Pơdă đei vă jê̆ 70 hlak rup, tơmam drăm, đei pơjing 3 tơdrong: Chăl sơnăm hơrih păng tơdrong jang kơ bơngai chhơ̆ rup Xu-Man, dôm rup chhơ̆ Xu-Man tơ̆ hơnih mong răk tơmam drăm dêh char Gia Lai păng mĭnh ƀar rup găh rup Xu-Man tơ̆ Hơnih mong răk Um rup Việt Nam.

Đơ̆ng noh, tơbăt dơ̆ng tơdrong hơrih sa, tơdrong jang păng trong chhơ̆ rup kơ nhap ƀok Xu-Man. Dôm hlak rup au đei ƀok chhơ̆ lơ̆m khei năr đơ̆ng sơnăm 1975 truh sơnăm 2005, găh lơ đei chhơ̆ hăm đak sơng. Dôm rup nhap ƀok Xu Man chhơ̆ ‘nŏh tơbăt hơdăh jơhngơ̆m đon kon pơlei Tây Nguyên hăm Kơdră chĕp pơgơ̆r teh đak Hồ Chí Minh ‘moi kiơ̆ rim rup găh Ƀok Hô bơ̆ jang, Ƀok Hô hăm kon pơlei Tây Nguyên; Jơhngơ̆m đon ‘mêm kơ eng teh đak đơ̆ng kon pơlei Tây Nguyên đei ƀôh hơdăh lơ̆m rup pơrô̆ pơrôp; dôm tơdrong oei sa jŏh ayŏ kơ bơngai Tây Nguyên adoi tơƀôh tơbăt dơ̆ng oei sa ‘lơ̆ng rŏ nhen rup chhơ̆ năr brư̆, tôn chĭng chêng păng hơri sa kơ ‘năr nhen peh ƀa, tanh brong jak.