̆k dơ̆ng păng kơsô̆ tơdrong jang đei tơmât jên tŏk; tơdrong chă tơmang lăng oei hơnơ̆ng ‘lơ̆ng hơiă.

Mă lei, lơ tơring tơ̆ Gia Lai oei tơƀâp pơmat tat lơ̆m tơdrong thu jên iŏk yoa tĕh kơna jing ưh kơmăh jên vă tơmât ăn dôm tơdrong jang; pơmat tat mưh tơlĕch trong pơtăm ‘long bri yoa trong jang hrei ‘nâu tam mă đei ƀôh tơdrong tơgŭm lăp ‘lơ̆ng, ưh jăh tơlĕch trong iŏk yoa tĕh; tơdrong bơ̆ jang dôm tơdrong jang tơm kơ tĕh đak oei hiơ̆, nhen Tơdrong jang tơm kơ tĕh đak găh atŏk tơiung mŭk drăm, tơpôl tơ̆ tơring kon kông păng groi kông. Hơdrô̆ găh tơmât jên jang kơ tĕh đak, đĭ khei 6/2023, dêh char ‘nao tơlĕch đei vă jê̆ 600 ti lơ̆m kơsô̆ đĭ đăng 4.178 ti hlak jên vă tơmât jang kơ tĕh đak lơ̆m sơnăm, iŏk đei 13,85%.

‘Nâu kŭm jing tơdrong mă Anih vei lăng kon pơlei dêh char Gia Lai păng dôm anih jang kơpal kơ dêh char vă akŏm jơhngâm sek tơlang tơ̆ hơnăp kơnh. Anih vei lăng kon pơlei dêh char Gia Lai hlôi pơjing 3 Grŭp jang vă hơtŏk tơdrong dăr lăng, athei jăh sek tơlang pơ ‘lơ̆ng dôm tơdrong ‘nao đei.

Ƀok Đinh Hữu Hoà- Phŏ Kơdră vei lăng Anih tơlĕch nơ̆r sơkơ̆t, tơmât jên jang dêh char Gia Lai ăn tơbăt: “Dôm anih jang kơpal vang hơlen năng hla ar chih čhơ̆ tơdrong jang, adrin pơm tơjur ƀiơ̆ jơnăr hơlen năng vă jăh roi tơbăt tơdrong jang, trŏ khei ‘năr. Anih vei lăng tơmam, cham char bri brăh kŭm athei tơroi ăn Anih vei lăng kon pơlei dêh char hơmet pơ ‘lơ̆ng tĕh vă pơyoa ăn tơdrong jang. Oei hăm dôm grŭp bơ̆ jang, athei jăh hơtŏk hrĕnh tơdrong dăr lăng, jang hơdoi hăm dôm tơring tơroi ăn anih jang kơpal sek tơlang vă pơm thoi yơ gơ̆h hơtŏk hrĕnh tơdrong jang”...

Lơ̆m giĕng âu ki mơ̆n, Jơnŭm pơgơ̆r kon pơlei dêh char Kon Tum pơgơ̆r Hop akŏm ‘măng mă 5 vă pơma nuh, hơlen năng tơdrong jang mŭk drăm, tơpôl 6 khei blŭng sơnăm, chih hơdăh trong jang, tơdrong vă jang tơm lơ̆m 6 khei hơtuch sơnăm 2023 păng tơchơ̆t dôm tơdrong jang kiơ̆ hơnăp jang kơdih. Kiơ̆ kơ ‘nŏh, 6 khei blŭng sơnăm tơdrong jang tŏk mŭk drăm lơ̆m dêh char đei 6,8% pơtêng hăm khei âu sơnăm sơ̆, dơ̆ng mă 22/63 dêh char, plt lơ̆m tĕh đak păng lơ hlŏh tơ̆ tơring Tây Nguyên. Lơ̆m nŏh tơdrong jang kơmăy păng ming man tŏk 10,88%; choh jang xa, pơtăm ‘long păng rong ka hơdang tŏk 5,65%; pơvih pơvăn tŏk 5,31%.

Mă đơ̆ng Kon Tum đei tơdrong jang tŏk lơ hlŏh tơ̆ Tây Nguyên, mă lei oei tŏ sĕt ƀiơ̆ pơtêng hăm đon pơhnŏng jang tŏk 10% mă dêh char tơlĕch lơ̆m sơnăm ‘nâu. Găh noh dơ̆ng 6 khei blŭng sơnăm ‘nâu thu mong jên lăp đei dang 1.840 ti, lăp 41% nơ̆r hơgăt đĕch; tơdrong chưk pơ ‘ngoăih tĕh ăn dôm tơdrong jang gĭt kăl oei tơƀâp pơmat tat…

Pơma ƀât blŭng hop akŏm, ƀok Dương Văn Trang, Kơdră jang lơ̆m Trung ương Đảng, Bí thư đảng dêh char, Kơdră Jơnŭm pơgơ̆r kon pơlei dêh char Kon Tum akhan, kăl đei trong jang pran hlŏh dơ̆ng vă hơmet pơ ‘lơ̆ng dôm tơdrong tam mă ‘lơ̆ng, tam mă pran, mă loi jĭ đon ki luơ̆t tam mă tơpăt ‘lơ̆ng; chă trong vĕh ver, tơtŭn ăn bơngai nai jang, hơmơt pŭ trăp đơ̆ng 1 kơsô̆ kăn ƀô̆, bơngai jang kơ tĕh đak mưh bơ̆ jang… vă tơgop ăn tơdrong jang đang ‘lơ̆ng dôm tơdrong pơhnŏng vă jang, tơdrong hơgăt jang atŏk tơiung mŭk drăm, tơpôl lơ̆m sơnăm 2023:

“Dôm bơngai tang măt Jơnŭm pơgơ̆r kon pơlei dêh char akŏm jơhngâm tơblang hơdăh, tơchĕng hơlen mă ‘lơ̆ng, rơđăh rơđong găh tơdrong jang đei, tơdrong tam mă ‘lơ̆ng, pơmat tat mưh bơ̆ jang dôm tơdrong hơgăt jang mŭk drăm, tơpôl păng tơdrong vă jang tŏk lơ̆m sơnăm 2023, mă loi jĭ sơng iŏk jên jang, tơlĕch jên jang kơ tĕh đak păng bơ̆ jang dôm tơdrong jang tơm kơ tĕh đak. Pơm hơdăh tơdrong găn trong, jô̆ hloi đơ̆ng ‘ngoăih păng đơ̆ng kơdih mưh chih tơlĕch hla ar pơtho jang kiơ̆ dôm trong jang đơ̆ng Trung ương păng pơgơ̆r tơlĕch jang tơ̆ jơ̆p tơring, rim anih jang”.

Kŭm tơ̆ Hop akŏm mă 5 mơ̆n, Jơnŭm pơgơ̆r kon pơlei dêh char Kon Tum jăl XII, đơ̆ng 2021-2026 hlôi hơlen năng, tơchơ̆t ăn 32 tơdrong mă Anih vei lăng kon pơlei dêh char tơroi lơ̆m hop akŏm, lơ̆m nŏh đei 1,2 trong jang gĭt kăl, nhen: tơdrong tơgŭm vă bơ̆ jang Tơdrong jang pơjing tơring kon pơlei oei xa tơ̆ dôm tơring đa đei tơdrong sar bar, tŏ ‘mi kial kơnê̆, tơring pơmat tat dêh hlŏh, tơring sơlam, tơring kon pơlei đơ̆ng nai mât oei kư̆ kă, tơring đei bri ‘long kơdrơ̆ng lơ̆m dêh char; tơlĕch jên tơgŭm pơm hơtŏk HTX; hơmet ming trong vă bơ̆ jang dôm tơdrong jang tơm kơ tĕh đak sơnăm 2022, 2023 păng tơchĕng hơlen hơdrol trong vă tơlĕch jên jang kơ tĕh đak sơnăm 2024.