Tơdrong jang tơchă, iŏk akŏm, băt hơdăh hơnăn kơting lĭnh lôch dŏng teh đak oei ưh tam băt tôm hơnăn lơ̆m sơnăm 2023 păng 6 khei blŭng sơnăm 2024 đei rim kơdră, anih jang, tơring kơ dêh char Gia Lai tơlĕch jang ‘lơ̆ng, đei iŏk yua. Đơ̆ng sơnăm 2023 truh dang ei, Đội K52 (Anih jang Chĭnh trĭ, Anih tơm pơgơ̆r Khŭl lĭnh dêh char Gia Lai)  hlôi tơchă akŏm đei 21 kơting lĭnh lôch dŏng teh đak, hơtŏk akŏp kơsô̆ akŏm, chơ vih tơ̆ teh đak đơ̆ng 2001 truh dang ei tŏk 1.489 kơting lĭnh lôch dŏng teh đak.

Lơ̆m dêh char Gia Lai, đơ̆ng sơnăm 2023 truh dang ei hlôi tơchă akŏm đei 26 kơting lĭnh lôch dŏng teh đak. Anih pơgơ̆r jang 515 băt hơdăh, tơdrong jang tơchă akŏm kơting lĭnh lôch dŏng teh đak tơ̆ hơnăp kơnh gô roi ‘năr roi mơmat tat hloh yua kơ tơdrong kơtơ̆ng ang găh pơsat lĭnh lôch dŏng teh đak roi ‘năr roi tŏ sĕt, dôm tơring đei kơtơ̆ng ang găh pơsat lĭnh lôch dŏng teh đak đei lơ tơplih, dôm bơngai băt kơtơ̆ng ang găh hơnih ƀŭ lĭnh lôch dŏng teh đak hrei ‘nâu ưh pă lơ.